[1] «E Hadamaden, i ka kiraya kɛ Israɛl kuluw ko la ko: ‹Israɛl kuluw, aw ka Matigi ka kuma lamɛn.›
[2] Matigi Ala ko: ‹Juguw y'a fɔ aw ma ko: «Ohɔɔ. Hali Israɛl bɔnsɔn ka kuluw kɔrɔlenw kɛra an ta ye.» ›
[3] I ka kiraya kɛ ko Matigi Ala ko: ‹Ne y'a ye ko mɔgɔw bɔra fan bɛɛ ka girin ka da Israɛl ka kuluw kan. U ɲɛ bɔra u fɛ, u bira siya wɛrɛw fanga kɔrɔ, olu ye u kɛ yɛlɛbɔ fɛn ni mafiɲɛyali fɛn ye.
[4] Ɔwɔ, i ka ne ka ci fɔ u ye ko: «Israɛl kuluw, ne, Matigi Ala bɛ layidu kuma min fɔ aw ko la, aw ka o lamɛn, kuluw ni tintinw ni ji woyo siraw ni kulu furancɛw ni yɔrɔ minw tiɲɛnna ani dugu lankolon minw cira ka kɛ yɛlɛbɔ fɛn ye siyaw fɛ.» ›
[5] Matigi Ala ko: ‹Ne dusu bɔlenba bɛ nin dafɛ siyaw kɔrɔfɔ, Edɔm sen b'a la, olu minw ɲagalilen ye ne ka jamana minɛ k'a kɛ u yɛrɛw ta ye k'a mafiɲɛya u dusu la walisa ka a fɛnw cɛ.›
[6] «O de kosɔn i ka kiraya kɛ Israɛl jamana ko la k'a fɔ kuluw ni tintinw ni ji woyo siraw ani jɛkɛnɛw ko la, ko ne, Matigi Ala ko: ‹Tiɲɛ la, ne keleyalen diminnen bɛ kuma, sabu siyaw ye aw tɔɔrɔ ka aw mafiɲɛya.›
[7] Ne, Matigi Ala ko: ‹Ne ye ne kali ko aw lamini siyaw fana na mafiɲɛya.
[8] Nka aw, Israɛl kuluw, aw yɔrɔw bɛɛ na datugu ni jiri furaw ye ka den kɛ ne ka mɔgɔw Israɛl bɔnsɔn ye sabu u na kɔsegin ka bɔ jɔnya la.
[9] Ayiwa, ne na ne hakili to aw la, aw na sɛnɛ, aw na dan.
[10] Ne na Israɛl ka mɔgɔw caya jamana yɔrɔw bɛɛ la. Mɔgɔw na sigi dugu kɔnɔ ko kura, katuguni dugu minw cira, olu na jɔ ko kura.
[11] Mɔgɔw ni baganw na caya yɔrɔw bɛɛ la. Mɔgɔw na caya kosɛbɛ, u na den caman sɔrɔ. Ne na mɔgɔw sigi aw kan i ko waati tɛmɛnnen kɔrɔw ka u fɛn tigiya ka tɛmɛn waati tɛmɛnnen kɔrɔw ta kan. O tuma la aw n'a dɔn ko ne ye Matigi de ye.
[12] Ne n'a to ne ka mɔgɔw Israɛl ka taama aw kan. Ɔwɔ, u na sigi i kɔnɔ, i na kɛ u ciyɛn ye. I tɛna u denw faga tun.›
[13] «Ayiwa Matigi Ala ko: ‹Israɛl dugukolo, a fɔra i ye ko i ye mɔgɔw dun k'u ka denmisɛnw faga.
[14] K'a daminɛ bi la, i tɛna mɔgɔw dun tun. I tɛna i kɔnɔ mɔgɔw denw faga tun.›
[15] Ne, Matigi Ala ko: ‹Ne tɛna a to i ka siyaw ka dɔgɔyali kuma mɛn tun. I tɛna majigin mɔgɔw ka tɔɔrɔ kosɔn tun. I tɛna a to i ka siya sen ka talon tun.›»
[16] Matigi ka kuma sera ne ma ko kura ko:
[17] «Hadamaden, Israɛl bɔnsɔn sigira u ka jamana kɔnɔ tuma min na, u y'a nɔgɔ ni u taama cogo juguw ni u ka kɛwalew ye. U taama cogo kɛra neɲɛ na i ko muso laadatɔ ka nɔgɔlenya.
[18] U ye jamana nɔgɔ ni mɔgɔ fagali ni u ka boliw ye, o de kosɔn ne ye ne ka dimiyaba bi u kan.
[19] Ne ye u jɛnsɛn siyaw cɛma. U yɛrɛkɛlen tun bɛ jamana caman kɔnɔ. Ne ye kiri tigɛ u kan ka kɛɲɛ ni u taama cogo ni u ka kɛwalew ye.
