[1] O kɔ, cɛ taara ni ne ye Alabatosoba kɔnɔ ka o da samasenw suma. Olu kɛra nɔnkɔnɲɛ wɔɔrɔ-wɔɔrɔ ye. A fan kelen bonya kɛra nɔnkɔnɲɛ wɔɔrɔ ye, fan dɔ fana kɛra nɔnkɔnɲɛ wɔɔrɔ ye. O ni finiso bonya bɛɛ tun ka kan.
[2] Donda bonya kɛra nɔnkɔnɲɛ tan ye, a da kɛrɛ fɛ kogow kɛra nɔnkɔnɲɛ duuru-duuru ye, fan dɔ nɔnkɔnɲɛ duuru, fan dɔ fana nɔnkɔnɲɛ duuru. A ye Alabatosoba janya suma. O kɛra nɔnkɔnɲɛ binaani ye. A bonya kɛra nɔnkɔnɲɛ mugan ye.
[3] A donna soɲɛ kɔnɔ la ka o da samasenw suma. Olu bonya kɛra nɔnkɔnɲɛ fila ye. O da kundama kɛra nɔnkɔnɲɛ wɔɔrɔ ye. A bonya kɛra nɔnkɔnɲɛ wolonwula ye.
[4] A ye Alabatosoba yɔrɔ senuma suma. O janya kɛra nɔnkɔnɲɛ mugan ye. A bonya kɛra nɔnkɔnɲɛ mugan ye. O kɔ, a y'a fɔ ne ye ko: «Yan ye yɔrɔ senuma senuma de ye.»
[5] A ye Alabatosoba kogow suma. Olu kolo giriya kɛra nɔnkɔnɲɛ wɔɔrɔ ye. Kɛrɛ fɛ bonw bɛɛ kelen-kelen bonya kɛra nɔnkɔnɲɛ naani ye.
[6] Bonw tun ye sankanso so saba ye ɲɔgɔn san fɛ. Bonden bisaba tun bɛ o so bɛɛ kelen-kelen na. O sankansow dilara Alabatosoba lamini kogow la ka a lamini, nka u tun tɛ gun Alabatosoba yɛrɛ la.
[7] Sankanso sow tun bɛ bonya niɲɔgɔn ye ka taa san fɛ, o kɛra ka Alabatosoba lamini. O cogo la sanfɛ so tun ka bon tɔw ye. Mɔgɔ tun bɛ yɛlɛn yɛlɛnyɛlɛnnan fɛ ka bɔ duguma so la ka don cɛmancɛ so kɔnɔ ka se sanfɛ so ma.
[8] Ne y'a ye ko Alabatosoba ni a lamini kogo cɛ tun ka jan a fan bɛɛ la. O kɛra sumanikɛ kalaɲɛ kelen ye. O ye nɔnkɔnɲɛ wɔɔrɔ ye. Kɛrɛ fɛ bonw ju sigira o kan.
[9] Kɛrɛ fɛ bonw kɔkanna kogo giriya kɛra nɔnkɔnɲɛ duuru ye.
[10] Furancɛ min tora bonw ni kɛnɛma bonw cɛ, o janya kɛra nɔnkɔnɲɛ mugan ye ka Alabatosoba lamini.
[11] Bonw dondaw ɲɛ sinnen tun bɛ o yɔrɔ bilalen ma. Donda kelen tun bɛ saheli yanfan fɛ, dɔ tun bɛ worodugu yanfan fɛ. Nɔnkɔnɲɛ duuru yɔrɔ bilalen tun bɛ u fan bɛɛ la.
[12] Bon min bɛ yɔrɔ bilalen fan fɛ tilebi yanfan fɛ, o bonya kɛra nɔnkɔnɲɛ biwolonwula ye. O bonw lamini kogo giriya kɛra nɔnkɔnɲɛ duuru ye, a janya kɛra nɔnkɔnɲɛ bikɔnɔntɔn ye.
[13] O kɔ, a ye Alabatosoba suma. O janya kɛra nɔnkɔnɲɛ kɛmɛ ye. Bon ni kogow cɛ furancɛ lankolon kɛra nɔnkɔnɲɛ kɛmɛ ye.
[14] Alabatosoba ɲɛfɛla bonya ani kɔrɔn fɛ yɔrɔ bilalen bonya, olu bɛɛ lajɛlen kɛra nɔnkɔnɲɛ kɛmɛ ye.
[15] O kɔ, a ye Alabatosoba suma k'a daminɛ yɔrɔ bilalen na ka taa kɔ fɛ ani fan bɛɛ kɛrɛ fɛ bonw fana, o kɛra nɔnkɔnɲɛ kɛmɛ ye.
[16] Alabatosoba kɔnɔ ani dukɛnɛ la bulonw ni da kunw ni finɛtiriw banabililenw ani bulon minw kɛra ka so lamini ani sankanso so saba dakun ɲɛfɛla bɛɛ bililen tun bɛ ni jiri fɛrɛnw ye. Ka bɔ duguma fo ka taa se u finɛtiri datugulenw ma,
[17] ani da dugumala kɔfɛla ni a ɲɛfɛla ani lamini kogo bɛɛ kɔnɔna ni a kɔkanna bɛɛ sumanen tun don.
[18] U tun ye serubɛn bisigiw ni ntamaro sun bisigiw dila kogo fan bɛɛ la. Serubɛn kelen, ntamaro sun bisigi kelen. Ɲɛda fila-fila tun bɛ o serubɛnw bɛɛ kelen-kelen na.
[19] A ɲɛda min bɛ i ko mɔgɔɲɛda, o sinnen tun bɛ ntamaro sun bisigi fan dɔ fɛ. A ɲɛda min bɛ i ko warabaɲɛda, o sinnen tun bɛ ntamaro sun ma fan dɔ fɛ ka so kɔnɔ lamini.
[20] Serubɛn bisigiw ni ntamaro sun bisigiw dilara Alabatosoba kogow fan bɛɛ la k'a daminɛ duguma fo ka taa se da san fɛ.
[21] Alabatosoba da samasenw kɛra seleke naaniw ye. Yɔrɔ senuma fana ta tun bɛ ten.
[22] Saraka bɔlan fana tun ye jiri ye. O kundama kɛra nɔnkɔnɲɛ saba ye. A bonya kɛra nɔnkɔnɲɛ fila ye. A selekew ni a jusigilan ni a kɛrɛw bɛɛ dilara ni jiri ye. Cɛ y'a fɔ ne ye ko: «Tabali min bɛ Matigi ɲɛ kɔrɔ, o filɛ nin ye.»
[23] Da kelen-kelen tun bɛ Alabatosoba ni yɔrɔ senuma senuma bɛɛ la.
[24] Kon fila-fila tun bɛ u bɛɛ kelen-kelen na. Olu tun bɛ kuru. Kon fila, da kelen. Kon fila tun bɛ da dɔ fana la.
[25] Serubɛn bisigiw ni ntamaro sun bisigiw tun dilara Alabatosoba konw la i ko kogo taw. Jiri gwa dɔ tun bɛ bulonɲɛ fɛ kɛnɛma.
[26] Finɛtiriw banabililenw ni ntamaro sun bisigiw fana tun bɛ o la i ko bulon ta ani Alabatosoba lamini bonw ta.