[1] O kan y'a fɔ ne ye ko: «Hadamaden, i ka wuli ka i jɔ, ne na kuma i fɛ.»
[2] Kabini o kumana ne fɛ, Ala Ni donna ne la ka ne lawuli ka jɔ. Min tun bɛ kuma ne fɛ, ne ye o kan mɛn.
[3] A y'a fɔ ne ye ko: «Hadamaden, ne bɛ i ci Israɛl bɔnsɔnw yɔrɔ, o siya murutilen min murutira ne ma. U ni u bɛnbaw ye jurumu kɛ ne la fo ka na se bi ma.
[4] U kɛra denmisɛnɲɛkolo gɛlɛnw ni dusukun gɛlɛnw ye. Ne bɛ i ci u ma. I k'a fɔ u ye, ko Matigi Ala ko,
[5] ni u ye i lamɛn wala ni u ma sɔn ka i lamɛn sabu so murutilen don, nka u n'a dɔn ko kira tun bɛ u cɛma.
[6] Nka e kɔni, Hadamaden, i kana siran u ɲɛ. I kana siran u ka kumaw ɲɛ. Hali ni i bɛ nwɔniw ni nɔnfɔn nwɔnimaw cɛma, ka sigi bunteniw cɛma, i kana siran u ka kumaw ɲɛ fewu. I kana yɛrɛyɛrɛ u ɲɛ kɔrɔ, hali k'a sɔrɔ u ye so murutilen ye.
[7] Ayiwa i ka ne ka kuma lase u ma, u ka sɔn a ma wala u ka ban a ma, k'a masɔrɔ u murutilen don.
[8] «Nka e, Hadamaden, ne bɛ min fɔ i ye, i ka o lamɛn. I kana kɛ murutilen ye i ko o so murutira cogo min na. Ne bɛ fɛn min di i ma, i ka i da yɛlɛ ka o dun.»
[9] Ne ye filɛli kɛ, bolo dɔ sinna ne ma. Sɛbɛn melekelen bɛ o kɔnɔ.
[10] O sɛbɛn melekelen da yɛlɛla ne ɲɛ kɔrɔ, sɛbɛnni tun kɛra o fan fila kan. O sɛbɛn kɔnɔ kuma tun ye kasiba ni dusu kasi ani bɔnɛ kow ye.