[20] U sigilen bɛ siya minw cɛma, u sera olu cɛma tuma min na, u ye ne tɔgɔ senuma nɔgɔ k'a sɔrɔ a fɔra u ye ko u ye Matigi ka mɔgɔw ye, ko u bɔra a ka jamana kɔnɔ.
[21] Ayiwa, ne tun b'a fɛ ka ne tɔgɔ senuma bonya, Israɛl ka so tun ye o min lagosi siyaw cɛma u taa yɔrɔw la.
[22] «O de kosɔn i k'a fɔ Israɛl ka so ye ko Matigi Ala ko: ‹Israɛl ka so, ne ma nin kɛ aw kosɔn, nka ne y'a kɛ ne tɔgɔ senuma kosɔn, aw ye o min nɔgɔ siyaw cɛma aw taa yɔrɔw la.›
[23] Matigi Ala ko: ‹Aw tun ye ne tɔgɔba min nɔgɔ ka aw sigilen to siyaw cɛma, ne na o saniya u cɛma. Ni ne tɔgɔ saniyara aw fɛ siyaw cɛma tuma min na, o siyaw n'a dɔn ko ne ye Matigi de ye.
[24] Ne na aw sama ka bɔ siyaw cɛma jamanaw bɛɛ la ka aw lajɛ yɔrɔ kelen na ka taa ni aw ye aw yɛrɛw ka jamana la.
[25] Ne na ji senuma bɔn aw kan ka aw saniya. Ne na aw saniya ka bɔ aw ka nɔgɔlenya kow bɛɛ la ka aw ka boliw bɔ aw cɛma.
[26] Ne na dusukun kura di aw ma ka ni kura don aw la. Dusukun gɛlɛn min bɛ aw kɔnɔ i ko kabakurun, ne na o bɔ yen ka dusukunɲuman di aw ma.
[27] Ne na ne Ni don aw la walisa aw ka ne ka ko latigɛlenw sira taama ka ne ka sariyaw mara ka u kɛ.
[28] Ne ye jamana min di aw bɛnbaw ma, aw na sigi o kɔnɔ. Aw na kɛ ne ka mɔgɔw ye, ne na kɛ aw ka Ala ye.
[29] Ne na aw hɔrɔnya ka bɔ aw ka nɔgɔlenya kow bɛɛ la. Ne na aw ka sɛnɛ fɛnw jiidi k'u caya. Ne tɛna kɔngɔ bila aw la tun.
[30] Ne n'a to jiriw ka den ani sɛnɛ fɛnw ka caya walisa aw kana mafiɲɛya kɔngɔ kosɔn siyaw cɛma tun.
[31] O tuma la aw hakili na jigin aw taama cogo juguw ni aw ka kɛwale bɛnbaliw la. Aw naɲigin aw yɛrɛw la, aw ka tilenbaliya ni aw ka ko haramulenw kosɔn.
[32] Aw k'a dɔn ko ne tɛna o kɛ aw kosɔn. Matigi Ala ko ten. Israɛl ka so, aw ka maloya ka aw kun suuli aw taama cogo jugu kosɔn.›
[33] «Matigi Ala ko: ‹Ni ne ye aw saniya ka aw ka tilenbaliya bɛɛ bɔ aw la tuma min na, o tuma la ne na aw ka duguw fa ni mɔgɔw ye, yɔrɔ cilenw na jɔ ko kura.
[34] Dugukolo tiɲɛnnenw na sɛnɛ, tɛmɛnbaaw tɛna dugukolo bilalen ye tun.
[35] U n'a fɔ ko nin dugukolo tiɲɛnnen kɛra i ko Edɛn nakɔ. Ko nin dugu minw tun cira ka lankolonya ka kɛ tomon ye, olu jɔra ka u barika bonya ka mɔgɔw sigi u kɔnɔ tun.
[36] O tuma la aw lamini siyaw n'a dɔn ko ne, Matigi de ye dugu cilenw jɔ ko kura ka dugukolo tiɲɛnnen sɛnɛ. Ne, Matigi ko ten. Ne na ne ka kuma fɔlen kɛ k'a dafa.›
[37] «Matigi Ala ko: ‹Ne na sɔn Israɛl ka so ka delili ma ka u dɛmɛ. Ne na u jaabi ka u bɔnsɔn caya i ko sagakulu.
[38] Dugu cilenw na fa mɔgɔkuluw la, u na caya i ko saraka sagaw, u na kɛ i ko sagakulu minw bɛ na Jerusalɛm san yɛlɛma seliw kama. O la, u n'a dɔn ko ne ye Matigi de ye.›»