[1] Matigi ka kuma sera ne ma ko:
[2] «Mun y'a to aw bɛ nin ntalen da Israɛl bɔnsɔn ka jamana ko la, ko: ‹Faw ye rezɛn geren dun, nka u denw ɲinw kumuna?›»
[3] Matigi Ala ko: «Neɲɛnama tɔgɔ kosɔn, aw tɛna segin o ntalen kan Israɛl bɔnsɔn ko la tun.
[4] Ɔwɔ, mɔgɔ bɛɛ ni ye ne ta ye. Fa ni ye ne ta ye cogo min na, den ni ye ne ta ye ten. Mɔgɔ min bɛ jurumu kɛ, o de na sa.
[5] «Mɔgɔ tilennen cogo filɛ nin ye, a bɛ tiɲɛ fɔ ka tilennenya sira taama.
[6] A tɛ sɔn ka kuluw kan saraka dumuni kɛ, a tɛ sɔn ka taa Israɛl bɔnsɔn ka boliw batosow kɔnɔ. A tɛ jɛ a mɔgɔɲɔgɔn muso fɛ, a tɛ da muso laadatɔ fɛ.
[7] A tɛ mɔgɔ si tɔɲɔ wala ka mɔgɔ ka fɛn sonya. A bɛ tɔnɔmada fɛn kɔsegin a tigi ma. A bɛ a ka dumuni dɔ di kɔngɔtɔw ma ka a ka dulɔki kɛ ka fɛɛrɛtɔ fɛɛrɛ bɔ.
[8] A tɛ juru don tɔnɔ kama, a tɛ tɔnɔ jugu minɛ. A sen tɛ don tilenbaliya ko si la, a bɛ kiri tigɛ mɔgɔ niɲɔgɔn cɛ ni tilennenya ye.
[9] A bɛ ne ka ko latigɛlenw ni ne ka sariya sira taama ka o bɛɛ kɛ ni kantigiya ye. O tigi ye mɔgɔ tilennen de ye. Siga t'a la, o tigi naɲɛnamaya.» Matigi Ala ko ten.
[10] «Nka ni o tigi ye denkɛ jugu dɔ bange min bɛ mɔgɔ faga ka tilenbaliya kow kɛ a balimaw la,
[11] k'a sɔrɔ a fa ma o si kɛ, ni o den taara ka kuluw kan saraka dumuni kɛ, ni a jɛra a sigiɲɔgɔn muso fɛ,
[12] ni a ye ɲɛnibaatɔw ni faantanw tɔɲɔ, ni a ye binkanni kɛ, ni a ye a yɛrɛ di boli batoli ma ka o ko haramulenw kɛ,
[13] ni a ye juru don tɔnɔ kama ka tɔnɔ jugu minɛ, yala o tigiɲɛnama na to wa? Ayi, a ɲɛnama tɛna to. A ye o ko haramulen minw bɛɛ kɛ, olu kosɔn a na sa, siga t'a la. A joli hakɛ na kɛ a yɛrɛ kun.
[14] «Nka ni denkɛ dɔ bɛ a fɛ, ni o ye a fa ka jurumu kɛlenw bɛɛ dɔn, ni a ma sɔn ka o bɔɲɔgɔnkow kɛ,
[15] ni kuluw kan saraka dumuni ma diya a ye, ni a ma taa Israɛl ka boli batosow kɔnɔ, ni a ma jɛ a sigiɲɔgɔn muso fɛ,
[16] ni a ma mɔgɔ si tɔɲɔ, ni a ma mɔgɔ si ka fɛn minɛ juru kun kɔrɔ, ni a ma binkanni kɛ, ni a ye a ka dumuni fɛn dɔ di kɔngɔtɔw ma ka fɛɛrɛtɔw fɛɛrɛ bɔ,
[17] ni a ma a sen don tilenbaliya ko si la, ni a ma juru don tɔnɔ kama ka tɔnɔ jugu minɛ, ni a ye ne ka ci fɔlenw ni ne ka ko latigɛlenw sira taama, o denkɛ tɛna sa a fa ka tilenbaliya kosɔn. A ɲɛnama na to, siga t'a la.
