[1] San kɔnɔntɔnnan kalo tannan tile tannan don, Matigi ka kuma sera ne ma ko:
[2] «Hadamaden, i ka nin don sɛbɛn, sabu Babilonɛ masakɛ gɛrɛla Jerusalɛm la bi.
[3] I ka ntalen da nin so murutilen ko la k'a fɔ a ye ko, Matigi Ala ko: ‹I ka nɛgɛ daga sigi tasuma kan ka ji kɛ a kɔnɔ.
[4] I ka sogobu tigɛlenɲumanw bila a kɔnɔ, i ka worobu ni kamanbu bɛɛ bila a kɔnɔ k'a fa koloɲumanw la.
[5] I ka bagankulu bɛɛ laɲuman sogo ta ka dɔgɔ don nɛgɛ daga jukɔrɔ. I k'a tobi kosɛbɛ, fo k'a kolow mɔ.›»
[6] O de kosɔn Matigi Ala ko: «Bɔnɛ bɛ mɔgɔfaga dugu ye, o min bɛ i ko nɛgɛ daga nsonma min tɛ se ka saniya. I ka o sogo kuruw bɛɛ bɔ a kɔnɔ kelen-kelen. I kana kala da u si kan.
[7] O dugu ka mɔgɔ fagalenw joli bɛ a kɔnɔ. A ye o joliw bɔn farakolo lankolon kan, a m'a bɔn duguma k'a datugu ni buguri ye.
[8] Ne kɔni, ne ye joli to farakolo lankolon kan, a tɛ se ka datugu yɔrɔ min na, walisa o ka ne ka dimiya lawuli fo ka ne mɔnɛbɔ o la.»
[9] Matigi Ala ko: «Bɔnɛ bɛ o mɔgɔfaga dugu ye. Ne yɛrɛ na a jeni dɔgɔ caya kosɛbɛ.
[10] Dɔgɔ kɛ a la ka tasuma bonya k'a sogo tobi k'a kɛ fɛnw kɛ a la k'a kolow bɛɛ jeni.
[11] O kɔ, i ka nɛgɛ daga lankolon sigi takamiba kan walisa k'a kalaya ka nsiranɛgɛ bilen, a ka nɔgɔlenya ka bɔ a la fo ka nson ban.
[12] Nka nafa t'a la k'a masɔrɔ a nson tɛna bɔ a la tasuma fɛ.
[13] Jerusalɛm, i ka kakalaya kow ye i nɔgɔ. Ne tun b'a fɛ ka i saniya nka i ma jɛya. I ka nɔgɔlenya kow tɛ se ka saniya fo ni ne ye ne ka dimiya bi i kan tuma min na.
[14] Ne, Matigi ye o fɔ, o na kɛ. Ne na o kɛ. Ne tɛna segin kɔ. Ne tɛna hinɛ wala ka nimisa.» Matigi Ala ko: «Kiri na tigɛ i kan ka kɛɲɛ ni i taama cogo ni i ka kɛwalew ye.»
[15] Matigi ka kuma sera ne ma ko:
[16] «Hadamaden, ne na i diyaɲe fɛnɲuman bɔsi i la ni saya ye yɔrɔ nin kelen, nka i kana a su kasi, i kana kulo, i kanaɲɛji bɔ.
[17] I ka dusukun na kasi kɛ, i kana su kasi kɛ. I ka i ka jalamugu to i kun na ka i ka sabara to i sen na. I kana i bonbonsi datugu, i kana sangabon da la dumuni kɛ.»
[18] Ne kumana mɔgɔw fɛ sɔgɔma da fɛ. O wula da yɛrɛ fɛ, ne muso sara. O dugusajɛ sɔgɔma da fɛ, Matigi ye min fɔ ne ye, ne ye o kɛ.
[19] Mɔgɔw y'a fɔ ne ye ko: «Mun y'a to i bɛ nin kɛ?»
[20] Ne ye u jaabi ko: «Matigi ka kuma sera ne ma ko,
[21] ne k'a fɔ Israɛl ka so ye ko Matigi Ala ko: ‹Ne na ne ka yɔrɔ senuma nɔgɔ, o min ye aw barika ni aw ka kuncɛbaya sababu ye, o min ko ka di aw ye, aw ka kanuya sababu don. Aw denkɛw ni aw denmuso minw bɛ Jerusalɛm dugu kɔnɔ, olu na faga npan fɛ.
[22] Ayiwa aw k'a kɛ i ko ne y'a kɛ cogo min na. Aw kana aw bonbonsi datugu, aw kana sangabon da la dumuni kɛ.
[23] Aw ka jalamuguw ka to aw kun na, aw ka sabaraw ka to aw sen na. Aw kana su kasi kɛ, aw kana kasi. Aw na fasa aw ka tilenbaliyaw kosɔn, aw na nwunanɲɔgɔn kosɔn.
[24] Ezekiɛl na kɛɲɛjirala ye aw la. A bɛ ko minw kɛ, aw ka olu bɛɛ kɛ. Ni o kɛra tuma min na, aw n'a dɔn ko ne ye Matigi Ala de ye.›
[25] «Hadamaden, ni ne ye u barika ni u ɲagali sababu ni u nɔɔrɔ ni u diyaɲe fɛnɲuman kanulen ani u denkɛw ni u denmusow bɔsi u la don min na,
[26] o don yɛrɛ la mɔgɔ kisilen na boli ka na o kibaru fɔ i ye.
[27] I da na yɛlɛ, i na kuma o mɔgɔ kisilen fɛ o don yɛrɛ la. I tɛna kɛ bobo ye tun. I na kɛɲɛjirala ye u la. U n'a dɔn ko ne ye Matigi de ye.»