[1] Matigi ka kuma sera ne ma ko:
[2] «Hadamaden, i sigilen bɛ mɔgɔ murutilenw cɛma. Ɲɛ bɛ u la nka u tɛ yeli kɛ. Tulo bɛ u la nka u tɛ mɛnni kɛ, k'a masɔrɔ so murutilen don.
[3] «E kɔni, Hadamaden, i ka i ka kunfɛtaa minanw labɛn u bɛɛ ɲɛ na tile fɛ. I sigilen bɛ yɔrɔ min na, i ka bɔ yen ka taa yɔrɔ wɛrɛ la u ɲɛ na. A dɔrɔ u n'a dɔn ko u ye so murutilen de ye.
[4] I ka i ka minanw labɔ tile gwan fɛ u ɲɛ na i ko kunfɛtaa minan. I yɛrɛ ka bɔ wula fɛ u ɲɛ na i ko mɔgɔ min bɛ taa jɔnya la.
[5] I ka dugu kogo sɔgɔ u ɲɛ na ka i ka minanw bɔ o kogo sɔgɔ da fɛ.
[6] I ka i ka minanw da i kan na su fɛ u ɲɛ na ka taa. I ka i ɲɛ datugu fo i tɛ se ka jamana ye sabu ne b'a fɛ i ka kɛ taamashyɛn ye Israɛl bɔnsɔn ka so ye.»
[7] Ayiwa, a ye min fɔ ne ye, ne ye o kɛ ka ne ka doniw labɔ tile gwan fɛ i ko kunfɛtaa minanw. Su kolen, ne ye dugu kogo sɔgɔ ni ne yɛrɛ bolo ye ka ne ka doniw ta dibi la ka o da ne kan na u ɲɛ na ka taa.
[8] O dugusajɛ, sɔgɔma da fɛ, Matigi ka kuma sera ne ma, ko:
[9] «Hadamaden, Israɛl ka so, nin so murutilen kɔni, a ma i ɲininka ko, i bɛ mun kɛ wa?
[10] I ka u jaabi ko, Matigi Ala ko: ‹Nin kiraya kuma bɛ fɔ Jerusalɛm kuntigiba ani Israɛl ka so bɛɛ ko la, olu minw bɛ nin dugu kɔnɔ.
[11] I k'a fɔ u ye ko i kɛra taamashyɛn ye u ye, ko i ye min kɛ, o bɔɲɔgɔnko na kɛ u la. U na gɛn ka taa jɔnya la ka kɛ jɔnw ye.
[12] U ka kuntigi yɛrɛ na a ka doni da a kaman na ka taa dibi la. A na kogo sɔgɔ ka bɔ o wo fɛ ka a ɲɛ datugu walisa a ɲɛ kana jamana ye.
[13] Ne na ne ka jan da a ɲɛ, a na minɛ ne ka juru la. Ne na taa ni a ye Babilonɛ, Kalde jamana la nka a tɛna o jamana ye, a na sa yen.
[14] Minw bɛ a lamini k'a kɔlɔsi, ne na olu ni a ka kɛlɛkɛ cɛw bɛɛ jɛnsɛn fiɲɛ fɛ ka u nɔgɛn ni npan ye.
[15] Ni ne ye u jɛnsɛn siyaw cɛma ka taa jamana caman kɔnɔ tuma min na, u n'a dɔn ko ne ye Matigi de ye.
[16] O bɛɛ n'a ta ne na u la dɔɔnin mara ka u kisi npan ni kɔngɔba ani fiɲɛbana ma walisa olu bɛ taa sigi siya minw bɛɛ cɛma, u ka u ka ko haramulenw bɛɛ lakali yen. U n'a dɔn ko ne ye Matigi de ye.›»
[17] O kɔ, Matigi ka kuma sera ne ma ko:
[18] «Hadamaden, i yɛrɛyɛrɛtɔ ka i ka dumuni kɛ ka minni kɛ ni hakiliɲaami ni siran ye.
[19] I k'a fɔ jamana kɔnɔ mɔgɔw ye ko, ne, Matigi Ala ye min fɔ Jerusalɛmkaw ni Israɛl ka jamana ko la, o filɛ nin ye, ko u hakiliɲaaminen na dumuni kɛ, u ja tigɛlen na ji min, sabu jamana kɔnɔ nafolo bɛɛ na cɛ a kɔnɔ mɔgɔw ka binkanniw kosɔn.
[20] Dugu mɔgɔmaw na kɛ tomonw ye, jamana na lankolonya. Aw n'a dɔn ko ne ye Matigi de ye.»
[21] Matigi ka kuma sera ne ma ko:
[22] «Hadamaden, mun y'a to ntalen bɛ aw fɛ Israɛl jamana la, ko: ‹Waati caman tɛmɛnna, kiraya kow si ma dafa?›
[23] O de kosɔn i k'a fɔ u ye ko Matigi Ala ko: ‹Ne na o ntalen ban, u tɛna a kɛ ntalen ye Israɛl la tun. Nka i k'a fɔ u ye ko kiraya kow bɛɛ dafa waati surunyara.
[24] Kiraya kuma fufafu wala lafilili taamashyɛn si tɛna fɔ Israɛl bɔnsɔn ka sow kɔnɔ tun.
[25] Sabu ne, Matigi bɛ kuma, ne bɛ kuma minw fɔ, olu bɛɛ na kɛ ka dafa joona. Ayiwa Israɛl ka so murutilen, ne bɛ kiraya kuma min fɔ aw tilew la, ne na o kɛ k'a dafa.›» Matigi Ala ko ten.
[26] Matigi ka kuma sera ne ma ko kura ko:
[27] «Hadamaden, Israɛl ka so bɛ min fɔ, o filɛ nin ye, ko: ‹Kira bɛ fɛn yeta minw ye, olu ye waati jan ko ye.›
[28] O de kosɔn i k'a fɔ u ye ko ne, Matigi Ala ko: ‹Ne ka kuma si tɛna mɛn tun ni a ma kɛ. Ne ye min fɔ, o na kɛ.›» Matigi Ala ko ten.