[1] Matigi y'a fɔ Abrama ye ko: «I ka bɔ i ka jamana la, ani i ka siya mɔgɔw ni i faso la. Ne na jamana min jira i la, i ka taa yen.
[2] Ne na i kɛ siyaba ye ka duba i ye ka i tɔgɔ bonya. Duba na sɔrɔ i la.
[3] Minw bɛ duba ta i ye, ne na duba olu ye. Minw bɛ i danga, ne na olu danga. Dugukolo kan gwaw bɛɛ na duba sɔrɔ i la.»
[4] Abrama taara i ko Matigi y'a fɔ a ye cogo min na. Lɔti fana taara a fɛ. Abrama ye san biwolonwula ni duuru sɔrɔ a bɔ tuma la Karan jamana la.
[5] Abrama ye a muso Sarayi ni a balima denkɛ Lɔti ta, ani a ka nafolo sɔrɔlen bɛɛ ni a ka jɔnw bɛɛ, a tun ye minw sɔrɔ k'a to Karan. U bɔra yen ka taa Kanan jamana la. Ayiwa u sera Kanan jamana la.
[6] Abrama ye jamana cɛ tigɛ ka se yɔrɔ dɔ la min tɔgɔ ko Sisɛm, a taara fo ka se More sensun jiriw ma. O waati la Kanankaw tun bɛ o jamana la.
[7] Matigi y'i jira Abrama la k'a fɔ a ye ko: «Ne na nin jamana di i bɔnsɔn ma.» Matigi ye i jira a la yen. Abrama ye saraka bɔlan jɔ Matigi ye o yɔrɔ la.
[8] Abrama bɔra yen ka taa kulu kan, Bɛtɛl kɔrɔn yanfan fɛ. A ye a ka finisow jɔ ka Bɛtɛl to a tilebi yanfan fɛ, ka Ayi to a kɔrɔn yanfan fɛ. A ye saraka bɔlan jɔ Matigi ye o yɔrɔ la fana, ka Matigi tɔgɔ wele.
[9] O kɔ, Abrama taara ɲɛ a ka taama la ka taa worodugu yanfan fɛ.
[10] Kɔngɔ donna o jamana la. Abrama taara Misira jamana la ka sigi yen, k'a masɔrɔ kɔngɔ tun juguyara jamana la.
[11] A surunyalen Misira jamana la, a y'a fɔ a muso Sarayi ye ko: «A filɛ, ne y'a dɔn ko i ye muso cɛɲi ye.
[12] Ayiwa, ni Misirakaw y'i ye tuma min na, u n'a fɔ ko i ye ne muso ye. U na ne faga, ka i ɲɛnama to.
[13] Ne b'i deli, i k'a fɔ ko i ye ne balimamuso ye, walisa u ka ne minɛ ko ɲuman i kosɔn, ani ne ɲɛnama ka to i kosɔn.»
[14] Abrama sera Misira jamana la tuma min na, Misirakaw y'a ye ko o muso cɛ ka ɲi kosɛbɛ.
[15] Faraon ka mɔgɔbaw y'a ye fana, u y'a tanu Faraon ɲɛ na. U taara ni o muso ye Faraon ka so.
[16] Faraon ye ko ɲuman kɛ Abrama ye o muso kosɔn. Abrama ye sagaw ni misiw ni falikɛw ni falimusow ni jɔnkɛw ni jɔnmusow ani ɲaamɛw sɔrɔ.
[17] Nka Matigi ye Faraon ni a ka so gosi ni tɔɔrɔ kobaw ye Abrama muso Sarayi kosɔn.
[18] O tuma la Faraon ye Abrama wele k'a fɔ ko: «I ye mun kɛ ne la sa? Mun y'a to i m'a fɔ ne ye ko i muso don?
[19] Mun y'a to i y'a fɔ ne ye ko i balimamuso don? O de kosɔn ne ko ne n'a furu. I muso filɛ sa. I k'a ta ka taa n'a ye.»
[20] Faraon ye ci fɔ a ka mɔgɔw ye a ko la. U ye Abrama ni a muso ani a ka fɛnw bɛɛ bilasira.