[1] Matigi ka kuma sera ne ma ko:
[2] «Hadamaden, i ka maɲumatɔkan fɔ Tir dugu kosɔn.
[3] I k'a fɔ Tir ye, ko: ‹E min sigilen bɛ kɔgɔji la ka kɛ gunw kan mɔgɔw caman ka jagokɛ yɔrɔ ye,› Matigi ko: ‹E Tir, i y'a fɔ ko i cɛɲɛ dafalen bɛ,
[4] ko i sigilen bɛ kɔgɔji cɛma, ko minw ye i jɔ, olu ye i kɛ dugu sarama ye.
[5] U ye i jiri fɛrɛnw dila ni Senir sipre jiri ye. U ye Liban sedere jiri tigɛ ka o kɛ i ka kurun kunna fini siri jiri ye.
[6] U ye i ka jufaw dila ni Basan sen jiri ye, ka i kɔnɔ sigilanw dila ni Kitim buis jiriw ye ka samaɲinw da u kan.
[7] Misira lenfu fini sɔgɔlenw kɛra i ka kurun kunna birifiniw ye, ka kɛ i ka darapo ye. Elisa bagani fini ni lomaasa fini kɛra i ka bugu dila finiw ye.
[8] Sidɔnkaw ni Arvadkaw kɛra jufa donnaw ye. E Tir, i yɛrɛ ka hakilitigiw kɛra kurun bolilaw ye.
[9] Gebal cɛkɔrɔbaw ani a maɲɛrɛ dɔnnaw kɛra i ka kurun tiɲɛn yɔrɔ dilabaaw ye. Kɔgɔji kan kurunw ni u kɔnɔ baarakɛlaw bɛɛ bɛ na i sɛgɛrɛ ka aw ka jago fɛnw falenɲɔgɔn na.›
[10] «Persekaw ni Lidikaw ni Libikaw kɛra i ka kɛlɛkɛ cɛw ye. U ye u ka nɛgɛ bɛnnanw ni u ka nɛgɛ fugulaw dulon i kɔnɔ ka i tɔgɔ bonya.
[11] Arvadkaw ni i yɛrɛ ka kɛlɛbolow tun bɛ i lamini kogow kɔlɔsi. U ka kɛlɛkɛ cɛ farinw ye i ka sankansow kɔlɔsi. U ye u ka nɛgɛ bɛnnanw dulon ka i ka kogow lamini ka kɛ i masiri fɛn dafalen ye.
[12] «Tarsisikaw taara ni jago fɛn sifa bɛɛ ye i fɛ yen, nafolow ni balo ni warijɛ ni nɛgɛfin ni nɛgɛjɛ ni ntilɛku.
[13] Javankaw ni Tubalkaw ani Mesɛkkaw taara ni jago fɛnw ye ka jɔnw ni dɛɲɛ minanw falen i ka jago fɛnw na.
[14] Togarmakaw taara ni u ka sow ni sotigiw ni falibaw ye i ka suguw la ka u falen i ka jago fɛnw na.
[15] Dedankaw kɛra i ka sannikɛlaw ye ka bɔ gunw caman na ka i ka jago fɛnw falen samaɲinw ni jiri gɛlɛnmaw la.
[16] Sirikaw taara fɛn caman san i ka suguw la ka olu falen kabakurun sɔngɔ gɛlɛnw ni bagani fini sɔgɔlen ni lenfu fini ni korayi ni rubi kabakurunw sɔngɔ gɛlɛnw na.
[17] Juda bɔnsɔn ni Israɛl bɔnsɔn fana tun bɛ taa Minit alikama falen takula ni di ni tulu ni munni tulu la.
[18] Damasikaw tun bɛ taa ni jago fɛn caman ye ka olu falen i ka nafolo sifa caman na ani Helbon diwɛn ni sagasi jɛman.
[19] Vedankaw ni Javankaw ka bɔ Uzal, olu tun bɛ taa ni numuya nɛgɛw ye i ka suguw la ani kase suma duman ni kala suma duman, ka olu falen i ka jago fɛnw na.
