[1] An ka jɔnya san mugan ni duurunan la, san daminɛ tuma la kalo tile tannan don, Jerusalɛm minɛli san tan ni naaninan don yɛrɛ la, Matigi bolo tun bɛ ne kan. A ye ne ta ni la ka taa ni ne ye o duguba kɔnɔ.
[2] A taara ni ne ye yeli fɛn na Israɛl jamana kɔnɔ ka ne jɔ kulu jamanjan dɔ kuncɛ ma. Ne ye fɛn min ye kulu worodugu yanfan fɛ, o bɔlen bɛ duguba dɔ fɛ.
[3] A ye ne ladon yen tuma min na, ne ye mɔgɔ dɔ ye, o bɔlen bɛ nsiranɛgɛ fɛ. Lenfu jurukisɛ ani sumanikɛ kala tun bɛ o bolo. A jɔlen tun bɛ donda la.
[4] O cɛ y'a fɔ ne ye ko: «Hadamaden, i ka filɛli kɛ ni i ɲɛw ye ka lamɛnni kɛ ni i tulow ye. Ne bɛ fɛn minw jira i la, i ka olu kɔlɔsi sabu i nana yan walisa u ka jira i la. Ayiwa, i bɛ na fɛn minw ye, i ka olu bɛɛ fɔ Israɛl ka so ye.»
[5] A filɛ, kogo dɔ tun kɛra ka Alabatosoba lamini. Sumanikɛ kala dɔ tun bɛ o cɛ bolo. O kala janya kɛra nɔnkɔnɲɛ wɔɔrɔ ye. Tɛgɛfura kelen dayɔrɔ tun farala nɔnkɔnɲɛ kelen-kelen bɛɛ kan. A ye lamini kogo kolo giriya suma. O kɛra kalaɲɛ kelen ye. A ye kogo kundama suma, o fana kɛra kalaɲɛ kelen ye.
[6] O kɔ, a taara kɔrɔn fɛ dondaba la ka yɛlɛn o kan yɛlɛnyɛlɛnnan fɛ. A ye donda kun suma. O bonya kɛra kalaɲɛ kelen ye. Da filanan bonya fana kɛra kalaɲɛ kelen ye.
[7] Bonw bɛɛ kelen-kelen kɔnɔ bonya ni u kɔnɔ janya kɛra kalaɲɛ kelen-kelen ye. Furancɛ min tun bɛ bonw niɲɔgɔn cɛ, o janya kɛra nɔnkɔnɲɛ duuru ye. Bulon min tun bɛ bonba da la, o ɲɛ fɛ donda bonya kɛra sumanikɛ kalaɲɛ kelen ye.
[8] Bulon min ɲɛ sinnen tun bɛ soba ma, a ye o suma. O fana kɛra kalaɲɛ kelen ye.
[9] A ye dondala bulon suma, o kɛra nɔnkɔnɲɛ segin ye. O samasenw kɛra nɔnkɔnɲɛ fila ye. Bulonɲɛ sinnen tun bɛ Alabatosoba ma.
[10] Bon minw tun bɛ kɔrɔn yanfan donda la, olu tun ye wɔɔrɔ ye. Saba tun bɛ fan dɔ la, saba tun bɛ fan wɛrɛ la. O bonw bɛɛ bonya tun ye kelen ye. Samasen minw tun bɛ bon niɲɔgɔn cɛ, olu bɛɛ tun ka kan.
[11] O kɔ, a ye dondaba bonya suma. O kɛra nɔnkɔnɲɛ tan ye. O kundama kɛra nɔnkɔnɲɛ tan ni saba ye.
[12] Nɔnkɔnɲɛ kelen kogo kɛra bonw bɛɛ kelen-kelenɲɛ fɛ. Bon fan kelen tun ye nɔnkɔnɲɛ wɔɔrɔ ye, fan dɔ tun ye nɔnkɔnɲɛ wɔɔrɔ fana ye.
[13] Ka bɔ so dɔ bili la ka taa se so dɔ wɛrɛ bili ma, o furancɛ janya kɛra nɔnkɔnɲɛ mugan ni duuru ye.
[14] O kɔ, a ye samasen jɔ yɔrɔw bɛɛ suma, olu kɛra nɔnkɔnɲɛ biwɔɔrɔ ye. Dukɛnɛ sera o samasenw ma ka donda lamini.
[15] Dondaba ni dukɛnɛ la bulon donda furancɛ kɛra nɔnkɔnɲɛ biduuru ye.
