[1] Ayiwa Ibrahima kɔrɔla kosɛbɛ. Matigi dubara Ibrahima ye fɛn bɛɛ la.
[2] Ibrahima y'a fɔ a bolo fɛnw bɛɛ kɔlɔsibaa jɔn cɛkɔrɔba ye ko: «I ka i bolo da ne woro kɔrɔ.
[3] Ne bɛ i wajibiya ko i ka i kali Matigi sankolola Ala ni dugukolo kan Ala la, ko ne sigilen bɛ Kananka minw cɛma, i tɛna olu denmusow si ta ka kɛ ne denkɛ muso ye.
[4] Nka i ka taa ne faso la ka muso ta ne denkɛ Isaka ye ka bɔ ne balimaw la.»
[5] A ka jɔnkɛ y'a fɔ a ye ko: «Ni muso ma sɔn ka na ne fɛ nin jamana la, ne ka kan ka kɔsegin ka taa ni i denkɛ ye i faso la wa?»
[6] Ibrahima y'a fɔ a ye ko: «I kana kɔsegin ka taa ni ne denkɛ ye yen fewu!
[7] Matigi, sankolola Ala, o min ye ne labɔ ne fa ka so, ne bange jamana la, ka kuma ne fɛ ka i kali ne ye ko a na nin jamana di ne bɔnsɔn ma, o yɛrɛ na a ka mɛlɛkɛ ci i ɲɛ. I na muso ta ne denkɛ ye ka bɔ yen.
[8] Ni o muso ma sɔn ka na i fɛ, o tuma la i na hɔrɔnya ne ka kalili ma. Nka i kana kɔsegin ka taa ni ne denkɛ ye yen fewu.»
[9] Ibrahima ka jɔnkɛ y'a bolo da a makɛ woro kɔrɔ ka i kali a ye o ko la.
[10] Ibrahima ka jɔnkɛ ye ɲaamɛ tan minɛ ka bɔ a makɛ ka ɲaamɛw la ka a makɛ bolo fɛnw bɛɛ la ɲuman dɔw ta a bolo. A wulila ka taa Mɛsopotami jamana la ka se Nakɔr ka dugu kɔnɔ.
[11] A ye ɲaamɛw ɲɔngiri dugu kɔ fɛ kɔlɔn da la wula da fɛ, musow ka ji ta tuma la.
[12] A ko: «Matigi, ne makɛ Ibrahima ka Ala, ne b'i deli, i ka ne ka koɲɛw nɔgɔya bi, ka ko ɲuman kɛ ne makɛ Ibrahima ye.
[13] Ne jɔlen filɛ ji boyi da la. Dugu kɔnɔ denmusow natɔ don ka ji ta.
[14] Ni ne y'a fɔ npogotigi min ye ko ne b'a deli, a ka a ka dun jiman jigin, ne ka ne min, ni o ye ne jaabi ko ne ka ne min, ko a na ne ka ɲaamɛw fana min, o ka kɛ i ka muso ɲɛnatɔmɔlen ye i ka jɔnkɛ Isaka ye. Ne n'a dɔn o de la ko i ye ko ɲuman kɛ ne makɛ ye.»
[15] Sani a ka tila o kuma la, Bɛtuɛl denmuso Rebɛka nana, a ka dun b'a kamankun na. Bɛtuɛl tun ye Ibrahima balimakɛ Nakɔr muso Milka denkɛ ye.
[16] O denmuso cɛ tun ka ɲi kosɛbɛ. Npogotigi tun don, cɛ si tun m'a dɔn. A taara ji boyi da la ka a ka dun fa, ka bɔ yen.
[17] Ibrahima ka jɔnkɛ bolila k'a kunbɛn k'a fɔ a ye ko: «Ne bɛ i deli, i ka i ka dun na ji dɔ di ne ma, ne ka ne min.»
[18] A y'a jaabi ko: «I min, ne matigi.» A y'a ka dun jigin joona k'a minɛ a bolo la, o cɛ k'i min.
[19] Cɛ tilalen kɔ minni la, npogotigi ko: «Ne na ji dɔ bɔ i ka ɲaamɛw fana ye ka u min.»
[20] A y'i tɛliya ka a ka dun kɔnɔ ji yɛlɛma bagan min waaro kɔnɔ, ka taa kɔlɔn da la ka ji bɔ a ka ɲaamɛw bɛɛ ye.
[21] O cɛ ɲɛ jɔlen tora a la, a y'i makun k'a filɛ yala ni Matigi y'a ka taama diya.
[22] Ɲaamɛw tilalen kɔ minni la, o cɛ ye sanu nunna nɛgɛ bɔ. O giriya bɛ sanu sikle tilancɛ bɔ, ani sanu bolokana nɛgɛ fila, olu giriya tun bɛ sanu sikle tan bɔ.
