[1] San tan ni kelennan kalo tile fɔlɔ don, Matigi ka kuma sera ne ma ko:
[2] «Hadamaden, Tirkaw y'a fɔ Jerusalɛm ko la ko: ‹Ohɔɔ, mɔgɔw ka dondaw tiɲɛnna. Mɔgɔw bɛɛ na yɛlɛma an fan fɛ. An na nafoloba sɔrɔ k'a masɔrɔ Jerusalɛm tiɲɛnna.›»
[3] O de kosɔn Matigi Ala ko: «Tir, ne na taa i kama. Ne na siya caman lawuli i kama i ko kɔgɔji jikuruw bɛ lawuli cogo min na.
[4] O siyaw na Tir lamini kogow tiɲɛn ka a sankanso janw ci. Ne na a buguri bɛɛ fura ka bɔ yen k'a kɛ farakolo jalan ye.
[5] A na kɛ jɔw fɛnsɛ yɔrɔ ye kɔgɔji cɛma sabu ne, Matigi Ala ye o fɔ. Tir na kɛ siyaw ka fɛn minɛlen ye.
[6] Tir jamana duguba na ci npan fɛ. U n'a dɔn ko ne ye Matigi de ye.»
[7] K'a masɔrɔ Matigi Ala ko: «Ne na saheli yanfan jamana Babilonɛ masakɛ Nebukadnezar, masakɛw ka masakɛ ani sow ni wotorow ni so kan yɛlɛnnaw ani kɛlɛbolo dama dɔnbali lawuli ka na Tir kama.
[8] O na i ka jamana dugubaw bɛɛ halaki ni npan ye. U na yɛlɛnyɛlɛnnanw jɔ ka kɛlɛkɛ kogow jɔ ka nɛgɛ bɛnnanw ta i kama.
[9] U na aw ka kogow labi ni u ka kɛlɛkɛ minanw ye ka aw ka sankansow ci ni u ka jelew ye.
[10] U ka sow na caya fo ka fɔlɔkɔ wuli ka i datugu. I ka mɔgɔw na yuguyugu sotigiw ni wotoro senw ani wotorow mankan kosɔn. Ni juguw bɛ don i ka dugu daw fɛ, u bɛ don i ko se sɔrɔla dugu min kan.
[11] U ka sow ntɔrɔnw na i ka dugu bɔlɔnw yɔrɔ bɛɛ foroki ka i ka dugu kɔnɔ mɔgɔw bɛɛ faga ni npan ye. I ka samasen barikamaw na bi duguma.
[12] O kɔ, i juguw na i ka nafolow bɛɛ cɛ ka i ka jago fɛnw cɛ ka i ka kogow labi ka i ka masaya soɲumanw ci ka i ka kabakurunw ni i ka jiriw ani i ka buguriw fili kɔgɔji la.
[13] Ne na i ka dɔnkili dakan ban. I ka nkɔnikan tɛna mɛn tun.
[14] Ne na i kɛ farakolo jalan ye ka i kɛ mɔnnikɛlaw ka jɔ fɛnsɛ yɔrɔ ye. I tɛna jɔ tun sabu ne, Matigi kumana.» Matigi Ala ko ten.
[15] Ayiwa Matigi Ala y'a fɔ Tir ko la ko: «Ni mɔgɔ sataw bɛ nwunan, ni mɔgɔw bɛ faga i kɔnɔ tuma min na, kɔgɔji dala jamanaw na yɛrɛyɛrɛ i bikan kosɔn.
[16] Kɔgɔji dala masakɛw bɛɛ na jigin ka bɔ u ka masasigilanw kan ka u ka dulɔkibaw bɔ u kan na ka u ka fini nɔgɔlenw bɔ u la. Siranba na u sɔrɔ. U na u sigi duguma. U ja tigɛlen na sɔrɔ tuma bɛɛ ka kabakoya i ko la.
[17] U na maɲumatɔkan fɔ i kosɔn ko: ‹E min sigilen tun bɛ gun kan ji cɛma, ni i tɔgɔ bɔlen tun don, i tiɲɛnna, i fanga tun ka bon kɔgɔji kan taama la. I kɛra siranfɛn ye i sigiɲɔgɔnw cɛma.
[18] Sisan gunw na yɛrɛyɛrɛ i halaki don na, kɔgɔjila gunw bɛɛ ja na tigɛ i laban kow kosɔn.›»
[19] Matigi Ala ko: «Ni ne ye i kɛ tomon ye ka i kɛ dugu lankolon ye, ni ne ye jikuruw kɛ ka i datugu dun na ni jibaw ye ka i tunun tuma min na,
[20] o tuma la ne na i fili lahara kɔnɔ mɔgɔ salenw cɛma. Ne na i lasigi fo dugukolo jukɔrɔ, yɔrɔ mankanntan na mɔgɔ salen kɔrɔw cɛma badaa, walisa mɔgɔ si kana sigi i kɔnɔ tun, nka ne na i nɔɔrɔ di mɔgɔɲɛnamaw ma.
[21] Ne na i kɛɲɛ jira fɛn ye. I tɛna kɛ yen tun. Hali ni mɔgɔ bɛ i ɲini, i tɛna ye tun. I tɛna sɔrɔ tun abada.» Matigi Ala ko ten.