[1] O kɔ, ne ye neɲɛminɛbaa pɛrɛnkan mɛn, ko: «Aw minw na tɔɔrɔ lase nin dugu ma, aw ka na. Aw bɛɛ kelen-kelen ka na ni aw ka kɛlɛkɛ minanw ye aw bolo.»
[2] Ayiwa, dugu donda min bɛ saheli yanfan fɛ, ne ye cɛ wɔɔrɔ natɔ ye o fan fɛ ni u ka kɛlɛkɛ minanw ye u bolo. Cɛ kelen tun bɛ u cɛma, lenfu fini tun bɛ o la. Sɛbɛnnikɛla ka lankiri bara dulonnen tun bɛ a kɛrɛ la. U donna ka u jɔ nsiranɛgɛ saraka bɔlan kɛrɛ fɛ.
[3] O kɛlen, Israɛl ka Ala nɔɔrɔ min tun bɛ serubɛnw kun na, o wulila ka bɔ yen ka taa Alabatosoba donda la. Lenfu fini tun bɛ cɛ min na, ni sɛbɛnnikɛla ka lankiri bara dulonnen tun bɛ a kɛrɛ la, Matigi ye o wele k'a fɔ o ye ko:
[4] «I ka taa Jerusalɛm dugu yaala. Cɛ minw bɛ nwunan ka kasi ko haramulen kɛlenw bɛɛ kosɔn dugu kɔnɔ, i ka taamashyɛn da olu ten na.»
[5] O kɔ, a y'a fɔ mɔgɔ tɔw ye neɲɛ na ko: «Aw ka don ale nɔ fɛ dugu kɔnɔ ka mɔgɔw gosi. Aw kana hinɛ u la, aw kana makari u la.
[6] Aw ka cɛkɔrɔbaw ni kamalenw ni npogotigiw ni denmisɛnw ani musow bɛɛ faga ka u ban pewu. Nka taamashyɛn bɛ minw tenw na, aw kana se olu si ma. Aw ka a daminɛ ne ka yɔrɔ senuma la.» Ayiwa, cɛkɔrɔba minw tun bɛ Alabatosobaɲɛ fɛ, u y'a daminɛ olu la.
[7] A y'a fɔ u ye ko: «Aw ka Alabatosoba nɔgɔ ka dukɛnɛ yɔrɔ bɛɛ fa mɔgɔ suw la. A' ye taa sa.» O tuma la u taara ka dugu kɔnɔ mɔgɔw gosi ka u faga.
[8] Ka u to mɔgɔ fagali la, ne tun bɛ ne dan na yen. Ne ye ne bi ka neɲɛ biri duguma ka kasi ko: «E, Matigi Ala, i na Israɛl bɔnsɔn tɔ tolenw bɛɛ faga ka i ka dimiya lase Jerusalɛm ma wa?»
[9] A y'a fɔ ne ye ko: «Israɛl bɔnsɔn ni Juda bɔnsɔn ka tilenbaliya kow bonyara fo ka dama tɛmɛn. Jamana yɔrɔw bɛɛ fara mɔgɔ joli la, dugu yɔrɔw bɛɛ fara tilenbaliya kow la. K'a masɔrɔ u b'a fɔ ko Matigi ye jamana bila, ko Matigi ɲɛ tɛ foyi la.
[10] O de kosɔn ne tɛ se ka hinɛ u la, ne tɛna makari u la. Ne na u ka tilenbaliya jalaki bi u yɛrɛw kun.»
[11] Ayiwa, lenfu fini tun bɛ cɛ min na, ni lankiri bara dulonnen tun bɛ a kɛrɛ la, o nana a fɔ ko: «I ye ci min fɔ ne ye, ne ye o kɛ.»