[1] O kɔ, o cɛ taara ni ne ye yɔrɔ senuma kɔrɔn yanfan donda la kɛnɛma. O da sɔgɔlen tun don.
[2] O tuma la Matigi y'a fɔ ne ye ko: «Nin da tugulen ka to tuma bɛɛ, a kana yɛlɛ. Mɔgɔ si kana don o da fɛ, sabu Matigi, Israɛl bɔnsɔn ka Ala donna o da fɛ. O de kosɔn a tugulen ka to.
[3] Kuntigi kelenpe de na sigi yen ka dumuni kɛ Matigi ɲɛ kɔrɔ sabu kuntigi don. A bɛ don bulon kɔnɔ da min fɛ, a bɛ bɔ o da kelen fɛ.»
[4] O kɔ, cɛ taara ni ne ye saheli yanfan donda sira fɛ fo ka se Alabatosobaɲɛ fɛ. Ne ye filɛli kɛ. Ne y'a ye ko Matigi nɔɔrɔ ye Alabatosoba fa. Ne ye ne bi ka neɲɛda biri duguma.
[5] O tuma la Matigi y'a fɔ ne ye ko: «Hadamaden, i ka kɔlɔsili kɛ ka filɛli kɛ kosɛbɛ. Ne bɛ na Matigi batosoba sariya minw fɔ i ye, i ka olu lamɛn. Mɔgɔ minw bɛ don Alabatosoba kɔnɔ ani minw bɛ bɔ yɔrɔ senuma kɔnɔ, i ka i janto olu la ka olu kɔlɔsi kosɛbɛ.
[6] «I k'a fɔ Israɛl ka so murutilen ye, ko Matigi Ala ko: ‹Israɛl ka so, ne wasara aw ka ko haramulenw bɛɛ la sa.
[7] Jamana wɛrɛ mɔgɔ minw ma boloko u dusukun ni u farisogo la, aw ye olu ladon ne ka yɔrɔ senuma kɔnɔ ka ne ka yɔrɔ senuma nɔgɔ ne ka dumuni fɛn kɛn ni a joli lase tuma la aw fɛ. Aw ye ne ka layidu tiɲɛn ni aw ka ko haramulenw ye.
[8] Aw ma aw sɛbɛ don ne ka yɔrɔ senuma baara la nka aw ye dunanw bila aw nɔ na ne ka yɔrɔ senuma baara la.›
[9] «Ayiwa Matigi Ala ko: ‹Jamana wɛrɛ den minw ma boloko u dusukun ni u farisogo la, olu tɛ se ka don ne ka yɔrɔ senuma kɔnɔ. Jamana wɛrɛ den minw bɛ Israɛl bɔnsɔn cɛma, olu tɛ se ka don ne ka yɔrɔ senuma kɔnɔ fewu.
[10] Ka fara o bɛɛ kan, Levite minw ye u mabɔ ne la Israɛl bɔnsɔn tunun waati la, ni olu ye ne bila ka tugu u ka boliw la, olu jalaki doni na da u yɛrɛw kun.
[11] U na kɛ dakɔlɔsibaaw ye ne ka yɔrɔ senuma baara la. U na Alabatosoba baaraw kɛ. U na mɔgɔw ka saraka jenitaw ni saraka tɔw faga. U na jɔ mɔgɔw ɲɛ fɛ ka o baaraw kɛ.
[12] U ye baara kɛ u ka boli haramulenw ye ka Israɛl ka so labi tilenbaliya la, o de kosɔn ne ye ne bolo kɔrɔta u kama. U ka tilenbaliya jalakiw na bi u yɛrɛw kan.
[13] U tɛna gɛrɛ ne la ka sarakalasebaaya baara kɛ ne kɔrɔ tun. U tɛna gɛrɛ ne ka fɛn senumaw wala ne ka yɔrɔ senuma senuma la tun, nka u ka maloya kow ni u ka ko haramulenw doni na da u kun.
