[1] «Matigi Ala ko: ‹So kɔnɔ dukɛnɛ donda min ɲɛ sinnen bɛ kɔrɔn fɛ, o datugulen na to tile wɔɔrɔ kɔnɔ. A tɛna yɛlɛ nka a na yɛlɛ lafiɲɛ don ani kalo kura tile fɔlɔ la.
[2] Ka sarakalasebaaw to kuntigi ka saraka jenita ni a ka barika dali saraka laseli la, kuntigi bɛ na ka bɔ kɛnɛma ka don bulon donda fɛ ka i jɔ donda kondon jiriw kɛrɛ fɛ. A bɛ i biri dakun kan ka batoli kɛ. O kɔ, a bɛ bɔ nka da tɛna tugu fo wula da fɛ.
[3] Jamanadenw na u biri Matigi ɲɛ kɔrɔ ka batoli kɛ o donda la lafiɲɛ donw ni kalo kura tile fɔlɔw la.
[4] ‹Kuntigi na saraka jenita minw lase lafiɲɛ don na, o na kɛ sagaden fiɲɛntan wɔɔrɔ ani sagajigi fiɲɛntan kelen ye.
[5] Sagajigi kan mugu saraka na kɛ efa ɲɛ kelen ye. Sagadenw ta ka kɛ ka kɛɲɛ ni a se ko ye. Tulu hinɲɛ kelen ka fara efa muguɲɛ kelen kan.
[6] A ka nturabɔlan fiɲɛntan kelen ani sagaden wɔɔrɔ ani sagajigi kelen kɛ saraka ye kalo kura tile fɔlɔ don. Olu bɛɛ ka kɛ fiɲɛntanw ye.
[7] A ka efa ɲɛ kelen mugu kɛ ntura kan ka efa ɲɛ kelen kɛ sagajigi kan. Sagadenw ta ka kɛ ka kɛɲɛ ni a se ko ye. Tulu hinɲɛ kelen ka fara efa ɲɛ kelen mugu kan.
[8] ‹Ni kuntigi bɛ don, a bɛ don bulon donda fɛ ka bɔ o da kelen fɛ.
[9] Ni jamanadenw bɛ don ka seli donw saraka lase Matigi ɲɛ kɔrɔ tuma min na, ni mɔgɔ min donna saheli yanfan donda fɛ ka batoli kɛ, o tigi ka bɔ worodugu yanfan donda fɛ. Ni min donna worodugu yanfan donda fɛ, o ka bɔ saheli yanfan donda fɛ. Mɔgɔ si kana bɔ a donda fɛ, nka bɛɛ ka bɔ u ɲɛ kuntilenna donda fɛ.
[10] Kuntigi bɛ don jama don tuma la. Ni jama bɛ bɔ tuma min na, ale fana bɛ bɔ.
[11] ‹Seli donw ni don senumaw mugu sarakaw na kɛ efa ɲɛ kelen ni ntura kelen ye, efa ɲɛ kelen sagajigi kelen. Sagadenw ta ka kɛ ka kɛɲɛ ni a se ko ye. Tulu hinɲɛ kelen ka fara efa ɲɛ kelen-kelen mugu kan.
[12] ‹Ni kuntigi b'a fɛ ka diyaɲe nili fɛn di Matigi ma, saraka jenita wala barika dali saraka, u ka kɔrɔn yanfan donda yɛlɛ a ye. A ka a ka saraka jenitaw ni barika dali sarakaw lase i ko a bɛ deli k'a kɛ lafiɲɛ donw la cogo min na. O kɔ, a ka bɔ. Ni a bɔra, o da ka tugu.
[13] ‹San kelen sagaden fiɲɛntan ka kɛ saraka jenita ye Matigi ye sɔgɔma o sɔgɔma.
[14] Sagaden kan mugu saraka ka kɛ efa ɲɛ kelen tila wɔɔrɔnan ye sɔgɔma o sɔgɔma. Tulu hinɲɛ kelen tila sabanan kaɲaami muguw la. O na kɛ mugu saraka ye Matigi ye. O ye ko latigɛlen ye, o tɛ yɛlɛma. O bɛ kɛ tuma bɛɛ.
[15] Sagaden kelen ni a kan mugu ni a tulu ka kɛ saraka jenita ye sɔgɔma o sɔgɔma, o tɛ dabila.›
[16] «Matigi Ala ko: ‹Ni kuntigi b'a fɛ ka dɔ bɔ a niyɔrɔ dugukolo la k'a di a denkɛ dɔ ma, o yɔrɔ na kɛ o denkɛ ni a yɛrɛ denkɛw ciyɛn ye.
[17] Nka ni kuntigi ye dɔ bɔ a niyɔrɔ dɔ la k'a di a ka jɔn dɔ ma, o yɔrɔ na kɛ o jɔn ta ye fo ka taa se a hɔrɔnya don ma, hɔrɔɲali san na. O kɔ, o yɔrɔ na kɛ kuntigi ta ye. Kuntigi ciyɛn ye a denw ta ye.
[18] Kuntigi kana fɛn bɔ mɔgɔ si niyɔrɔ la ka o bɔsi Israɛl bɔnsɔn si la. A bɛ min di a denkɛw ma, o ka bɔ a yɛrɛ niyɔrɔ la walisa ne ka mɔgɔw si kana gɛn ka bɔ a ciyɛn kun na.›»
[19] O kɔ, cɛ taara ni ne ye sarakalasebaaw ka bon senuma yɔrɔ la saheli yanfan fɛ. A donna ni ne ye o donda kɛrɛ fɛ da fɛ. Yɔrɔ dɔ tun bɛɲɛ fɛ tilebi yanfan fɛ. A ye o jira ne la.
[20] A y'a fɔ ne ye ko: «Sarakalasebaaw bɛ jurumu yafa saraka sogow ni jalaki yafa saraka sogow tobi ka mugu sarakaw wusu yen walisa u kana taa mɔgɔw yɔrɔw la kɛnɛma ni olu ye.»
[21] O kɔ, a bɔra ni ne ye ka taa kɛnɛma dukɛnɛ la. A tɛmɛnna ni ne ye o kɛnɛma dukɛnɛ seleke naani bɛɛ la. Dukɛnɛ misɛn koolilen tun bɛ o seleke naani bɛɛ la.
[22] Olu janya tun ye nɔnkɔnɲɛ binaani ye. U bonya tun ye nɔnkɔnɲɛ bisaba ye. O dukɛnɛ misɛn naani bɛɛ bonya tun ka kan.
[23] O dukɛnɛ misɛn naani bɛɛ koolilen tun don ni kogow ye. Tasuma kin yɔrɔ tun bɛ o kogow ju la ka u lamini.
[24] O cɛ y'a fɔ ne ye ko: «Yan ye tobili kɛ yɔrɔ de ye. Mɔgɔ minw bɛ Alabatosoba baara kɛ, olu bɛ mɔgɔw ka saraka sogow tobi nin yɔrɔw la.»