[1] Matigi bolo tun bɛ ne kan, a ye ne taa ni la ka taa ni ne ye jɛkɛnɛ dɔ la. O falen tun bɛ mɔgɔ kolow la.
[2] O kɔ, a taara ni ne ye ka o kolow lamini. Ne y'a ye ko o kolow tun ka ca jɛkɛnɛ fan bɛɛ la, u jalen tun bɛ kosɛbɛ.
[3] A y'a fɔ ne ye ko: «Hadamaden, yala nin kolow bɛ se kaɲɛnamaya tun wa?» Ne y'a jaabi ko: «Matigi Ala, e yɛrɛ de bɛ o dɔn.»
[4] O tuma la a y'a fɔ ne ye ko: «I ka kiraya kɛ o kolow ko la k'a fɔ u ye ko: ‹Kolo jalanw, aw ka Matigi ka kuma lamɛn.›
[5] Matigi Ala y'a fɔ o kolow ye ko: ‹Ne na ni don aw la, aw naɲɛnamaya ko kura.
[6] Ne na fasa don aw la ka sogo da aw kan ka aw sogow datugu ni wolo ye. Ne na ni don aw la, aw naɲɛnamaya ko kura. Aw n'a dɔn ko ne ye Matigi de ye.›»
[7] Ayiwa ne ye kiraya kɛ i ko a tun fɔra ne ye cogo min na. Ka ne to kiraya kɛli la, mankan bɔra, lamagaliba kɛra. O tuma la o kolow gɛrɛlaɲɔgɔn na ka tuguɲɔgɔn na.
[8] Ne ye filɛli kɛ k'a ye ko fasaw ni sogo donna u la ka u datugu ni wolow ye. Nka ni tun tɛ u la.
[9] O tuma la a y'a fɔ ne ye ko: «Hadamaden, i ka kiraya kɛ k'a fɔ ni ye ko Matigi Ala ko: ‹Ni, i ka na ka bɔ fiɲɛ fan naani bɛɛ la ka don nin suw la walisa u kaɲɛnamaya ko kura.›»
[10] Ne ye kiraya kɛ i ko a tun fɔra ne ye cogo min na. Ni donna u la. U ɲɛnamayara ka wuli ka u jɔ u sen na. U kɛra kɛlɛboloba dama dɔnbali ye.
[11] Matigi y'a fɔ ne ye ko: «Hadamaden, nin kolow bɛɛ ye Israɛl ka so mɔgɔw ye. U y'a fɔ ko: ‹An kolow jara, an jigi tigɛra, an tɛ se ka foyi kɛ.›
[12] Ayiwa, i ka kiraya kɛ k'a fɔ u ye ko, Matigi Ala ko: ‹Ne ka mɔgɔw, ne na aw kaburuw dayɛlɛ ka aw labɔ aw kaburuw kɔnɔ ka taa ni aw ye Israɛl jamana kɔnɔ.
[13] Ne ka mɔgɔw, ni ne ye aw kaburuw dayɛlɛ ka aw labɔ aw kaburuw kɔnɔ, o tuma la aw n'a dɔn ko ne ye Matigi de ye.
[14] Ne na ne Ni don aw la, aw naɲɛnamaya. Ne na aw lasigi aw ka dugukolo kan ko kura hɛrɛ la. Aw n'a dɔn ko ne, Matigi ye layidu min ta aw ye, ne ye o dafa.›» Matigi ko ten.
[15] Matigi ka kuma sera ne ma ko kura ko:
[16] «Hadamaden, i ka bere dɔ ta ka nin sɛbɛn o kan, ko: ‹Juda ni a jɛɲɔgɔnw Israɛl bɔnsɔn ta.› I ka bere wɛrɛ ta ka nin sɛbɛn o kan, ko: ‹Yusufu ta, Efrayim ka bere ani a jɛɲɔgɔnw Israɛl bɔnsɔn bɛɛ ta.›
[17] I ka olu tuguɲɔgɔn na ka u kɛ bere kelen ye i tɛgɛ kɔnɔ.
[18] «Ni i ka mɔgɔw ye i ɲininka ko: ‹I tɛ nin ko kɛlen kɔrɔ fɔ an ye wa?›
[19] I ka u jaabi ko ne, Matigi Ala ko, Yusufu ka bere min bɛ Efrayim ni Israɛl bɔnsɔn bolo, ne na o tugu Juda ka bere la ka u kɛ bere kelen ye. U na kɛ kelen ye ne tɛgɛ kɔnɔ.
[20] «I bɛ sɛbɛnni kɛ bere minw kan, olu ka kɛ i bolo u ɲɛ kɔrɔ.
[21] I k'a fɔ u ye ko Matigi Ala ko: ‹Israɛl bɔnsɔn, ne na aw sama ka bɔ aw taa yɔrɔw la siyaw cɛma, ne na aw lajɛɲɔgɔn fɛ ka aw lasegin aw yɛrɛw ka jamana kɔnɔ.›
[22] Ne na u kɛ siya kelen ye o jamana kɔnɔ Israɛl kuluw kan. Masakɛ kelen na sigi u bɛɛ kun na. U tɛna kɛ siya fila ye tun, u tɛna tila ka kɛ masaya fila ye tun.
[23] U tɛna u yɛrɛw nɔgɔ ni u ka boli batoli ni u ka ko haramulenw ni u ka sariya tiɲɛn kow si ye tun. U ye tilenbaliya ko minw kɛ u sigiyɔrɔw la, ne na olu bɛɛ yafa u ma ka u saniya. U na kɛ ne ka mɔgɔw ye, ne na kɛ u ka Ala ye.
[24] Ne ka jɔnkɛ Dawuda na sigi u kun na. Saga gɛnna kelen na sigi u kun na. U na ne ka ci fɔlenw mara ka ne ka ko latigɛlenw sira taama ka u kɛ.
[25] Ne ye jamana min di ne ka jɔnkɛ Yakuba ma, ni u bɛnbaw sigilen tun bɛ o kɔnɔ, u na sigi yen. U ni u denw ni u mɔdenw na sigi yen badaa. Ne ka jɔnkɛ Dawuda na kɛ u kuntigi ye kudayi.
[26] Ne na hɛrɛ layidu ta u ye, o na kɛ layidu wulibali ye u ni ne cɛ. Ne na u lasigi yen ka u jiidi. Ne na ne ka yɔrɔ senuma sigi u cɛma tuma bɛɛ.
[27] Ne sigiyɔrɔ na kɛ u cɛma. Ne na kɛ u ka Ala ye, u na kɛ ne ka mɔgɔw ye.
[28] O tuma la siyaw n'a dɔn ko ne ye Matigi ye, ko ne ye Israɛl saniya, sabu ne ka yɔrɔ senuma na kɛ u cɛma badaa.»