[1] Matigi ka kuma sera ne ma ko:
[2] «Hadamaden, i ka i ɲɛ sin Magog jamana Gog ma, Ros ni Mesɛk ani Tubal kuntigi don. I ka kiraya kɛ a kama.
[3] I k'a fɔ ko Matigi Ala ko: ‹Ros ni Mesɛk ni Tubal ka masakɛ Gog, ne bɛ wuli i kama sa.
[4] Ne na nɛgɛ don i da la ka i wajibiya ka bɔ i nɔ na. Ne na i karaba ka bɔ i ka jamana la, i ni i ka kɛlɛbolow jamaba bɛɛ, sow ni sotigiw bɛɛ, u labɛnnen bɛ ni nɛgɛ bɛnnan kunbabaw ni misɛnmaw ni npanw ye kɛlɛ kama.
[5] Perse kɛlɛkɛ cɛw ni Etiopi taw ni Put ta minw labɛnnen bɛ ni nɛgɛ bɛnnanw ni nɛgɛ fugulaw ye, olu bɛɛ na kɛ u fɛ,
[6] Gomer ni a ka kɛlɛbolow bɛɛ ani Togarma ka so min bɛ saheli yanfan fɛ ani u ka kɛlɛbolow ni siya caman na kɛ i ka kɛlɛkɛ cɛw ye.
[7] I cɛ siri. I ni i ka kɛlɛbolow dama dɔnbali ka aw labɛn, olu minw lajɛlen bɛ i kɔrɔ ka i kɛ u kuntigi ye.
[8] Tile dama dɔ tɛmɛnnenw kɔ, i na ci sɔrɔ ka taa Israɛl jamana minɛ. Mɔgɔ minw ɲɛnama tora kɛlɛ kɔ, olu na bɔ u sigiyɔrɔw jamanaw la ka lajɛ Israɛl kuluw kan, o yɔrɔw lankolon tun tora ka mɛn. Kabini u fara tuma la ka bɔ siya tɔw la, u lakanalen na sigi yen.
[9] E ni i fɛ kɛlɛbolow ani i fɛ jamaba na taa i ko fiɲɛba ka o jamana yɔrɔw bɛɛ datugu i ko sankaba.›
[10] «Matigi Ala ko: ‹O don na, a na jigin i kɔnɔ ka dabali juguw labɛn.
[11] I n'a fɔ ko lamini kogow tɛ o dugu minw na, ko i bɛ taa o jamana kama. Ko i bɛ taa bala o mɔgɔ lafiyalenw na u ka dugu lamini kogontanw kɔnɔ, kon balabala ni kon tɛ olu minw daw la.
[12] I ko, i na wuli ka taa olu kama ka u ka fɛnw cɛ, o dugu minw tun cira ka kɔrɔ, ni mɔgɔw bɔra siyaw cɛma ka sigi u kɔnɔ sisan. Bagan caman bɛ u bolo, u fɛntigiyara. U sigilen bɛ diɲɛ cɛmancɛ la, i y'a fɔ ko i na i bolo se olu ma ka u halaki.
[13] Seba ni Dedan ni Tarsisi jagokɛlaw ani u dafɛ duguw mɔgɔ minw bɛ i ko waraba kamalenw, olu na i ɲininka ko, i nana u halakili kama wa? I ka kɛlɛbolow lajɛlen bɛ u ka fɛn cɛli kama ka taa ni u ka warijɛ ni u ka sanu ye ka u ka bagankuluw ni u ka nafolo bɛɛ cɛ ka taa wa?›
[14] «O de kosɔn Hadamaden, i ka kiraya kɛ k'a fɔ Gog ye ko Matigi Ala ko: ‹O don na i n'a mɛn ko ne ka mɔgɔw, Israɛl bɔnsɔn sigilen bɛ hɛrɛ la u ka jamana kɔnɔ.
[15] E ni i ka kɛlɛboloba minw yɛlɛlen bɛ sow kan ka kɛ kɛlɛbolo barikama dama dɔnbali ye, aw na bɔ saheli yanfan fɛ i ka jamana kɔnɔ ka na.
[16] Gog, i na ne ka mɔgɔw Israɛl kɛlɛ, i na u ka jamana minɛ i ko sankaba bɛ dugukolo datugu cogo min na. O na kɛ waati jan nata la. Ne na i ci ka ne ka jamana minɛ walisa k'a jira siya wɛrɛw la ko ne ye Ala senuma ye. Ne na o jira u la i fɛ.›
[17] «Matigi Ala ko: ‹Ne kumana min ko la kabini tuma jan, o ye e ye. Ne ye o ci fɔ ne ka jɔnw Israɛl ka kiraw da la san caman caman kɔnɔ ko ne na mɔgɔ dɔ ci ka u siya kɛlɛ.›
[18] Matigi Ala ko: ‹Nka ni Gog tugura ne ka jamana mɔgɔw, Israɛl bɔnsɔn nɔ fɛ don min na, ne ka dimiyaba na ye neɲɛda la.
[19] Ne dusu bɔlenba y'a fɔ keleya kosɔn ko, siga t'a la, o don na dugukolo yɛrɛyɛrɛba na kɛ Israɛl jamana kɔnɔ.
[20] Kɔgɔji kɔnɔ jɛgɛw ni sanfɛ kɔnɔw ni kungo waraw ni fɛn fofotaw ni dugukolo kan mɔgɔɲɛnamaw bɛɛ na yɛrɛyɛrɛ jatigɛ kosɔn. Kuluw na yuguyugu, faraw na bi, dugu lamini kogow bɛɛ na bi duguma.›
[21] Matigi Ala ko: ‹Ne na npantigiw wele ka bɔ ne ka kuluw bɛɛ kan Gog kama. Mɔgɔw bɛɛ kelen-kelen na u yɛlɛma u mɔgɔɲɔgɔnw kama ni npan ye.
[22] Ne na ne ka kiri bi Gog kan ni fiɲɛbana ni fagali ye. Ne na sanjiba ni sanbɛlɛ ni tasuma ani kiribi jigin Gog ni a ka kɛlɛbolow ani a nɔfɛ jama dama dɔnbali bɛɛ kan.
[23] Ne na o kɛ ka ne nɔɔrɔ ni ne ka senuya jira siya caman la. U n'a dɔn ko ne ye Matigi de ye.›