[1] Matigi hakili tora a ka kuma fɔlen na Saran ye. Matigi tun ye min fɔ, a ye o kɛ Saran ye.
[2] Saran ye kɔnɔ ta ka denkɛ bange Ibrahima kɔrɔlen ye ka kɛɲɛ ni Ala ka waati latigɛlen fɔlen ye.
[3] Saran ye denkɛ min bange Ibrahima ye, Ibrahima ye o tɔgɔ da ko Isaka.
[4] Ibrahima y'a denkɛ Isaka boloko a bange tile segin, i ko Ala tun y'a fɔ a ye cogo min na.
[5] Ibrahima si tun bɛ san kɛmɛ la a denkɛ Isaka bange tuma la.
[6] Saran ko: «Ala ye yɛlɛ sababu di ne ma. A mɛnbaaw bɛɛ na yɛlɛ ne fɛ.»
[7] A ko fana: «Jɔni tun bɛ se k'a fɔ Ibrahima ye ko Saran na sin di denw ma? O bɛɛ n'a ta ne ye denkɛ bange a kɔrɔlen ye.»
[8] Den bonyara, a da bɔra sin na. Isaka da bɔra sin na don min na, Ibrahima ye dumuniba dila a ye o don na.
[9] Misiraka muso Agar tun ye denkɛ min bange Ibrahima ye, Saran ye o yɛlɛtɔ ye Isaka la.
[10] Saran y'a fɔ Ibrahima ye ko: «I ka o jɔnmuso ni a denkɛ gɛn, k'a masɔrɔ o jɔnmuso denkɛ ni ne denkɛ Isaka tɛna ciyɛn ta ɲɔgɔn fɛ.»
[11] O kuma digira Ibrahima la kosɛbɛ a denkɛ kosɔn.
[12] Nka Ala y'a fɔ Ibrahima ye ko: «Cɛni ni i ka jɔnmuso ko kana digi i la. Saran bɛ min fɔ i ye, i ka sɔn o bɛɛ ma, k'a masɔrɔ i bɔnsɔn na wele Isaka de la.
[13] I ka jɔnmuso denkɛ kɔni, ne na siya bɔ o fana la, k'a masɔrɔ i bɔnsɔn dɔ don.»
[14] Ibrahima solila ka wuli ka dumuni ni foroko jiman ta ka u di Agar ma, a y'a dulon Agar kɛrɛ la. A ye Agar denkɛ fana di a ma, k'a bila ka taa. A taara ka yaala Beɛr-Seba kungokolon kɔnɔ.
[15] Foroko kɔnɔ ji bannen kɔ, Agar ye a den to jirisun misɛn dɔ kɔrɔ,
[16] ka taa i sigi o kuntilenna la, ka u furancɛ kɛ kala bon ko kelen furancɛ ye, k'a masɔrɔ a ko: «Ne kana ne den satɔ ye.» O de kosɔn a y'i sigi a kuntilenna la ka kasi kosɛbɛ.
[17] Ala ye cɛni kasikan mɛn. Ala ka mɛlɛkɛ y'i to sankolo la ka Agar wele k'a fɔ a ye ko: «Agar, mun kɛra? I kana siran, k'a masɔrɔ ka cɛni to o yɔrɔ la, Ala y'a kan mɛn.
[18] Wuli ka cɛni ta i bolo la, ne na a kɛ siyaba ye.»
[19] Ala ye Agar ɲɛ yɛlɛ, o ye kɔlɔn jiman dɔ ye. A taara a ka foroko fa o ji la, ka cɛni min.
[20] Ala tora cɛni fɛ, a bonyara. A sigira kungokolon kɔnɔ ka kɛ bonnikɛ kala dɔnbaa ye.
[21] A sigira Paran kungokolon kɔnɔ. A ba ye muso ta a ye ka bɔ Misira jamana la.
[22] O tuma la Abimelɛk ni a ka kɛlɛbolo kuntigi Pikɔl kumana Ibrahima fɛ ko: «Ala bɛ i fɛ i ka kɛtaw bɛɛ la.
[23] Ayiwa, sisan i ka i kali Ala la ko i tɛna ne janfa, ko i tɛna ne denw wala ne mɔdenw fana janfa, ko i na ko ɲuman kɛ ne ni i sigi jamana ye, i ko ne ye ko ɲuman kɛ i ye cogo min na.»
[24] Ibrahima ko: «Ne na ne kali.»
[25] Nka Abimelɛk ka jɔnkɛw tun ye kɔlɔn min bɔsi Ibrahima la, Ibrahima ye Abimelɛk kɔrɔfɔ o kosɔn.
[26] Abimelɛk y'a jaabi ko: «Ne ma o kɛbaa dɔn. I tun m'a fɔ ne ye, ne fana ma bɔ a kala ma fo bi.»
[27] Ibrahima ye sagaw ni nturaw di Abimelɛk ma. U fila ye layidu ta ɲɔgɔn ye.
[28] Ibrahima ye saga geren wolonwula bɔ sagakulu la ka u bila u dan na.
[29] Abimelɛk y'a fɔ Ibrahima ye ko: «I ye saga geren wolonwula minw bila u dan na, o kun ye mun ye?»
[30] Ibrahima y'a jaabi ko: «I ka nin saga wolonwula minɛ ne bolo, o na kɛ seere ye ko ne ye nin kɔlɔn sen.»
[31] O de y'a to o yɔrɔ tɔgɔ ko Beɛr-Seba, k'a masɔrɔ u ye u kali ɲɔgɔn ye o yɔrɔ la.
[32] O cogo la u ye layidu ta ɲɔgɔn ye Beɛr-Seba. O kɔ, Abimelɛk ni a ka kɛlɛbolo kuntigi Pikɔl wulila ka kɔsegin ka taa Filisitikaw ka jamana la.
[33] Ibrahima ye tamarisik sun turu Beɛr-Seba. A ye Matigi Ala banbali bato yen.
[34] Ibrahima sigira Filisitikaw ka jamana la ka waati jan kɛ.