[1] «Hadamaden, i ka biriki kelen ta ka o bila i ɲɛ kɔrɔ ka Jerusalɛm dugu jaɲɛgɛn o kan,
[2] k'a dila ka kɛ i n'a fɔ daga sigilen bɛ a da la, ka kɛlɛkɛ kogow jɔ a kama ka yɛlɛnyɛlɛnnan jɔ a kama ka kɛlɛdenw sigi a kama ka kogo kari minanw dila a kama a fan bɛɛ la.
[3] I ka nɛgɛ falafala dɔ fana ta ka o jɔ i ko dugu lamini kogo nɛgɛma i ni dugu jaɲɛgɛnnen cɛ. O kɔ, i ka i ɲɛ sin dugu ma. Daga na sigi a da la. I yɛrɛ na daga a da la. O na kɛ taamashyɛn ye Israɛl ka so kama.
[4] «O kɔ, i ka i da i numan fɛ kɛrɛ kan ka Israɛl ka so ka tilenbaliya kow doni ta. O cogo la i na u ka tilenbaliya kow doni ta ka kɛɲɛ ni o tile dama ye.
[5] Ne na u ka tilenbaliya tile dama jate i kun. I na Israɛl ka so ka tilenbaliya kow doni tile kɛmɛ saba ni tile bikɔnɔntɔn kɔnɔ.
[6] Ni o donw dafara tuma min na, i na i da i kinin fɛ kɛrɛ kan ka Juda ka so ka tilenbaliya kow doni tile binaani kɔnɔ. Ne na tile kelen-kelen jate i ye san kelen ye.
[7] I ka i ɲɛda ni i bolo lankolon sin Jerusalɛm lamininen fan fɛ ka kiraya kɛ a kama.
[8] Ne na i siri ni jurukisɛ ye walisa i kana i yɛlɛma i kɛrɛw kan fo Jerusalɛm daga sigi tuma ka dafa.
[9] «I ka alikama ni orje ni shɔ ni shɔ gɛlɛnen niɲɔkisɛ ani saɲɔkisɛ ta ka u ɲaami ɲɔgɔn na daga kɔnɔ. Ka i dalen to, i na olu dumu tile kɛmɛ saba ni tile bikɔnɔntɔn kɔnɔ.
[10] I na dumuni min kɛ, o na kɛ kilo tila naaninan ye don o don. O na kɛ i ka don kelen dumuni ye.
[11] I na ji min min, o hakɛ filɛ nin ye, o bɛ bɛn litiri tilancɛ ma don o don. O na kɛ i ka don kelen ji minta ye.
[12] I ka o dumuni fɛn ta ka o kɛ buurukun misɛn ye ka o wusu ni mɔgɔbo ye Jerusalɛmkaw ɲɛ kɔrɔ.»
[13] Matigi y'a fɔ ko kura ko: «Ne na Israɛl bɔnsɔn gɛn ka taa siya minw cɛma, u na u ka dumuni nɔgɔlenw dumu olu cɛma.»
[14] O tuma la ne y'a fɔ ko: «E Matigi Ala, ne dusu ma nɔgɔ fɔlɔ. Ne ma jufa wala waradatɔ wala sogo nɔgɔlen si dumu kabini ne denmisɛnma fo ka na se sisan ma. U si ma don ne da la.»
[15] Matigi ye ne jaabi ko: «Ne bɛ sɔn i ka misibo ta mɔgɔbo nɔ na. I ka olu ta ka i ka dumuni dila ni u ye.»
[16] O kɔ, a ko: «Hadamaden, ne na Jerusalɛmkaw ka dumuni ko gɛlɛya. U sirannen na dumuni fɛn suma k'a dumu tɔɔrɔ kosɔn. U ja tigɛlen na ji suma k'a min.
[17] Ka fara o kan, u ka dumuni ni u ka minni ji na dɛsɛ fo ka u ja tigɛ. U na naasi u ka tilenbaliya kow kosɔn.