[1] Matigi ka kuma sera ne ma ko:
[2] «Hadamaden, Israɛl ka kira minw bɛ kiraya kɛ ka kɛɲɛ ni u yɛrɛw ka miiriliw ye, i ka kiraya kɛ olu kama ko u ka Matigi ka kuma lamɛn.»
[3] Matigi Ala ko: «Kira hakilintan minw bɛ tugu u yɛrɛw dusukun na miiriliw nɔ fɛ k'a sɔrɔ foyi ma jira u la, bɔnɛ bɛ olu ye.
[4] Israɛl, i ka kiraw kɛra i n'a fɔ kungo wulu minw bɛ yɔrɔ mɔgɔntanw na.
[5] U ma taa so lamini kogo sɔgɔ yɔrɔw labɛn, u ma Israɛl ka so lamini ni kɛlɛ kunbɛn so ye walisa aw jɔlen ka se ka to kɛlɛ la Matigi ka dimiya don na.
[6] U ka yeli fɛnw bɛ u lafili, u ka kiraya kumaw ye nkalon ye. U b'a fɔ ko: ‹Matigi kumana,› k'a sɔrɔ Matigi ma u ci. U jigi bɛ u ka kiraya kumaw dafali kan.
[7] Aw ye fɛn minw ye, olu ye lafili fɛnw ni kiraya kuma nkalonmaw ye, aw minw b'a fɔ ko: ‹Matigi kumana,› k'a sɔrɔ ne ma kuma.»
[8] O de kosɔn Matigi Ala ko: «Aw bɛ nkalon kumaw lamɛn, aw ka yeli fɛnw ye lafili fɛnw ye, o de kosɔn ne bɛ aw kama.» Matigi Ala ko ten.
[9] «Kira minw bɛ yeli fɛn fufafuw ye ka nkalon kumaw fɔ, ne bolo na se olu ma. U tɛna jate ne ka mɔgɔ dɔw ye tun. U tɔgɔ sɛbɛnnen tɛna sɔrɔ Israɛl bɔnsɔn ka buruju sɛbɛn kɔnɔ. U tɛna don Israɛl ka jamana kɔnɔ tun. Aw n'a dɔn ko ne ye Matigi Ala de ye.
[10] «U bɛ ne ka mɔgɔw lafili, ko: ‹Hɛrɛ, hɛrɛ› k'a sɔrɔ hɛrɛ si tɛ yen. Ne ka mɔgɔw bɛ kogo jɔ, olu bɛ a mun ni laso ye.
[11] U ye kogo min datugu ni laso ye, i k'a fɔ o ko la ko o kogo na bi. Sanjiba bɛ na, sanbɛlɛkisɛw na bi, fiɲɛba na ci.
[12] Ni o kɛra, kogo na bi. O tuma la u tɛna ɲininka ko: ‹Aw ye laso kɛ ka kogo min mun, o bɛ min?›»
[13] O de kosɔn Matigi Ala ko: «Ne dusu bɔlenba na halakili fiɲɛba ci. Ne diminnenba na sanjiba ni sanbɛlɛbaw ci ka kogo bɛɛ tiɲɛn.
[14] Aw ye kogo min mun ni laso ye, ne na o ci ka o bi duguma ka a jusigilanw bɔ kɛnɛkan. O kogo na bi, a bitɔ na aw halaki. Aw n'a dɔn ko ne ye Matigi de ye.
[15] «Ne na ne ka dimiya lawuli kogo ni a munbaaw kama. Ne n'a fɔ aw ye ko: ‹O kogo tɛ yen tun.› Minw y'a mun ni laso ye, olu fana tɛ yen tun.
[16] Israɛl ka kira minw bɛ kiraya kɛ Jerusalɛm ko la ka hɛrɛ ko fɔ a ko la k'a sɔrɔ hɛrɛ tɛ yen, Matigi Ala ye nin fɔ olu kama.
[17] «Hadamaden, Israɛl muso minw bɛ kiraya kɛ ka u yɛrɛw kɔnɔna kow fɔ, i ka i ɲɛ sin olu ma ka kiraya kɛ u kama
[18] k'a fɔ u ye ko: ‹Musow, aw minw bɛ bolola sɛbɛnw tu ka musɔrɔ siri mɔgɔw ɲɛda la, mɔgɔ surun fara mɔgɔ jan kan, walisa olu ka mɔgɔw niw ɲini, aw na ne ka mɔgɔw niw ɲini ka aw yɛrɛɲɛnama to wa? Bɔnɛ na bi aw kan.
[19] Aw ye ne tɔgɔ tiɲɛn ne ka mɔgɔw cɛma boloɲɛ fila orje ni buuru kunkurunw dama kosɔn. Mɔgɔ minw man kan ka faga, aw bɛ olu faga, minw ɲɛnama man kan ka to, aw bɛ olu ɲɛnama to. O cogo la ne ka mɔgɔw, minw bɛ aw ka nkalon lamɛn, aw bɛ olu lafili.›»
[20] O de kosɔn Matigi Ala ko: «Ne bɛ aw bolola sɛbɛnw kama. Ne na olu tigɛ ka bɔ aw bolow la. Aw tun ye mɔgɔ minw minɛ janw na, ne na olu hɔrɔnya.
[21] Ne na aw ka musɔrɔw fara ka ne ka mɔgɔw hɔrɔnya. U tɛna kɛ i ko fɛn minɛlen aw bolo tun. Aw n'a dɔn ko ne ye Matigi de ye.
[22] «Aw ye mɔgɔ tilennenw dusu kasi ni aw ka nkalonw ye k'a sɔrɔ ne ma u ɲɛnasisi. Aw ye mɔgɔ juguw ja gɛlɛya walisa u kana u ka sira juguw bila ka a ni kisi kaɲɛnamaya.
[23] O de kosɔn aw tɛna lafilili yeli fɛn si ye tun. Aw tɛna kiraya kuma si fɔ tun. Ne na ne ka mɔgɔw tila aw la. Aw n'a dɔn ko ne ye Matigi de ye.»