[1] Matigi ka kuma sera ne ma, ko:
[2] «Hadamaden, muso fila tun bɛ yen, u fila bɛɛ bɛ ba la.
[3] Olu ye jatɔya kɛ Misira. U npogotigilama ye u yɛrɛw nɔgɔ. U sin dogira yen, u npogotigilama disi mɔmɔna yen.
[4] Kɔrɔmuso tɔgɔ ko Ohola, a dɔgɔmuso tɔgɔ ko Oholiba. Olu tun ye ne taw ye. U ye denkɛw ni denmusow bange. Ohola ye Samari ye, Oholiba ye Jerusalɛm ye.
[5] «Ohola ye kanntanya kɛ ne la. A sigiɲɔgɔn Asirikaw jarabi y'a minɛ, a ye olu dɔw kɛ a kanuɲɔgɔnw ye.
[6] Olu ka gɔfɛrɛnɛrɛw ani u ka kuntigiw bɛ fini bagalen don u ka baara kosɔn. Kamalen cɛɲiw don, yɛlɛnkan sotigiw don, u bɛ so dɔn.
[7] A ye jatɔya kɛ Asiri kuntigiw fɛ. Cɛ minw jarabi y'a minɛ, a y'a yɛrɛ nɔgɔ ni olu ni u ka boliw ye.
[8] A ye jatɔya min kɛ Misira kabini a denmisɛnma, a ma o dabila. U ye a npogotigilama disi mɔmɔ, u ye kakalaya kɛ a fɛ kosɛbɛ.
[9] O de kosɔn ne ye Samari don a kanubaa Asirikaw bolo, olu minw jarabi y'a minɛ.
[10] Olu y'a farilankolonya ka a denkɛw ni a denmusow minɛ ka a yɛrɛ faga ni npan ye. Kiri min tigɛra Samari kan, o kɛra hakili jigin fɛn ni taamashyɛn jira fɛn ye musow cɛma.
[11] «A dɔgɔmuso Oholiba ye a ka ko kɛlenw bɛɛ ye nka o ka ko kɛlenw juguyara ka tɛmɛn a ta kan. O ye kakalaya kɛ ka tɛmɛn a kɔrɔmuso kan.
[12] A dafɛ jamana Asirikaw nege y'a minɛ. Olu ka gɔfɛrɛnɛrɛw ni u ka kuntigiw ye kamalen saramaw masirilen cɛɲiw ye. U yɛlɛlen bɛ sow kan, u bɛ sow dɔn, olu jarabi y'a minɛ.
[13] Ne y'a ye ko ale fana y'a yɛrɛ nɔgɔ, ko u fila bɛɛ ye sira kelen taama.
[14] A ye Kaldekaw ka cɛw jaw dilalen ye ni bɔgɔ bilenman ye kogo la minkɛ, a ye kakalaya kɛ kosɛbɛ ka tɛmɛn fɔlɔ ta kan.
[15] Olu cɛ sirilen tun bɛ ni cɛ sirilanw ye. Jalamuguɲɛ sifa caman melekelen tun bɛ u kun na. U bɛɛ bɔlen bɛ kɛlɛkɛ cɛw fɛ. U bɔlen bɛ u faso Kalde jamana duguba Babilonɛkaw fɛ.
[16] A ye u ye tuma min na, u jarabi y'a minɛ. A ye cidenw ci ka taa Kalde jamana la.
[17] Babilonɛkaw nana ka jɛ a fɛ a da yɔrɔ la k'a nɔgɔ ni u ka ko haramulenw ye. Ale fana nɔgɔra u fɛ. O kɔ, a banna u la.
[18] A ye a ka nɔgɔlenya jira kɛnɛkan k'a farilankolon to. Ne banna a la i ko ne banna a balimamuso la cogo min na,
[19] sabu a ye kakalaya kɛ kosɛbɛ. A hakili jiginna a ka denmisɛnya kakalaya waati la, a ye o min kɛ k'a to Misira.
[20] O kakala minw bɛ i ko falikɛ farinw, ni u lawaw bɛ i ko sokɛ lawaw, olu jarabi y'a minɛ.
[21] «Ayiwa, Misirakaw ye i npogotigilama disi mɔmɔ ka i sin dogi cogo min na, i hakili jiginna o ɲɔgɔn kakalaya kow la tun.»
[22] Matigi Ala ko: «Oholiba, o de kosɔn, i banna i kanubaa minw na, ne na olu bɛɛ lawuli ka na i kama. Ne na u lana ka bɔ fan bɛɛ fɛ.
[23] Babilonɛkaw ni Kalde jamanadenw bɛɛ, kuntigiw ni mɔgɔbaw ni faamaw ani Asiri jamanadenw bɛɛ, kamalenɲumanw ni gɔfɛrɛnɛrɛw ani kuntigiw ani mɔgɔbaw bɛɛ, u yɛlɛlen bɛ sow kan.
[24] U bɛ bɔ saheli yanfan fɛ ka na i kama ni kɛlɛkɛ minanw ni yɛlɛnkan sotigiw ni kɛlɛkɛ wotorow ani jamaba ye. U ni u ka nɛgɛ bɛnnanw ni u ka nɛgɛ fugulaw bɛ bɔ fan bɛɛ la ka na. Ne na kiri ko don u bolo. U na kiri tigɛ i kan ka kɛɲɛ ni u ka sariya ye.