[20] Dedankaw tun bɛ taa ni so kɔ la da finiɲuman sɔngɔ gɛlɛnw ye i fɛ yen.
[21] Arabi jamana mɔgɔw ni Kedar kuntigiw tun bɛ taa ni sagadenw ni sagajigiw ni bakɔrɔw ye ka u feere i fɛ yen.
[22] Seba ni Raama jagokɛlaw tun bɛ taa ni tulu suma duman sifa bɛɛ ani kabakurun sɔngɔ gɛlɛnw sifa bɛɛ ni sanu ye i ka suguw la ka u falen i ka jago fɛnw na.
[23] Haran ni Kane ani Edɛn duguw ani Sebakaw ni Asirikaw ni Kilmadkaw ka sannikɛlaw caman tun ye i kɔnɔ jagokɛlaw ye.
[24] Olu tun bɛ taa ni jago fɛnɲumanɲumanw ye, bagani fini dulɔkiba sɔgɔlenw ni tapiɲɛ sifa caman ani jurukisɛ defelenw ani sedere jiri fɛrɛnw.
[25] «Tarsisi jikankurunw tun bɛ taa ni i ka jagokɛ fɛnw ye. I barika tun ka bon, se tun bɛ i ye ka tɛmɛn kɔgɔji dala jamanaw bɛɛ kan.
[26] «I ka jufa donnaw taara ni i ye jiba kan, kɔrɔnfɛ fiɲɛ ye i tiɲɛn kɔgɔji kan.
[27] I ka nafolow ni i ka jago fɛnw, i ka jagokɛlaw ani i ka kurun kɔnɔ baarakɛlaw ni i ka kurun bolilaw ani kurun dilabaaw ani minw bɛ jago kɛ i fɛ, ani i ka kɛlɛkɛ cɛw ni jamaba min bɛ i ka bɔlɔnw na, olu bɛɛ na bi kɔgɔji la i halaki don na.
[28] I ka kurun bolilaw kulokan na i lamini yɔrɔw bɛɛ yɛrɛyɛrɛ.
[29] Jufa donnaw bɛɛ ni kurun kɔnɔ baarakɛlaw bɛɛ ani kɔgɔji kan kurun bolilaw bɛɛ na bɔ u ka kurunw kɔnɔ ka taa gwele kan.
[30] Olu bɛɛ naɲɛnasisi i kosɔn, ka kasikanba bɔ i kosɔn. U na buguri seri u kun na ka u kolonkolon bugurijɛ la.
[31] U na u kun di i kosɔn ka cafu fini don. U niw tɔɔrɔli kosɔn, u ɲɛnasisilen na kasiba kɛ i kosɔn.
[32] U degunnen na maɲumatɔkan fɔ i kosɔn, ko: ‹Tir, dugu min tun bɛ kɔgɔji da la, o bɔɲɔgɔnko bɛ min? Tir, dugu min halakira kɔgɔji cɛmancɛ la, o bɔɲɔgɔnko bɛ min?
[33] I ka jago fɛnw tun bɛ kɔgɔji la tuma min na, I ye siya caman wasa. I ye dugukolo kan masakɛw fɛntigiya ni i ka nafolo ni i ka jagokɛ fɛn caman caman ye.
[34] Ayiwa, i tiɲɛnnen filɛ kɔgɔji kɔnɔ sisan, ka jigin fo kɔgɔji dun na. I ka jago fɛnw ani i tun bɛ jamaba min dɔn, olu bɛɛ halakira i fɛ.
[35] Kɔgɔji dala jamana mɔgɔw bɛɛ kabakoyara i ko la. U ka masakɛw ja tigɛra, u ɲɛdaw cogo yɛlɛmana.
[36] Jamana wɛrɛ jagokɛlaw na dala file fyɛ i kosɔn. I halakira, i tɛna kɛ yen tun abada.›»