[1] Yusufu y'a fɔ a ka so kunnasigibaa ye ko: «Cɛw ka bɔrɛw fa ɲɔ la kosɛbɛ ka cɛw bɛɛ kelen-kelen ka wari bila ɲɔ kan u ka bɔrɛw kɔnɔ.
[2] I ka ne ka warijɛ jifilen ni ɲɔ sɔngɔ bila u bɛɛ dɔgɔni ka bɔrɛ kɔnɔ.» Yusufu ye min fɔ, so kunnasigibaa ye o kɛ.
[3] O dugusajɛ kɛnɛbɔda fɛ, cɛw ni u ka faliw bilara ka taa.
[4] U bɔlen kɔ dugu kɔnɔ, sani u ka janfa, Yusufu y'a fɔ a ka so kunnasigibaa ye ko: «Wuli ka taa o cɛw nɔ fɛ. Ni i kura u la tuma min na, i k'a fɔ u ye ko: ‹Mun y'a to aw ye ko ɲuman sara ni ko jugu ye?
[5] Ne matigi ka minni jifilen tɛ aw kun wa? A bɛ filɛli kɛ ni a ye fana. Aw ye ko jugu kɛ dɛ.›»
[6] So kunnasigibaa kura u la ka o kuma fɔ u ye.
[7] U y'a fɔ a ye ko: «Mun y'a to ne matigi bɛ kuma ten? Ala ma i ka jɔnw kisira o ma!
[8] A filɛ, an tun ye wari min sɔrɔ an ka bɔrɛw kɔnɔ, an bɔra ni olu ye Kanan jamana la ka na di i ma. An dun bɛ se ka wari wala sanu sonya ka bɔ i matigi ka so kɔnɔ cogo di?
[9] Ni jifilen yera i ka jɔn min kun, o ka sa, an fana na kɛ ne matigi ka jɔnw ye.»
[10] So kunnasigibaa ko: «Ayiwa, aw ye min fɔ, o ka kɛ. Ni a yera min kun, o na kɛ ne ka jɔn ye, aw tɔw na jo sɔrɔ.»
[11] U ye u tɛliya, cɛw bɛɛ kelen-kelen ye u ka bɔrɛw jigin duguma. U bɛɛ kelen-kelen ye u ka bɔrɛw da foni.
[12] So kunnasigibaa ye ɲinili kɛ k'a daminɛ kɔrɔkɛ ta la ka taa bila u bɛɛ dɔgɔkɛ ta la. Jifilen yera Benjamɛn ka bɔrɛ kɔnɔ.
[13] U ye u ka finiw fara. U bɛɛ kelen-kelen ye u ka faliw ɲun ka kɔsegin dugu kɔnɔ.
[14] Juda ni a balimaw taara Yusufu ka so, k'a sɔrɔ a bɛ yen fɔlɔ. U y'u bi duguma a ɲɛ kɔrɔ.
[15] Yusufu y'a fɔ u ye ko: «Aw ye mun ko sifa kɛ? Aw m'a dɔn ko ne bɔɲɔgɔnko mɔgɔ bɛ se ka filɛli kɛ wa?»
[16] Juda ko: «An na mun fɔ ne matigi ye? An na kuma cogo di? Ala ye i ka jɔnw ka tilenbaliya ko bɔ kɛnɛ kan. A filɛ, an bɛɛ ye ne matigi ka jɔnw ye, an, ani jifilen yera min kun fana.»
[17] Yusufu ko: «Ala ma ne kisira o ma! Jifilen yera min kun, o na kɛ ne ka jɔn ye. Aw kɔni, aw tɔw ka taa aw faso la hɛrɛ la.»
[18] Juda gɛrɛla a la k'a fɔ a ye ko: «Ne matigi, ne bɛ i deli, i k'a to i ka jɔn ka kuma ne matigi fɛ. I kana dimin i ka jɔn kɔrɔ, sabu i ni Faraon ka kan.
[19] Ne matigi ye a ka jɔnw ɲininka yala ni fa wala balima bɛ an fɛ.
[20] An y'a fɔ ne matigi ye ko an fa kɔrɔba bɛ yen, den sinnaban bɛ a fɛ, a kɔrɔlen ye o bange. O kɔrɔkɛ sara, a kelenpe tora a ba kɔ, a ko ka di a fa ye.
[21] I y'a fɔ i ka jɔnkɛw ye ko an ka na n'a ye i yɔrɔ yan, walisa i ka i ɲɛ da a kan.
[22] An y'a fɔ ne matigi ye ko cɛni tɛ se ka fara a fa la, katuguni ni a farala a fa la, a fa na sa.
[23] I y'a fɔ i ka jɔnw ye ko ni an dɔgɔkɛ ma na an fɛ, an tɛna i ɲɛda ye tun.
[24] Ayiwa, an sera i ka jɔnkɛ, ne fa yɔrɔ, an ye ne matigi ka kuma lakali a ye.
[25] An fa ko an ka taa ko kura ka ɲɔ dɔɔnin san an ye.
[26] An ko an tɛ se ka taa, fɔ ni an dɔgɔkɛ taara an fɛ, o tuma la an bɛ se ka taa, sabu an tɛ se ka i ɲɛda ye fɔ ni an dɔgɔkɛ bɛ an fɛ.
[27] I ka jɔnkɛ, an fa, y'a fɔ an ye ko an y'a dɔn ko a muso ye denkɛ fila bange a ye.
[28] U kelen bɔra a kɔrɔ, a ko o farafarala, siga t'a la, a ma a ye tun.
[29] A ko ni an ye nin fana minɛ ka bɔ a kɔrɔ, ni bɔnɛ ye o sɔrɔ, an na a kunsigi jɛlen lajigin ni ɲɛnasisi ye lahara.
[30] O de y'a to ni ne sera i ka jɔnkɛ, ne fa yɔrɔ, ni cɛni tɛ an fɛ, k'a sɔrɔ u fila bɛ i n'a fɔ u niw sirila ɲɔgɔn na,
[31] ni a y'a ye ko cɛni tɛ an fɛ, a na sa. I ka jɔnkɛw na i ka jɔnkɛ, an fa kunsigi jɛlen lajigin ni ɲɛnasisi ye lahara.
[32] I ka jɔnkɛ kɛra cɛni kotigi ye k'a fɔ ko ni ne ma taa n'a ye a yɔrɔ la, o tuma la ne na jalaki ne fa ɲɛ kɔrɔ badaa.
[33] O de y'a to ne b'i deli, i k'a to i ka jɔn ka to yan cɛni nɔ na ka kɛ ne matigi ka jɔn ye, k'a to cɛni ka taa a kɔrɔkɛw fɛ.
[34] Ne bɛ se ka taa ne fa yɔrɔ cogo di, ni cɛni tɛ ne bolo? Ne tɛ se ka ne fa makariko kɛta ye.»