[1] Ayiwa Ala dubara Nuhun ni a denkɛw ye k'a fɔ u ye ko: «Aw ka den caman sɔrɔ ka caya ka dugukolo fa.
[2] Dugukolo kan fɛnɲɛnamaw ni sanfɛ kɔnɔw ani fɛn o fɛn bɛ fofo dugukolo kan, ani ji la jɛgɛw, olu bɛɛ na siran ka jɔrɔ aw ɲɛ. U donna aw bolo.
[3] Fɛnɲɛnama lamagataw bɛɛ na kɛ aw ka dumuni fɛn ye. Ne ye u bɛɛ di aw ma, i ko ne ye suman di aw ma cogo min na.
[4] Nka sogo ni a ɲɛnamaya, o kɔrɔ, ni a joli bɛ a la, aw kana o dun.
[5] Aw joli, o kɔrɔ, aw ɲɛnamaya, ne na ɲininkali kɛ o ko la, siga t'a la. Ne na dantan fɛnw bɛɛ ɲininka o ko la ka mɔgɔ fana ɲininka. Ne na mɔgɔ ɲininka a balima ɲɛnamaya ko la.
[6] Ni min ye mɔgɔ faga, o tigi na faga mɔgɔ fɛ, katuguni Ala ye mɔgɔ da a yɛrɛ ja la.
[7] Aw kɔni, aw ka den caman sɔrɔ ka jiidi. Aw ka bange sɔrɔ ka caya dugukolo kan.»
[8] Ala kumana Nuhun ni a denkɛw fɛ, a ko:
[9] «A filɛ, ne bɛ ne ka layidu ta aw ye ani aw bɔnsɔn minw bɛ na aw kɔ.
[10] Fɛnɲɛnama minw bɛ aw fɛ yen, kɔnɔw ni baganw ani dugukolo kan sogo minw bɛ aw fɛ yen, ne bɛ ne ka layidu ta olu bɛɛ fana ye, dugukolo kan fɛn o fɛn min bɔra kurunba kɔnɔ.
[11] Ne na ne ka layidu ta aw ye, ko farisogo bɛɛ tɛna halaki ji belebeleba fɛ tun. Ji belebeleba tɛna kɛ ka dugukolo halaki tun.»
[12] Ala ko: «Ne bɛ layidu min ta k'a kɛ ne ni aw cɛ ani fɛnɲɛnama minw bɛɛ bɛ aw fɛ aw bɔnsɔn nataw bɛɛ la, o taamashyɛn filɛ nin ye.
[13] Ne bɛ Ala ka murujan kɛ sankaba la, o na kɛ layidu taamashyɛn ye ne ni dugukolo cɛ.
[14] Ayiwa ni ne ye san fin dugukolo kun na, o tuma la Ala ka murujan na kɛ sankaba la.
[15] Ne ka layidu min bɛ ne ni aw ni fɛnɲɛnamaw bɛɛ cɛ, ne hakili na to o la. Ji belebeleba tɛna na dugukolo kan ka farisogo bɛɛ halaki tun.
[16] Ala ka murujan na kɛ sankaba la, ne na o filɛ. Layidu wulibali min tara ne ni dugukolo kan fɛnɲɛnamaw bɛɛ cɛ, ne hakili na to o la.»
[17] Ala y'a fɔ Nuhun ye ko: «Ne ye layidu min ta k'a kɛ ne ni dugukolo kan farisogo bɛɛ cɛ, o taamashyɛn don.»
[18] Nuhun denkɛ minw bɔra kurunba kɔnɔ, olu tɔgɔw ko Sɛm ni Kam ani Jafɛt. Kam tun ye Kanan fa ye.
[19] O mɔgɔ saba tun ye Nuhun denkɛw ye. U bɔnsɔnw jɛnsɛnna dugukolo yɔrɔ bɛɛ la.
[20] Nuhun ye sɛnɛ kɛ daminɛ. A ye rezɛn sunw turu ka kɛ tu ye.
[21] A ye diwɛn min ka ɲɛnamini, a farilankolon tun don a ka finiso kɔnɔ.
[22] Kanan fa Kam ye a fa farilankolon ye ka o fɔ a balimakɛ fila ye kɛnɛma.
[23] Sɛm ni Jafɛt ye fini dɔ ta ka a bila u kamankun kan ka taa u kɔ kan ka u fa farilankolon datugu. U ye u kɔ sin u fa ma, u ma a farilankolon ye.
[24] Diwɛn ye Nuhun bila, a ɲɛma tigɛra tuma min na, a denkɛ dɔgɔmanni ye min kɛ a la, a ye o dɔn.
[25] A ko: «Kanan dangalen bɛ. A na kɛ jɔnw ka jɔn ye a balimakɛw fɛ.»
[26] A ko fana: «Matigi ka tanu, Sɛm ka Ala kɔni. Kanan ka kɛ u ka jɔn ye.
[27] Ala ka Jafɛt jiidi. A ka sigi Sɛm ka finisow kɔnɔ. Kanan ka kɛ u ka jɔn ye.»
[28] Ji belebeleba tɛmɛnnen kɔ, Nuhun ye san kɛmɛ saba ni san biduuru sɔrɔ.
[29] Nuhun si tilew bɛɛ tun ye san kɛmɛ kɔnɔntɔn ni san biduuru ye, a sara.