[1] Matigi ka kuma sera ne ma, ko:
[2] «E, Hadamaden, i ka i labɛn ka kiri tigɛ mɔgɔ faga dugu Jerusalɛm kan. I ka a ka ko haramulenw bɛɛ jira a la.
[3] I k'a fɔ a ye ko, Matigi Ala ko: ‹Duguba min kɔnɔ mɔgɔw bɛ mɔgɔw faga a kɔnɔ walisa a halaki don ka tɛliya ka se, dugu min bɛ boliw dila a yɛrɛ ye ka a yɛrɛ nɔgɔ ni olu ye, o ye e de ye.
[4] I ye mɔgɔ minw faga, i jalakira o kosɔn. I ye boli minw dila, i nɔgɔra olu fɛ. I y'a to i si tilew ka dɔgɔya, i si san dafara. O de kosɔn ne ye i kɛ yɛlɛbɔ fɛn ye siyaw cɛma ka i kɛ nparabɔ fɛn ye jamanaw bɛɛ fɛ.
[5] I dafɛ jamanaw ni jamana janw bɛɛ na yɛlɛ bɔ i la, duguba nɔgɔlen min falen bɛ kunntaɲa kow la.
[6] A filɛ, Israɛl kuntigiw ye mɔgɔw faga i kɔnɔ ka u ka sebaaya jira.
[7] I kɔnɔ mɔgɔw bɛ faw ni baw dɔgɔya. I kɔnɔ mɔgɔw bɛ siginfɛw tɔɔrɔ ni fariya kow ye. I kɔnɔ mɔgɔw bɛ falatɔw ni muso cɛ salenw tɔɲɔ.
[8] I bɛ ne ka yɔrɔ senuma mafiɲɛya ka ne ka lafiɲɛ don nɔgɔ.
[9] I kɔnɔ mɔgɔw bɛ nkalon tigɛ walisa ka mɔgɔ faga. I kɔnɔ mɔgɔw bɛ boliw sɔn kuluw kan. I kɔnɔ mɔgɔw bɛ kakalaya kɛ.
[10] I kɔnɔ mɔgɔ dɔw dara u faw musow fɛ. I kɔnɔ mɔgɔ dɔw dara muso laadatɔw fɛ.
[11] I kɔnɔ mɔgɔ dɔw bɛ ko haramulen kɛ ka da u sigiɲɔgɔn muso fɛ. Dɔ wɛrɛw bɛ da u denkɛw musow fɛ ka u yɛrɛw nɔgɔ. Dɔ wɛrɛw bɛ u balimamusow tiɲɛn, u fa denmusow kɔni.
[12] Dɔw bɛ daguli fɛn minɛ ka nanbara kɛ ka mɔgɔ faga. I bɛ juru don i yɛrɛ nafa ni tɔnɔ jugu kosɔn, i bɛ fanga digi i sigiɲɔgɔn na ka i yɛrɛ fɛntigiya. I ɲinɛna ne kɔ.›» Matigi Ala ko ten.
[13] «Ayiwa, i ye binkanni fɛn min sɔrɔ ani i ye mɔgɔ fagali minw kɛ, ne bɛ ne bolo yigiyigi i ɲɛ kɔrɔ o kosɔn.
[14] Ni ne nana i kama don min na, i dusu sigilen na to wa? I bolo barikama na to wa? Ne, Matigi kumana, ne na ne ka fɔlen kɛ k'a dafa.
[15] Ne na i jɛnsɛn siyaw cɛma ka i jɛnsɛn jamana caman na ka i ka nɔgɔlenya kow ban ka bɔ i cɛma.
[16] I na i yɛrɛ nɔgɔ i fililiw kosɔn siyaw ɲɛ na. I n'a dɔn ko ne ye Matigi de ye.»
[17] Matigi ka kuma sera ne ma, ko:
[18] «Hadamaden, Israɛl ka so kɛra neɲɛ na i ko nɛgɛbo. U bɛɛ kɛra nsiranɛgɛ ni letɛn nɛgɛ ani nɛgɛfin ni ntilɛku ye daganin kɔnɔ. U kɛra warijɛbo ye.
[19] «O de kosɔn ne, Matigi Ala ko, aw kɛra i ko nɛgɛbo, o de y'a to ne na aw lajɛ Jerusalɛm dugu cɛmancɛ la.
[20] Warijɛ ni nsiranɛgɛ ni nɛgɛfin ni ntilɛku ani letɛn nɛgɛ bɛ kɛ daga kɔnɔ ka fan fyɛ u la ka u yeele cogo min na, ne diminnen dusu bɔlenba na aw lajɛ yɔrɔ kelen na ka aw fili daga kɔnɔ ka aw yeele o cogo la.
[21] Ne na aw lajɛ ka ne ka dimiya tasuma fyɛ aw kɔrɔ. Aw na yeele Jerusalɛm dugu cɛmancɛ la.
[22] Warijɛ bɛ yeele daga kɔnɔ cogo min na, aw na yeele nin dugu kɔnɔ o cogo la. Aw n'a dɔn ko ne, Matigi ye ne ka dimiya bi aw kan.»
[23] Matigi ka kuma sera ne ma ko kura ko:
[24] «Hadamaden, i k'a fɔ Israɛl bɔnsɔn ye ko u ka jamana bɔlen bɛ dugukolo fɛ min ma sanji sɔrɔ. U na halaki ne ka dimiya fɛ i ko dugukolo jintan.
[25] U ka kiraw bɛ jɛ siri a kɔnɔ mɔgɔw kama i ko waraba konbotɔ bɛ a ka fɛn minɛlen farafara cogo min na. U bɛ mɔgɔw faga ka mɔgɔ bolo nafolo cɛ ka muso cɛ salenw caya dugu kɔnɔ.
[26] U ka sarakalasebaaw wulila ne ka sariya kama ka ne ka fɛn senumaw nɔgɔ. U tɛ faranfasi jira mɔgɔw la. U tɛ ne ka lafiɲɛ don jate, ne nɔgɔra u cɛma.
[27] Dugu kɔnɔ faamaw kɛra i ko suruku jɛni min bɛ farafarali kɛ, u tɛ miiri fɛn wɛrɛ la fagali kɔ, u bɛ mɔgɔ bɔnɛ a ni la ka u yɛrɛw fɛntigiya.
[28] U ka kiraw bɛ u ka tilenbaliya kow datugu ni laso ye. U ka yeli fɛnw ye lafili fɛnw ye. U bɛ kiraya kuma nkalonmaw fɔ, ko: ‹Matigi y'a fɔ› k'a sɔrɔ ne ma kuma u fɛ.
[29] Jamana kɔnɔ mɔgɔw bɛ fariya kow ni binkanni kow kɛ ka faantanw ni kɔlibaatɔw tɔɔrɔ ka tilenbaliya sira taama ka siginfɛw cɔngɔ u sen kɔrɔ.
[30] Ne ye mɔgɔ dɔ ɲini u cɛma min bɛ kogo lawuli ka i jɔ kogo sɔgɔ yɔrɔw la ne ɲɛ kɔrɔ jamana ka lafiya kama walisa ka u kisi halakili ma, nka ne ma o mɔgɔ si sɔrɔ.»
[31] O de kosɔn Matigi Ala ko: «Ne na ne ka dimiya bi u kan ka u jeni ni ne dusubɔ tasuma ye. Ne na u sara u jogo jugu kosɔn.»