[1] Israɛl wulila ka a bolo fɛnw bɛɛ ta ka taa. A sera Beɛr-Seba. A ye sarakaw lase a fa Isaka ka Ala ye yen.
[2] Ala kumana Israɛl fɛ jirali fɛn na su fɛ, a ko: «Yakuba, Yakuba.» Israɛl ko: «Naamu.»
[3] Ala ko: «Ne ye Ala ye, i fa ka Ala. I kana siran Misira taali ɲɛ, k'a masɔrɔ ne na i kɛ siyaba ye yen.
[4] Ne yɛrɛ bɛ taa i fɛ Misira, ne yɛrɛ bɛna na ni i ye yan ko kura, siga t'a la. I sa tuma la Yusufu na i ɲɛw datugu.»
[5] Yakuba wulila ka bɔ Beɛr-Seba ka taa. Faraon ye wotoro minw ci ka u ta, Israɛl denkɛw ye u fa Yakuba ni u ka denmisɛnw ani u musow ta olu la.
[6] U taara ni u ka bagankuluw ye ani u ye fɛn minw sɔrɔ Kanan jamana la. Ayiwa, Yakuba ni a ka denbaya bɛɛ sera Misira.
[7] A taara Misira ni a denkɛw ni a denmusow ni a mɔdenw ani a so mɔgɔw bɛɛ ye.
[8] Israɛl denkɛ minw nana Misira, olu tɔgɔw filɛ ninw ye: Yakuba ni a denkɛw. Yakuba denkɛ fɔlɔ: Rubɛn.
[9] Rubɛn denkɛw: Henɔk ni Palu ni Hɛzrɔn ani Karmi.
[10] Simeɔn denkɛw: Jemuɛl ni Jamɛn ni Ohad ni Jakan ani Zokar, ani Kananka muso denkɛ Saul.
[11] Levi denkɛw: Gersɔn ni Kɛhat ani Mɛrari.
[12] Juda denkɛw: Er ni Onan ni Sela ni Perɛz ani Zerak. Nka Er ni Onan sara ka u to Kanan jamana la. Perɛz denkɛw tun ye Hɛzrɔn ni Hamul ye.
[13] Isakar denkɛw: Tola ni Puva ni Job ani Simron.
[14] Zabulɔn denkɛw: Serɛd ni Elɔn ani Jaleɛl.
[15] Lea ye denkɛ minw bange Yakuba ye k'a to Padan-Aram ani a denmuso Dina, u tɔgɔw filɛ olu ye. A denkɛw ni a denmusow bɛɛ kɛra mɔgɔ bisaba ni saba ye.
[16] Gad denkɛw: Sifjɔn ni Haji ni Suni ni Ezbɔn ni Eri ni Arodi ani Areɛli.
[17] Asɛr denkɛw: Jimna ni Jisiva ni Jisivi ani Beria, olu ni u balimamuso Serak. Beria denkɛw: Hebɛr ni Malkiɛl.
[18] Zilpa ye denkɛ minw bange Yakuba ye, olu don. Laban tun ye Zilpa di a denmuso Lea ma. O denw bɛɛ kɛra mɔgɔ tan ni wɔɔrɔ ye.
[19] Yakuba muso Rasɛl denkɛw: Yusufu ni Benjamɛn.
[20] Yusufu denkɛ minw bangera Misira jamana la, olu tun ye Manase ni Efrayim ye. On sarakalasebaa Poti-Fera denmuso Asenat ye u bange Yusufu ye.
[21] Benjamɛn denkɛw: Bela ni Bekɛr ni Asbɛl ni Gera ni Naman ni Ehi ni Rɔs ni Mupim ni Hupim ani Ard.
[22] Yakuba bɔnsɔn minw sɔrɔla Rasɛl fɛ, olu don. U bɛɛ kɛra mɔgɔ tan ni naani ye.
[23] Dan denkɛ ye Husim ye.
[24] Nefitali denkɛw: Jatzeɛl ni Guni ni Jezɛr ani Silɛm.
[25] Yakuba bɔnsɔn minw sɔrɔla Bilha fɛ, olu don. U bɛɛ kɛra mɔgɔ wolonwula ye. Laban tun ye Bilha di a denmuso Rasɛl ma.
[26] Yakuba ka denbaya minw taara a fɛ Misira, olu bɛɛ kɛra mɔgɔ biwɔɔrɔ ni wɔɔrɔ ye, a denkɛw musow sen t'o la.
[27] Yusufu denkɛ minw bangera a ye Misira, olu tun ye mɔgɔ fila ye. Yakuba ka so mɔgɔ minw sera Misira, olu bɛɛ kɛra mɔgɔ biwolonwula ye.
[28] Yakuba ye Juda ci ka taa a ɲɛ Yusufu yɔrɔ ko a ka Gosɛn sira jira a la. U sera Gosɛn jamana la.
[29] Yusufu ye a ka wotoro labɛn ka don a kɔnɔ ka taa a fa Israɛl kunbɛn Gosɛn. Yusufu ye a fa ye tuma min na, a y'i meleke a kan na ka kasi ka mɛn.
[30] Israɛl y'a fɔ Yusufu ye ko: «Ne ka sa sisan, sabu ne ye i ɲɛda ye k'a dɔn ko i bɛ ni la halibi.»
[31] Yusufu y'a fɔ a balimakɛw ni a fa ka so mɔgɔw ye ko: «Ne bɛ taa ka aw ko fɔ Faraon ye, ko ne balimaw ni ne fa ka so mɔgɔ minw tun bɛ Kanan jamana la, olu nana ne da fɛ.
[32] Ko o mɔgɔw ye bagan gɛnnaw ye, bagantigiw don. Ko u nana ni u ka bagan misɛnw ni u ka bagan kunbaw ani u bolo fɛnw bɛɛ ye.
[33] Ni Faraon ye aw wele k'a fɔ ko aw ka baara ye mun ye,
[34] o tuma la aw k'a fɔ ko: ‹I ka jɔnw, an ni an faw ye bagantigiw ye kabini an denmisɛnma fo ka na bila bi la.› O cogo la aw na sigi Gosɛn jamana la, katuguni bagan gɛnnaw bɛɛ ye Misirakaw tana ye.»