[25] Ne na ne ka keleyaba bi i kan. U na i minɛ ni fariya ye ka i nun ni i tulow tigɛ. I ka mɔgɔ tɔ minw tora, u na olu faga ni npan ye. U na i denkɛw ni i denmusow minɛ. Mɔgɔ tɔ minw mana to i kɔnɔ, olu na jeni ni tasuma ye.
[26] U na i wɔrɔn ka i ka masiri fɛnɲumanw bɛɛ bɔsi i la.
[27] Ne na i ka ko jugu ban ani i ka kakalaya ko minw bɔra Misira la. I ɲɛ tɛna bɔ u fɛ tun. I hakili tɛna jigin Misira ko la tun.»
[28] Matigi Ala ko: «I bɛ minw koniya ani i banna minw na, ne na i don olu bolo.
[29] U na i koniya ka i minɛ ko juguya ka i bolo fɛnw bɛɛ cɛ ka i wɔrɔlen farilankolon to. I lebu na jira i ka nɔgɔlenya ni i ka ko haramulenw kosɔn.
[30] U na o kow kɛ i la sabu i ye jatɔya kɛ siyaw fɛ ka i yɛrɛ nɔgɔ ni u ka boliw ye.
[31] I taamana i balimamuso ka siraw fɛ, o de kosɔn ale ye minni kɛ jifilen min na, ne n'a to i ka minni kɛ o fana la.»
[32] Ayiwa Matigi Ala ko: «I na minni kɛ i balimamuso ka jifilen na, o ka dun, a ka bon. O de kosɔn mɔgɔw na yɛlɛ bɔ i la kosɛbɛ ka i npara bɔ. O jifilen kɔnɔ fɛnw ka ca.
[33] Ɲɛnamini niɲɛnasisi na i sɔrɔ, sabu hakiliɲaami ni halakili jifilen don, i balimamuso Samari ka jifilen don.
[34] I na a kɔnɔ fɛn min k'a ban, k'a ci ni i ɲinw ye ka a waloɲimi ka i sin farafara, k'a masɔrɔ ne, Matigi Ala ko ten.»
[35] Matigi Ala ko: «Iɲinɛna ne kɔ ka ne fili i kɔ fɛ, o de y'a to i ka to i ka kakalaya ni i ka jatɔya tɔɔrɔ doni kɔrɔ.»
[36] Matigi y'a fɔ ne ye ko: «Hadamaden, yala i tɛna kiri tigɛ Ohola ni Oholiba kan wa? I ka u ka jatɔya kow jira u la.
[37] U ye jatɔya kɛ, mɔgɔ fagalaw don. U ye jatɔya kɛ u ka boliw fɛ. U ye den minw bange ne fɛ, u ye olu jeni tasuma la boliw ye.
[38] U ye min kɛ ne la, o dɔ wɛrɛ filɛ nin ye. U ye ne ka yɔrɔ senuma nɔgɔ ka ne ka lafiɲɛ don tiɲɛn don kelen na.
[39] U ye u denw kɛ saraka fagataw ye u ka boliw ye tuma min na, u donna ne ka yɔrɔ senuma kɔnɔ o don kelen na k'a nɔgɔ. U ye min kɛ ne batosoba kɔnɔ, o filɛ o ye.
[40] «Ka fara o kan, i ye ci bila ka jamana jan cɛw wele ka na. A filɛ, olu nana. I ye i yɛrɛ ko ka kale da i ɲɛ kɔrɔ ka i ka masiri fɛnw don i la olu kosɔn,
[41] ka i sigi dalanɲuman kan. Tabali labɛnnen tun bɛ i ɲɛ fɛ. I ye ne ka wusulan suma duman ni ne ka tulu suma dumanw sigi o tabali kan.
[42] Jamabaɲɛnajɛkan bɔra dugu kɔnɔ. Cɛ dɔw tun bɛ o jamaba cɛma minw nana ka bɔ Saba kungokolon kɔnɔ. Olu ye bololanɛgɛ don o balimamuso fila bolo la ka kunna jalaɲuman siri u kun na.
[43] O la muso min mɛnna jatɔya la, ne y'a fɔ o ko la ko yala a na to ka jatɔya kɛ u fɛ halibi wa?
[44] U donna a fɛ i ko mɔgɔ bɛ don jatɔmuso fɛ cogo min na. U donna o jatɔmusow Ohola ni Oholiba fɛ ten.
[45] Cɛ tilennenw na kiri tigɛ o musow kan ka kɛɲɛ ni muso jatɔyakɛlaw ni mɔgɔ fagamuso ka kiri tigɛ cogo ye, katuguni jatɔmusow don. Mɔgɔ fagalaw don.»
[46] Ayiwa Matigi Ala ko: «Ne na jamaba ci u kama. Olu na u lasiran ka bi u kan.
[47] O jamaba na u bon ni kabakurunw ye ka u tigɛtigɛ ni npan ye ka u denkɛw ni u denmusow faga ka u ka sow jeni ni tasuma ye.
[48] Ne na aw ka kakalaya kow ban ka bɔ jamana kɔnɔ. Musow bɛɛ na lasɔmi ko u kana aw taama cogo ladɛgɛ.
[49] Aw ka tilenbaliya jalaki na bi aw yɛrɛw kan. Aw na aw ka boli batoli sara sɔrɔ. Aw n'a dɔn ko ne ye Matigi Ala de ye.»