[1] Saran ye san kɛmɛ ni mugan ani san wolonwula sɔrɔ. Olu kɛra Saran si san dama ye.
[2] Saran sara Kirjat-Arba, o ye Heborɔn de ye, o bɛ Kanan jamana la. Ibrahima taara ka a sanga kɛ ka a su kasi.
[3] Ibrahima wulila ka bɔ a ka su kɔrɔ ka taa kuma Hɛti bɔnsɔn fɛ, ko:
[4] «Ne ye dunan ni siginfɛ ye aw cɛma. A' ye sudon yɔrɔ di ne ma aw fɛ yan, walisa ne ka ne muso su don ka bɔ ne ɲɛ kɔrɔ.»
[5] Hɛti bɔnsɔnw ye Ibrahima jaabi ko:
[6] «Ne matigi, an ka kuma lamɛn. I ye Ala ka mɔgɔ tɔgɔba ye an cɛma. I ka i muso su don an ka sudon yɔrɔ bɛɛ la ɲuman la. An ka mɔgɔ si tɛna ban ka a ka sudon yɔrɔ di i ma, walisa i ka i ka su don.»
[7] Ibrahima wulila ka i biri o jamana mɔgɔw ɲɛ kɔrɔ, Hɛti bɔnsɔnw kɔni.
[8] A y'a fɔ u ye ko: «Ni aw bɛ sɔn ne ka ne muso su don yan, a' ye ne lamɛn ka Zokar denkɛ Efrɔn deli ne ye,
[9] ko a ka Makipela kuluwo di ne ma, o ye a ta ye, a bɛ a ka foro dan na, ko a k'a feere ne ma ka kɛɲɛ ni a sɔngɔ hakɛ ye, walisa a ka kɛ ne ka sudon yɔrɔ ye aw cɛma.»
[10] Efrɔn sigilen tun bɛ Hɛti bɔnsɔnw cɛma. Hɛti bɔnsɔn Efrɔn ye Ibrahima jaabi Hɛti bɔnsɔnw ɲɛ na ani a ka dugu dafɛ donbaaw bɛɛ ɲɛ na, ko:
[11] «Ayi, ne matigi, ne lamɛn sa. Ne bɛ o foro ni a kuluwo di i ma. Ne bɛ u di i ma ne ka mɔgɔw ɲɛ na. I ka i ka su don.»
[12] Ibrahima ye i biri o jamana mɔgɔw ɲɛ kɔrɔ.
[13] A y'a fɔ Efrɔn ye o jamana mɔgɔw ɲɛ na ko: «Ne b'i deli, i ka ne lamɛn. Ne na foro sɔngɔ di i ma, i ka sɔn o ma. Ne na ne muso su don yen.»
[14] Efrɔn ye Ibrahima jaabi ko:
[15] «Ne matigi, ne lamɛn. Wari sikle kɛmɛ naani dugukolo ye mun ye ne ni i cɛ? I ka i muso su don.»
[16] Ibrahima sɔnna Efrɔn ka kuma ma. Efrɔn ye wari dama min ko fɔ, Ibrahima ye o pese k'a di a ma Hɛti bɔnsɔnw ɲɛ na, o tun ye wari sikle kɛmɛ naani ye, ka kɛɲɛ ni jagokɛlaw ka jateli ye.
[17] Efrɔn ka foro min tun bɛ Makipela ni o bɛ Mamre kuntilenna la, o foro ni a kuluwo ani a jiriw bɛɛ, ani jiri minw tun bɛ a lamini la,
[18] olu bɛɛ kɛra Ibrahima ta ye Hɛti bɔnsɔnw ɲɛ na ani a ka dugu dafɛ donbaaw ɲɛ na.
[19] O kɔ, Ibrahima ye a muso Saran su don Makipela foro kuluwo la, Mamre kuntilenna la, o ye Heborɔn ye, o bɛ Kanan jamana la.
[20] O foro ni a kuluwo kɛra Ibrahima ta ye ka kɛ sudon yɔrɔ ye, a sanna Hɛti bɔnsɔnw fɛ.