[1] Ne ye filɛli kɛ. A filɛ, fɛn dɔ tun bɛ o serubɛnw kunna furancɛ san fɛ. A tun bɛ i ko safir kabakurun, o bɔlen tun bɛ masasigilan fɛ.
[2] O tuma la lenfu fini tun bɛ cɛ min na, Matigi y'a fɔ o ye ko: «Sen koolilen minw bɛ serubɛnw jukɔrɔ, i ka don olu cɛma. I ka i bolo fa takami la ka bɔ serubɛnw furancɛ la. I ka taa u bɔn dugu kan.» Ayiwa, ne y'a taatɔ ye.
[3] A taa tuma la, serubɛnw jɔlen tora Alabatosoba kinin yanfan fɛ. Sankaba ye dukɛnɛ yɔrɔw bɛɛ fa.
[4] O tuma la, Matigi nɔɔrɔ wulila ka bɔ serubɛnw san fɛ ka taa Alabatosoba da kun na. Sankaba ye Alabatosoba fa k'a sɔrɔ Matigi nɔɔrɔ manamanatɔ bɛ dukɛnɛ yɔrɔw bɛɛ la.
[5] Serubɛnw kamanfuraw ye mankan bɔ ka taa se fo dukɛnɛ la. O kan tun bɛ i ko Sebaayabɛɛtigi Ala kumakan.
[6] Lenfu fini tun bɛ cɛ min na, Matigi y'a fɔ o ye tuma min na ko a ka takami cɛ serubɛnw jukɔrɔ senw cɛma, o cɛ taara ka i jɔ o sen koolilenw kɛrɛ fɛ.
[7] O kɔ, serubɛn kelen y'a bolo mɔɔnɔbɔ serubɛnw cɛma tasuma fan fɛ ka o takami cɛ. Lenfu fini tun bɛ cɛ min na, a ye o takami kɛ o cɛ tɛgɛ la. O cɛ ye o minɛ ka taa.
[8] Ne ye bolo dɔ ye serubɛnw kamanw jukɔrɔ i ko mɔgɔ bolo.
[9] Ne ye filɛli kɛ ko kura, ne ye sen koolilen naani ye serubɛnw kɛrɛ fɛ. Sen koolilen kelen-kelen tun bɛ u bɛɛ kelen-kelen kɔrɔ. O sen koolilenw bɔlen tun bɛ krisolite kabakurun fɛ.
[10] O sen naani bɛɛ ye cogo ka kan. O senw bɛɛ donnen tun bɛɲɔgɔn kɔnɔ.
[11] Ni u tun bɛ taa, u tun bɛ taa u fan naani bɛɛ fɛ, u tun tɛ yɛlɛma. U tun bɛ taa u ɲɛ sin fan fɛ, u tun tɛ yɛlɛma.
[12] O serubɛnw fariw yɔrɔ bɛɛ tun ye ɲɛkisɛw ye, u kɔ ni u bolow ni u kamanw ani u jukɔrɔ sen koolilenw yɔrɔw bɛɛ tun ye ɲɛkisɛw ye ka u lamini. O serubɛn naani bɛɛ sen tun bɛ u jukɔrɔ.
[13] Ayiwa ne ye o sen koolilenw tɔgɔ fɔkan mɛn, ko «fununfununba tɛlimaw.»
[14] Ɲɛda naani tun bɛ o fɛnɲɛnamaw bɛɛ kelen-kelen na. Ɲɛda fɔlɔ tun ye serubɛnɲɛda ye, ɲɛda filanan tun ye mɔgɔɲɛda ye, ɲɛda sabanan tun ye warabaɲɛda ye, ɲɛda naaninan tun ye bɔnɲɛda ye.
[15] O kɔ, o serubɛnw wulila. Ne ye fɛnɲɛnama minw ye Kebar ba da la, olu don.
[16] Ni serubɛnw tun bɛ taama, u senw tun bɛ munumunu u kɛrɛ fɛ. Ni serubɛnw ye u kamanfuraw sɛɛnɛ ko u bɛ wuli ka bɔ duguma, o sen koolilenw tun tɛ bɔ u la.
[17] Ni u ye u jɔ, senw fana bɛ jɔ. Ni u bɛ pan, u ni senw bɛ wuliɲɔgɔn fɛ k'a masɔrɔ ni min tun bɛ o fɛnɲɛnamaw la, o ni kelen tun bɛ o senw fana la.
[18] Matigi nɔɔrɔ wulila ka bɔ Alabatosoba da kun na ka i sigi serubɛnw san fɛ.
[19] Serubɛnw ye u kamanw sɛɛnɛ ka wuli ka bɔ duguma neɲɛ na. U senw tun bɛ u la ka taa. U taara jɔ Matigi batosoba donda kɔrɔn yanfan fɛ. Israɛl ka Ala nɔɔrɔ tun bɛ u san fɛ.
[20] Ne tun ye fɛnɲɛnama naani minw ye Israɛl ka Ala jukɔrɔ Kebar ba da la, olu don. Ne y'a dɔn ko u ye serubɛnw ye.
[21] Ɲɛda naani ani kamanfura naani tun bɛ u bɛɛ kelen-kelen na. Mɔgɔ bolo bisigi tun bɛ u kamanfuraw jukɔrɔ.
[22] U ɲɛda bɔlen tun bɛ olu fɛ. Ne ye fɛnɲɛnama minw ye Kebar ba da la, u ye cogo bɛɛ tun ka kan, olu yɛrɛw don. U bɛɛ kelen-kelen tun bɛ taa u kuntilenna fɛ.