[18] A fa min ye a mɔgɔɲɔgɔn tɔɔrɔ ka bi a balimaw kan ka ko bɛnbali kɛ a ka mɔgɔw la, o de na sa a yɛrɛ ka tilenbaliya kosɔn.
[19] «Aw b'a fɔ ko mun kosɔn fa ka tilenbaliya doni man kan ka da a den kun? Ni denkɛ ye tiɲɛ fɔ ka tilennenya kow kɛ ka ne ka ko latigɛlenw bɛɛ sira taama ka u kɛ, a naɲɛnamaya, siga t'a la.
[20] Mɔgɔ min bɛ jurumu kɛ, o de na sa. Fa ka tilenbaliya doni tɛna da a denkɛ kan, denkɛ ka tilenbaliya doni tɛna da a fa kan. Mɔgɔ tilennen ka tilennenya na jate a yɛrɛ kun. Mɔgɔ jugu ka juguya na da a yɛrɛ kun.
[21] «Ni mɔgɔ jugu yɛlɛmana ka a ka jurumu dabila, ni a ye ne ka ko latigɛlenw sira taama ka tiɲɛ fɔ ka tilennenya kow kɛ, siga t'a la a ɲɛnama na to, a tɛna sa.
[22] O tigi ka sariya tiɲɛnni kow si tɛna jate a kun, nka a naɲɛnamaya a ka tilennenya sira taamali kosɔn.»
[23] Matigi Ala ko: «Yala mɔgɔ jugu saya ko ka di ne ye wa? Ni a yɛlɛmana ka a ka sira juguw bila kaɲɛnamaya, o de ka di ne ye kosɛbɛ.
[24] «Nka ni mɔgɔ tilennen ye a ka tilennenya sira bila ka juguya sira taama ka mɔgɔ jugu ka ko haramulenw bɛɛ kɛ, a ɲɛnama na to wa? Ne hakili tɛna to a ka kɛwale tilennen si la, nka a na sa a ka jurumu kɛlenw kosɔn.
[25] «Aw b'a fɔ fana ko: ‹Matigi ka sira tilennen tɛ.› Israɛl ka so, aw ka ne lamɛn kosɛbɛ. Ne ka sira ma tilen wa? Aw ka siraw tɛ sira tilenbaliw ye wa?
[26] Ni mɔgɔ tilennen yɛlɛmana ka a ka tilennenya sira bila ka tilenbaliya sira taama, a na sa nka a na sa a ka tilenbaliya kosɔn.
[27] Ni mɔgɔ jugu yɛlɛmana ka a ka sira jugu bila ka tiɲɛ fɔ ka tilennenya sira taama, a naɲɛnamaya.
[28] Ni a ye hakili sɔrɔ ka a ka sariya tiɲɛn kow dabila, siga t'a la, a ɲɛnama na to, a tɛna sa.
[29] O bɛɛ n'a ta Israɛl ka so b'a fɔ ko: ‹Matigi ka sira tilennen tɛ.› Israɛl ka so, ne ka siraw ma tilen wa? Aw ka siraw tɛ sira tilenbaliw ye wa?
[30] «O de kosɔn, Israɛl ka so, ne na kiri tigɛ aw bɛɛ kelen-kelen kan ka kɛɲɛ ni aw ka kɛwalew ye.» Matigi Ala ko ten. «Aw ka yɛlɛma ka aw ka sariya tiɲɛn kow dabila, walisa tilenbaliya kana kɛ aw halaki sababu ye.
[31] Aw ye sariya tiɲɛn ko minw kɛ ka aw yɛrɛw jalaki, a' ye olu fili yɔrɔ jan ka dusukun kura ni ni kura don aw kɔnɔ. Israɛl ka so, mun kosɔn aw b'a fɛ ka halaki?»
[32] Matigi Ala ko: «Tiɲɛ la, mɔgɔ si saya man di ne ye fewu. A' ye ko jugu dabila kaɲɛnamaya.»