[16] Finɛtiri banabililenw tun bɛ bonw bɛɛ kelen-kelen na ani samasenw la dondaba kɔnɔ. Finɛtiriw tun kɛra a fan bɛɛ la du kɔnɔ. Ntamaro sun bisigiw tun dilara o samasenw na.
[17] O kɔ, a taara ni ne ye kɛnɛma dukɛnɛ la. Bonw ni kabakurun banbe kɛra ka o dukɛnɛ yɔrɔ bɛɛ lamini. Bon bisaba tun bɛ o banbe la.
[18] O banbe tun bɛ bɔ daba dɔ la ka taa se fo daba dɔ ma. A kɛɲɛna ni daw kolo giriya ye. O ye duguma banbe ye.
[19] A ye duguma dondaɲɛfɛla suma fo ka taa se so kɔnɔ dukɛnɛ ma. O kɔrɔn fɛ la ni a saheli yanfan janya kɛra nɔnkɔnɲɛ kɛmɛ ye.
[20] A ye saheli yanfan kɛnɛma dukɛnɛ donda janya ni a bonya suma.
[21] Bon saba-saba tun bɛ a fan fila bɛɛ la. O samasenw ni dukɛnɛ bulonw ani kɔrɔn fɛ donda taw bɛɛ dama tun ka kan. U fila bɛɛ janya kɛra nɔnkɔnɲɛ biduuru-duuru ye. U bonya kɛra nɔnkɔnɲɛ mugan ni duuru-duuru ye.
[22] A finɛtiriw ni a bulonw ani ntamaro sun bisigi minw tun bɛ u la, olu ni kɔrɔn fɛ dondaba taw bɛɛ tun ka kan. Mɔgɔ bɛ yɛlɛn a yɛlɛnyɛlɛnnan wolonwula fɛ k'a ɲɛ sin bulon ma.
[23] Donda tun bɛ so kɔnɔ dukɛnɛ la, o ni dondaba sinnen tun bɛɲɔgɔn ma saheli yanfan fɛ, kɔrɔn fɛ ta tun bɛ o cogo la. A ye donda fila furancɛ suma. O janya kɛra nɔnkɔnɲɛ kɛmɛ ye.
[24] O kɔ, a taara ni ne ye worodugu yanfan fɛ. Ne ye worodugu yanfan donda ye. A ye o samasenw ni a bulonw suma. Olu ni tɔw tun ka kan.
[25] O donda ni bulon lamininen tun bɛ ni finɛtiriw ye. Olu ni finɛtiri tɔw tun ka kan. O janya tun ye nɔnkɔnɲɛ biduuru ye. A bonya tun ye nɔnkɔnɲɛ mugan ni duuru ye.
[26] Mɔgɔ bɛ yɛlɛn a yɛlɛnyɛlɛnnan wolonwula fɛ k'a ɲɛ sin bulon ma. Ntamaro sun bisigiw tun bɛ a fan fila bɛɛ samasenw na.
[27] So kɔnɔ dukɛnɛ donda tun bɛ worodugu yanfan fɛ. A ye o donda fila furancɛ suma. O janya kɛra nɔnkɔnɲɛ kɛmɛ ye.
[28] O kɔ, a donna ni ne ye so kɔnɔ dukɛnɛ la worodugu yanfan donda fɛ. A ye worodugu yanfan donda suma. O ni tɔw tun ka kan.
[29] U bonw ni u samasenw ani u bulonw bɛɛ ka kan. Finɛtiriw tun kɛra ka o donda ni a bulonw lamini. A janya tun ye nɔnkɔnɲɛ biduuru ye. A bonya tun ye nɔnkɔnɲɛ mugan ni duuru ye.
[30] A lamininen tun bɛ ni bulonw ye, olu bɛɛ janya tun ye nɔnkɔnɲɛ mugan ni duuru ye. U bonya tun ye nɔnkɔnɲɛ duuru ye.
[31] O bulonw ɲɛ sinnen tun bɛ kɛnɛma dukɛnɛ ma. Ntamaro sun bisigiw tun kɛra a samasenw na. Senda yɔrɔ segin tun bɛ a la ka yɛlɛn san fɛ.
[32] O kɔ, a taara ni ne ye kɔrɔn yanfan fɛ donda la ka o suma. O ni tɔw tun ka kan.
[33] A bonw ni a samasenw ani a bulonw ni fɔlɔ taw bɛɛ tun ka kan. Finɛtiriw tun bɛ a ni a bulonw la ka a lamini. A janya kɛra nɔnkɔnɲɛ biduuru ye. A bonya kɛra nɔnkɔnɲɛ mugan ni duuru ye.