[14] Ne ye u sigi ka kɛ Alabatosoba kɔlɔsibaaw ni a baaraw bɛɛ kɛbaaw ye.›
[15] «Matigi Ala ko: ‹Sarakalasebaaw ta fan fɛ, Levi siya Zadɔk bɔnsɔn minw ye ne ka sariya mara ni kantigiya ye Israɛl bɔnsɔn ka fililiw waati la, olu de na gɛrɛ ne la ka u jɔ ne ɲɛ kɔrɔ ka ne ka baaraw kɛ ka kɛnw ni joliw lase ne ɲɛ kɔrɔ.
[16] Olu de na don ne ka yɔrɔ senuma kɔnɔ ka gɛrɛ ne ka tabali la ka baara kɛ ne ye. U na ne ka sariya mara ni kantigiya ye.
[17] Ni u bɛ don so kɔnɔ dukɛnɛ da fɛ tuma min na, lenfu fini ka kɛ u kan na. Ni u bɛ baara kɛ dukɛnɛ la ani Alabatosoba la tuma min na, sagasi kana kɛ u kan na.
[18] Lenfu fini jalamuguw ka kɛ u kun na, lenfu kurusi ka kɛ u la. U kana u cɛ siri ni fini sifa wɛrɛ ye min bɛ u wɔsi.
[19] Nka ni u bɛ taa kɛnɛma dukɛnɛ la mɔgɔw yɔrɔ, u ka u ka baarakɛ finiw bɔ u la ka olu bila bon senumaw kɔnɔ ka fini wɛrɛw don, walisa u kana maga mɔgɔw la ni u ka fini senumaw ye.
[20] U kana u kun di, u kana a to u kunsigi ka janya, nka u ka dɔ tigɛ ka bɔ a la.
[21] Ni sarakalasebaaw bɛ don so kɔnɔ dukɛnɛ la tuma min na, u si kana diwɛn min.
[22] U kana muso cɛ salen wala muso furu salen furu, nka u ka Israɛl siya npogotigi dɔ furu wala sarakalasebaa dɔ salen muso.
[23] ‹U ka ne ka mɔgɔw kalan fɛn senumaw ni fɛn nɔgɔlenw faranfasili la ka fɛn nɔgɔlenw ni fɛn jɛlenw faranfasi jira u la.
[24] U ka mɔgɔw ka kiri koɲɛnabɔ ka kiri tigɛ ka kɛɲɛ ni ne ka sariya sigilen ye. U ka ne ka ci fɔlenw ni ne ka ko latigɛlenw mara seli donw ko la ka ne ka lafiɲɛ donw saniya.
[25] U si kana maga mɔgɔ su la ka u yɛrɛw nɔgɔ, nka sarakalasebaa bɛ se ka maga a fa ni a ba ni a denkɛ ni a denmuso ni a balimakɛ ani a balimamuso furubali su ma.
[26] A saniyalen kɔ, a ka tile wolonwula bila sani a ka baara daminɛ.
[27] Ni a bɛ don yɔrɔ senuma ni so kɔnɔ dukɛnɛ la don min na ka baara kɛ yen, a ka saraka dɔ bɔ a yɛrɛ ka jurumu kosɔn.› Matigi Ala ko ten.
[28] ‹U na ciyɛn min sɔrɔ, o ye ne de ye. Aw kana niyɔrɔ si di u ma Israɛl bɔnsɔn cɛma. Ne bɛ na kɛ u ciyɛn ye.
[29] U na balo ni nili fɛnw ni jurumu yafa saraka ni jalaki yafa saraka sagaw ye. Fɛn o fɛn bilara Ala ye Israɛl bɔnsɔn cɛma, o na kɛ u ta ye.
[30] Suman kura kun fɔlɔw bɛɛ ni aw ka saraka nili fɛnw bɛɛ na kɛ sarakalasebaaw ta ye. Aw bɛɛ ka aw ka buuru kun fɔlɔ di sarakalasebaaw ma walisa duba ka to aw ka sow kan.
[31] Sarakalasebaaw kana jufa wala waradatɔ dun, kɔnɔ fara bagan kan.