[1] O kɔ, Yakuba ye sira minɛ ka taa se kɔrɔn fɛ mɔgɔw ka jamana la.
[2] O yɔrɔ nin bɛɛ a ye kɔlɔn dɔ ye kungo la. Sagakulu dalen tun bɛ o da la, k'a masɔrɔ mɔgɔw tun bɛ sagaw lamin o kɔlɔn na. O kɔlɔn datugulen tun bɛ ni kabakurunba ye.
[3] Sagakuluw bɛɛ tun bɛ lajɛ ɲɔgɔn fɛ yen. Mɔgɔw tun bɛ o kabakurun kolonkolon ka bɔ kɔlɔn da la ka sagaw lamin, o kɔ, ka kabakurun kɔsegin a nɔ na ka kɔlɔn datugu.
[4] Yakuba y'a fɔ saga gɛnnaw ye ko: «Ne balimaw, aw bɔra min?» U y'a jaabi ko: «An ye Karankaw ye.»
[5] A y'a fɔ u ye ko: «Aw bɛ Nakɔr denkɛ Laban dɔn wa?» U ko: «An b'a dɔn.»
[6] A y'a fɔ u ye ko: «A ka kɛnɛ wa?» U ko: «A ka kɛnɛ. A denmuso Rasɛl natɔ filɛ ni a ka sagaw ye.»
[7] Yakuba ko: «Nin waati ye tile gwan ye. Bagan lajɛ tuma ma se fɔlɔ. Aw ka sagaw lamin, ka taa n'u ye gɛn yɔrɔ la.»
[8] U y'a jaabi ko: «An tɛ se ka o kɛ sani sagakuluw bɛɛ ka lajɛ. O tuma la mɔgɔw bɛ kabakurun kolonkolon ka bɔ kɔlɔn da la, k'a sɔrɔ ka sagaw lamin.»
[9] Ka Yakuba to kuma la u fɛ, Rasɛl nana ni a fa ka sagakulu ye, k'a masɔrɔ ale tun ye u gɛnbaa ye.
[10] Ayiwa, Yakuba ye a bɛnkɛ Laban denmuso Rasɛl ye tuma min na, ka a bɛnkɛ Laban ka sagakulu ye, a gɛrɛla ka kabakurun kolonkolon ka bɔ kɔlɔn da la, ka a bɛnkɛ Laban ka sagakulu lamin.
[11] Yakuba ye Rasɛl da susu, o kɔ ka kasi.
[12] Yakuba y'a fɔ Rasɛl ye ko ale ye a fa dɔgɔmuso den ye, ko ale ye Rebɛka denkɛ ye. Rasɛl bolila ka taa o fɔ a fa ye.
[13] Kabini Laban ye a dɔgɔmuso denkɛ kibaru mɛn, a bolila ka taa a kunbɛn, k'i meleke a la k'a da susu, ka taa n'a ye a ka so. Yakuba ye o kow bɛɛ lakali Laban ye.
[14] Laban y'a fɔ a ye ko: «Siga t'a la, i ye ne kolo ni ne farisogo ye.» Yakuba ye kalo kelen kɛ Laban fɛ.
[15] O kɔ, Laban y'a fɔ Yakuba ye ko: «Balimaya n'a to i ka baara kɛ ne ye gwansan wa? I ka sara na kɛ min ye, o fɔ ne ye.»
[16] Denmuso fila tun bɛ Laban fɛ. Denmuso fɔlɔ tɔgɔ ko Lea, denmuso dɔgɔmanni tɔgɔ ko Rasɛl.
[17] Lea ɲɛw tun man ɲi, nka Rasɛl cɛ tun ka ɲi, a ɲɛda fana cɛ tun ka ɲi.
[18] Rasɛl ko diyara Yakuba ye haali. A ko: «Ne bɛ san wolonwula baara kɛ i ye i denmuso dɔgɔmanni Rasɛl kosɔn.»
[19] Laban ko: «K'a di i ma, o ka fisa a dili ye cɛ wɛrɛ ma. I ka to ne fɛ yan.»
[20] Yakuba ye baara kɛ san wolonwula Rasɛl kosɔn. O sanw kɛra tile dama dɔɔnin ye a ɲɛ na o muso diyaɲe kosɔn.
[21] O kɔ, Yakuba y'a fɔ Laban ye ko: «Ne muso di ne ma, walisa ne ka don a fɛ, k'a masɔrɔ ne ka waati fɔlen dafara.»
[22] Laban ye yen mɔgɔw bɛɛ lajɛ ka dumuniba dila u ye.
[23] Wula da selen, Laban taara ni a denmuso Lea ye Yakuba yɔrɔ. Yakuba donna a fɛ.
[24] Laban ye a ka jɔnmuso Zilpa di a denmuso Lea ma ka kɛ o ka jɔnmuso ye.
[25] Dugu jɛlen, a filɛ, Lea tun don. Yakuba y'a fɔ Laban ye ko: «I ye mun kɛ ne la tan? Ne ma baara kɛ i ye Rasɛl kosɔn wa? Mun na i ye ne janfa?»
[26] Laban ko: «Ka dɔgɔmuso di a kɔrɔmuso ɲɛ, o tɛ se ka kɛ ka kɛɲɛ ni an ka laada ye.
[27] I ka dɔgɔkun tɔ kɛ nin fɛ, an na a dɔgɔmuso fana di i ma. I ka san wolonwula wɛrɛ baara kɛ ne ye a kosɔn.»
[28] Yakuba y'a kɛ ten. A ye o dɔgɔkun tɔ kɛ Lea fɛ. O kɔ, Laban y'a denmuso Rasɛl di a ma ka kɛ a muso ye.
[29] Laban ye a ka jɔnmuso Bilha di a denmuso Rasɛl ma ka kɛ o ka jɔnmuso ye.
[30] Yakuba donna Rasɛl fana fɛ. Rasɛl ko tun ka di a ye ka tɛmɛn Lea kan. A ye baara kɛ Laban ye san wolonwula wɛrɛ kɔnɔ.
[31] Matigi y'a ye ko Lea mangoyara, a ye bange di a ma, nka Rasɛl kɛra kɔna ye.
[32] Lea ye kɔnɔ ta ka denkɛ bange. A y'o tɔgɔ da ko Rubɛn, sabu a ko: «Matigi ye ne dusu kasi ko ye. Sisan ne ko na diya ne cɛ ye.»
[33] A ye kɔnɔ ta ko kura ka denkɛ bange. A ko: «Matigi y'a mɛn ko ne mangoyara, a ye nin denkɛ fana di ne ma.» A y'o tɔgɔ da ko Simeɔn.
[34] A ye kɔnɔ ta ko kura ka denkɛ bange. A ko: «Nin sen in na ne cɛ na nɔrɔ ne la, k'a masɔrɔ ne ye denkɛ saba sɔrɔ a ye.» O de y'a to a y'o tɔgɔ da ko Levi.
[35] A ye kɔnɔ ta ko kura ka denkɛ bange, a ko: «Nin sen in na, ne na Matigi tanu.» O de y'a to a y'o tɔgɔ da ko Juda. O kɔ, a ka bange jɔra.