[23] A y'a fɔ a ye ko: «Ne bɛ i ɲininka, i ye jɔni denmuso ye? An si yɔrɔ bɛ sɔrɔ i fa ka so wa?»
[24] Npogotigi y'a jaabi ko: «Ne ye Milka ni Nakɔr denkɛ Bɛtuɛl denmuso ye.»
[25] A y'a fɔ fana ko: «So bin ni baganw ka dumuni fɛn bɛ an fɛ yen, o na aw bɔ. Si yɔrɔ fana bɛ yen.»
[26] O tuma la o cɛ y'i biri k'a ɲɛ biri duguma ka Matigi bato.
[27] A ko: «Matigi, ne makɛ Ibrahima ka Ala ka tanu. A ma a ka ɲumaya ni a ka kantigiya mabɔ ne makɛ la. Ne kɔni, Matigi ye ne ɲɛ minɛ ka se ne makɛ balimaw ka so.»
[28] Npogotigi bolila ka taa o kow fɔ a ba so mɔgɔw ye.
[29] Balimakɛ dɔ tun bɛ Rebɛka fɛ, o tɔgɔ ko Laban. Laban bolila ka taa o cɛ yɔrɔ, ji boyi da la.
[30] A ye sanu nunna nɛgɛ ye ka sanu bolokana nɛgɛw ye a balimamuso bolow la, ka a balimamuso ka kuma mɛn ko o cɛ kumana a fɛ ten. Laban taara o cɛ yɔrɔ. A jɔlen tun bɛ ɲaamɛw kɛrɛ fɛ ji boyi da la.
[31] Laban ko: «I ka don so kɔnɔ, Matigi ka dubaden. Mun y'a to i b'i jɔ kɛnɛma? Ne ye so labɛn i ye ka si yɔrɔ labɛn i ka ɲaamɛw fana ye.»
[32] O cɛ donna so kɔnɔ. Laban ye ɲaamɛw la doni jigin ka bin ni dumuni di ɲaamɛw ma, ka sen ko ji di o cɛ ni a fɛ mɔgɔw ma.
[33] O kɔ, Laban ye dumuni sigi u kɔrɔ ko u ka dumuni kɛ. Nka o cɛ ko: «Ne tɛna dumuni kɛ sani ne ka ne na kun fɔ.» Laban ko: «A fɔ.»
[34] O cɛ ko: «Ne ye Ibrahima ka jɔnkɛ ye.
[35] Matigi dubara ne makɛ ye kosɛbɛ, a jiidira. A ye misiw ni bagan misɛnw di a ma, ani warijɛ ni sanu, ani jɔnkɛw ni jɔnmusow, ani ɲaamɛw ni faliw.
[36] Ne makɛ muso Saran kɔrɔlen ye denkɛ bange ne makɛ ye. A y'a bolo fɛnw di o denkɛ ma.
[37] Ne makɛ ye ne wajibiya ko ne ka ne kali ko a sigilen bɛ Kananka minw cɛma, ko ne kana olu denmusow si ta ka kɛ a denkɛ muso ye.
[38] Nka a ko ne ka na a faso la ka muso ta a denkɛ ye ka bɔ a balimaw cɛma.
[39] Ne y'a fɔ ne makɛ ye ko ni muso ma sɔn ka taa ne fɛ dun?
[40] A ye ne jaabi ko ale bɛ taama Matigi min ɲɛ kɔrɔ, o na a ka mɛlɛkɛ ci ne ɲɛ, ka ne ka taama diya, ko ne ka muso ta a denkɛ ye ka bɔ a balimaw la a faso la.
[41] Ko ni ne sera a so mɔgɔw fɛ tuma min na, ne na hɔrɔnya a ka kalili ma. Ko ni u ma sɔn ka a di ne ma fana, ne na hɔrɔnya a ka kalili ma.
[42] «Ne sera ji boyi da la bi. Ne ko: ‹Matigi, ne makɛ Ibrahima ka Ala, ni i sɔnna ka ne ka taama diya,
[43] ne jɔlen filɛ ji boyi da la. Npogotigi min bɛ na ka ji bɔ, ni ne y'a fɔ o ye ko a k'a dun na ji dɔɔnin di ne ma,
[44] ni o y'a fɔ ko ne ka ne min, ko a na ji bɔ ne ka ɲaamɛw fana ye, o ka kɛ Matigi ka muso ɲɛnatɔmɔlen ye ne makɛ denkɛ ye.›
[45] Sani ne ka tila o kuma la ne kɔnɔ, a filɛ, Rebɛka nana, a ka dun b'a kamankun na. A jiginna ka taa ji boyi da la ka ji soli. Ne y'a fɔ a ye ko a ka ji dɔ di ne ma, ne ka ne min.
