[1] O kɔ, cɛ taara ni ne ye dukɛnɛ la ka taa ni ne ye saheli yanfan fɛ bonw fan fɛ yɔrɔ bilalen ani so min bɛ Alabatosoba kɔ fɛ, olu ɲɛ fɛ.
[2] Saheli yanfan donda kɛrɛfɛ bonw janya kɛra nɔnkɔnɲɛ kɛmɛ ye. A bonya kɛra nɔnkɔnɲɛ biduuru ye.
[3] Sankanso fan min ɲɛ sinnen tun bɛ so kɔnɔ dukɛnɛ ma, o janya kɛra nɔnkɔnɲɛ mugan ye. A fan dɔɲɛ sinnen tun bɛ kabakurun banbe ma kɛnɛma dukɛnɛ la.
[4] Tɛmɛn yɔrɔ kɛra o bonw ɲɛfɛla la, o bonya kɛra nɔnkɔnɲɛ tan ye. So kɔnɔ sira bonya kɛra nɔnkɔnɲɛ kelen ye. U daw sinnen bɛ saheli yanfan fɛ.
[5] Sanfɛ bonw kɔnɔ tun ka misɛn duguma bonw ni cɛmancɛ bonw ye sabu sanfɛ waranda kɔnɔ tun ka bon duguma taw ye.
[6] U kɛra sankanso so saba ye ɲɔgɔn san fɛ, nka samasenw tun tɛ u la i ko dukɛnɛ taw. O de kosɔn sanfɛ bonw ni cɛmancɛ bonw kɔnɔ tun ka misɛn duguma taw ye.
[7] Kɛnɛma dukɛnɛ fan fɛ kogo min bɛ bonw kɛrɛ fɛ, o janya kɛra nɔnkɔnɲɛ biduuru ye.
[8] K'a masɔrɔ bon minw tun bɛ kɛnɛma dukɛnɛ fan fɛ, olu janya tun ye nɔnkɔnɲɛ biduuru ye k'a sɔrɔ Alabatosoba fan fɛ taw janya kɛra nɔnkɔnɲɛ kɛmɛ ye.
[9] Mɔgɔ minw tun bɛ na ka bɔ kɛnɛma dukɛnɛ la kɔrɔn yanfan fɛ, olu donda tun bɛ bonw jukɔrɔ.
[10] O bonw ɲɔgɔn tun bɛ kɔrɔn fɛ kogo kɛrɛ fɛ ka u ɲɛ sin yɔrɔ bilalen ma Alabatosoba fan fɛ.
[11] Tɛmɛn yɔrɔ tun bɛ o bonw ɲɛ fɛ i ko saheli yanfan bonw ta. U janya tun ka kan, u bonya bɛɛ tun ka kan. U bɔdaw ni u dondaw bɛɛ kɛra cogo kelen na. U jɔ cogo kɛra kelen ye.
[12] U dala konw ni worodugu yanfan dala konw tun ka kan. Donda dɔɲɛ sinnen tun bɛ kɔrɔn fɛ kogo ma. Mɔgɔ tun bɛ don o fɛ.
[13] Ayiwa cɛ y'a fɔ ne ye ko: «Saheli yanfan bonw ni worodugu yanfan bon minw ɲɛ sinnen bɛ yɔrɔ bilalen ma, olu ye bon senumaw de ye sabu sarakalasebaa minw bɛ gɛrɛ Matigi la, olu bɛ don u kɔnɔ ka fɛn senumaw dun yen. U bɛ fɛn senuma senumaw bila yen, suman kun fɔlɔ sarakaw ni jurumu yafa sarakaw ani jalaki yafa sarakaw, sabu o yɔrɔ ka senu.
[14] Ni sarakalasebaaw donna yen, u tɛ bɔ yɔrɔ senuma kɔnɔ ka taa kɛnɛma dukɛnɛ la ni u ma u ka sarakalasebaaya dulɔkiw bila yen ka sɔrɔ ka taa, sabu u ka dulɔkiw ka senu. U bɛ fini wɛrɛw don ka sɔrɔ ka taa mɔgɔw yɔrɔ.»
[15] A tilalen kɔ Alabatosoba kɔnɔ sumani la, a bɔra ni ne ye kɔrɔn fɛ donda fɛ ka o yɔrɔ bɛɛ suma.
[16] A ye kɔrɔn yanfan bɛɛ suma ni sumanikɛ kala ye. O bɛnna sumanikɛ kalaɲɛ kɛmɛ duuru ma.
[17] A ye saheli yanfan suma ni a ka sumanikɛ kala ye. O bɛnna sumanikɛ kalaɲɛ kɛmɛ duuru ma.
[18] A ye worodugu yanfan suma ni a ka sumanikɛ kala ye. O bɛnna sumanikɛ kalaɲɛ kɛmɛ duuru ma.
[19] A taara tilebi yanfan fɛ ka o kɛrɛ suma. O bɛnna sumanikɛ kalaɲɛ kɛmɛ duuru ma.
[20] Kogo min kɛra ka Alabatosoba lamini, a ye o suma. O janya kɛra kalaɲɛ kɛmɛ duuru ye. A bonya kɛra kalaɲɛ kɛmɛ duuru ye. O kogo kɛra ka yɔrɔ senuma ni yɔrɔ tɔw cɛ tila.