[34] Donda la bulonw ɲɛ sinnen tun bɛ kɛnɛma dukɛnɛ ma. Ntamaro sun bisigiw dilalen tun bɛ o fan fila bɛɛ samasenw na. Senda yɔrɔ segin tun bɛ a la ka yɛlɛn san fɛ.
[35] O kɔ, a taara ni ne ye saheli yanfan donda la ka o suma. O ni fɔlɔ ta tun ka kan.
[36] A bonw ni a samasenw ni a bulonw ni fɔlɔ taw dama tun ka kan. Finɛtiriw tun kɛra ka u fan bɛɛ lamini. A janya tun ye nɔnkɔnɲɛ biduuru ye. A bonya tun ye nɔnkɔnɲɛ mugan ni duuru ye.
[37] A bulonw ɲɛ sinnen tun bɛ kɛnɛma dukɛnɛ ma. Ntamaro sun bisigiw tun bɛ a fan fila bɛɛ samasenw na. Senda yɔrɔ segin tun bɛ a la ka yɛlɛn san fɛ.
[38] Bon kelen da yɛlɛlen tun bɛ dondaba samasenw kɛrɛ fɛ. Saraka jenitaw tun bɛ ko yen.
[39] Tabali fila tun bɛ dondaba kɛrɛ fila bɛɛ la bulon kɔnɔ. Saraka jenitaw ni jurumu yafa sarakaw ani jalaki yafa sarakaw tun bɛ faga olu kan.
[40] Tabali fila tun bɛ saheli yanfan fɛ donda yɛlɛnyɛlɛnnan fan kelen fɛ. Tabali fila wɛrɛ tun bɛ donda la bulon fan fɛ.
[41] Ayiwa, tabali naani tun bɛ donda fan kelen fɛ, naani tun bɛ fan dɔ fɛ. U bɛɛ lajɛlen ye tabali segin ye. Saraka fagataw tun bɛ kan tigɛ olu kan.
[42] Kaba dɛsɛnenw tabali naani fana tun bɛ yen. Olu bɛɛ janya tun ye nɔnkɔnɲɛ kelen ni tila ye. U bonya tun ye nɔnkɔnɲɛ kelen ni tila ye. U kundama tun ye nɔnkɔnɲɛ kelen ye. Saraka jenitaw ni saraka wɛrɛw fagali minanw tun bɛ bila olu kan.
[43] Fɛn dulon bɔlɔw dulonnen tun bɛ so kɔnɔ ka a lamini. O bɔlɔw janya kɛra tɛgɛfura kelen dayɔrɔɲɔgɔn ye. Saraka sogow tun bɛ da tabaliw kan.
[44] Dɔnkili dalaw ka bonw tun bɛ dukɛnɛ la. Kelen tun bɛ saheli yanfan donda kɛrɛ fɛ k'a ɲɛ sin worodugu ma. Bon filanan tun bɛ worodugu yanfan donda kɛrɛ fɛ k'a ɲɛ sin saheli ma.
[45] Cɛ y'a fɔ ne ye ko, bon min ɲɛ sinnen bɛ worodugu yanfan fɛ, o ye Alabatosoba kɔlɔsibaa sarakalasebaaw ta ye.
[46] Bon min ɲɛ sinnen bɛ saheli ma, o ye saraka bɔlan kɔlɔsibaa sarakalasebaaw ta ye. Olu ye Levi bɔnsɔn Zadɔk denw ye, u bɛ gɛrɛ Matigi la ka baara kɛ a ye.
[47] O kɔ, a ye dukɛnɛ bonya ni a janya suma. O janya kɛra nɔnkɔnɲɛ kɛmɛ ye. A bonya kɛra nɔnkɔnɲɛ kɛmɛ ye. Saraka bɔlan tun bɛ Alabatosobaɲɛ fɛ.
[48] O kɔ, a donna ni ne ye bulon kɔnɔ ka samasenw suma. Olu bɛɛ kolo giriya kɛra nɔnkɔnɲɛ duuru ye. Donda samasen kolo giriya kɛra nɔnkɔnɲɛ saba ye, a fan fila bɛɛ tun ka kan.
[49] Bulon janya kɛra nɔnkɔnɲɛ mugan ye. A bonya kɛra nɔnkɔnɲɛ tan ni kelen ye. Yɛlɛɲɛlɛnnan tun bɛ yen. Samasen fila tun bɛ da samasenw kɛrɛ fɛ. Kelen tun bɛ fan kelen fɛ, dɔ tun bɛ fan dɔ fɛ.