[46] A y'i tɛliya ka a ka dun jiman jigin ka bɔ a kamankun na, ko ne ka ne min, ko a na ji di ne ka ɲaamɛw fana ma. Ne ye ne min, a ye ɲaamɛw fana min.
[47] Ne y'a ɲininka ko a ye jɔni den ye? A ko ale ye Nakɔr ni Milka denkɛ Bɛtuɛl denmuso ye. Ne ye sanu nunna nɛgɛ don a nun na ka sanu bolokana nɛgɛw don a bolow la.
[48] O kɔ, ne ye ne kun biri duguma ka Matigi bato, ka Matigi, ne makɛ Ibrahima ka Ala tanu, o min ye ne ɲɛ minɛ ka ne bila sira ɲuman kan, walisa ne ka ne makɛ balima denmuso ta a denkɛ ye.
[49] Ayiwa, ni aw b'a fɛ ka ko ɲuman ni kantigiya jira ne makɛ la, aw ka o fɔ ne ye. Ni aw tɛ sɔn, aw ka o fana fɔ ne ye, walisa ne ka ne yɛlɛma kinin wala numan fɛ.»
[50] O tuma la Laban ni Bɛtuɛl y'a jaabi ko: «Nin ko bɔra Matigi de la. An tɛ se ka ko ɲuman wala ko jugu fɔ i ye.
[51] Rebɛka filɛ i kɔrɔ. A ta ka taa, a ka kɛ i makɛ denkɛ muso ye, i ko Matigi y'a fɔ cogo min na.»
[52] Ibrahima ka jɔnkɛ ye u ka kuma mɛn tuma min na, a y'a ɲɛ biri duguma Matigi ɲɛ kɔrɔ.
[53] Jɔnkɛ ye warijɛ masiriw ni sanu masiriw ani finiw bɔ ka u di Rebɛka ma, ka fɛn saramaw di a balimakɛ ni a ba fana ma.
[54] O kɔ, jɔnkɛ ni a fɛ mɔgɔw ye dumuni kɛ ka minni kɛ ka si yen. U wulila sɔgɔma da fɛ minkɛ, jɔnkɛ ko: «A' ye ne bila ka kɔsegin ne makɛ yɔrɔ.»
[55] Npogotigi balimakɛ ni a ba ko: «I ka npogotigi to an fɛ yan dɔɔnin, ka tile tan ɲɔgɔn kɛ, o kɔ, a na taa.»
[56] A y'u jaabi ko: «Aw kana ne bali ka taa, k'a masɔrɔ Matigi ye ne ka taama diya. Aw ka ne bila ka taa ne makɛ ka so.»
[57] U ko: «An ka npogotigi wele ka a yɛrɛ ɲininka.»
[58] U ye Rebɛka wele k'a fɔ a ye ko: «I bɛ sɔn ka taa nin cɛ fɛ wa?» A ko: «Ɔwɔ.»
[59] U ye u balimamuso Rebɛka ni a lamɔbaa ani Ibrahima ka jɔnkɛ ni a ka mɔgɔw bila ka taa.
[60] U ye dubaw kɛ Rebɛka ye k'a fɔ a ye ko: «An balimamuso, i ka kɛ mɔgɔ waa tan sigi yɔrɔma waa caman ye. I bɔnsɔnw ka u koniyabaaw ka dugu donda tigiya sɔrɔ.»
[61] Rebɛka ni a ka jɔnmusow wulila ka yɛlɛn ɲaamɛw kan ka tugu o cɛ nɔ fɛ. Ayiwa, Ibrahima ka jɔnkɛ taara ni Rebɛka ye.
[62] Isaka kɔseginna ka bɔ Lakayi-roi kɔlɔn yanfan fɛ, a sigilen tun bɛ worodugu yanfan fɛ jamana la.
[63] Don dɔ wula fɛ Isaka bɔra ka taa kungo la ka i miiri. A y'a ɲɛ kɔrɔta ka filɛli kɛ ka ɲaamɛw natɔ ye.
[64] Rebɛka y'a ɲɛ kɔrɔta ka Isaka ye tuma min na, a jiginna ka bɔ ɲaamɛ kan.
[65] A y'a fɔ Ibrahima ka jɔnkɛ ye ko: «Cɛ jumɛn bɛ yaala la kungo kɔnɔ ka na an kunbɛn?» Jɔnkɛ ko: «Ne makɛ don.» O tuma la Rebɛka ye a kunna birilan ta ka o biri a kun na.
[66] Jɔnkɛ ye a ka ko kɛlenw bɛɛ lakali Isaka ye.
[67] Isaka taara ni Rebɛka ye a ba Saran ka finiso kɔnɔ. A y'a furu k'a kanu. Isaka dusu saalola a ba saya ko la.