[1] Ayiwa sankolo ni dugukolo ni u fɛnw bɛɛ banna dila la.
[2] Tile wolonwulanan don, Ala tilalen kɔ a ka baara kɛlen na, a y'i lafiya tile wolonwulanan don na a ka baara kɛlen bɛɛ la.
[3] Ala dubara tile wolonwulanan ye k'a saniya, katuguni Ala ye baara min kɛ ka fɛnw da, a ye i lafiya o bɛɛ la o don na.
[4] Sankolow ni dugukolo dara tuma min na, u daminɛ cogo filɛ o ye.
[5] Matigi Ala ye dugukolo ni sankolow dila don min na, kungokɔnɔ jiri si tun tɛ dugukolo kan fɔlɔ, kungokɔnɔ bin si tun ma falen fɔlɔ katuguni Matigi Ala tun ma sanji lana dugukolo kan fɔlɔ. Dugukolo sɛnɛkɛbaa fana tun tɛ yen.
[6] Nka bugun tun bɛ wuli ka bɔ duguma ka dugukolo yɔrɔ bɛɛ sɔn.
[7] Matigi Ala ye cɛ dila dugukolo buguri la ka ɲɛnamaya ninakili don a nunwow fɛ ni a yɛrɛ dafiɲɛ ye. O cɛ kɛra mɔgɔ ɲɛnama ye.
[8] Ayiwa Matigi Ala ye nakɔtu dila Edɛn na kɔrɔn yanfan fɛ. A ye a ka cɛ dilalen bila o kɔnɔ.
[9] Jiri o jiri cɛ ka ɲi, ni dumuni bɛ sɔrɔ a la, Matigi Ala ye olu sifa bɛɛ falen ka bɔ duguma. Ɲɛnamaya jiri fana kɛra nakɔtu cɛmancɛ la, ani ko ɲuman ni ko jugu dɔnniya jiri.
[10] Baji dɔ bɔra Edɛn na ka nakɔtu sɔn. A farala ka kɛ ba bolo naani ye o yɔrɔ la.
[11] Ba fɔlɔ tɔgɔ ko Pisɔn. O de bɛ Havila jamana bɛɛ lamini. Sanu bɛ yen.
[12] O jamana sanu ye sanu yɛrɛwolo ye. Bidelium ni onikis kabakurun fana bɛ yen.
[13] Ba filanan tɔgɔ ko Gihɔn. O bɛ Kus jamana bɛɛ lamini.
[14] Ba sabanan tɔgɔ ko Tigire. O bɛ woyo ka taa Asiri jamana kɔrɔn yanfan fɛ. Ba naaninan ye Ufrate de ye.
[15] Matigi Ala ye o cɛ bila Edɛn nakɔtu la, ko a ka a sɛnɛ ka a kɔlɔsi.
[16] Matigi Ala ye nin ci fɔ cɛ ye ko: «I bɛ se ka nakɔtu la jiridenw bɛɛ dun,
[17] nka i kana ko ɲuman ni ko jugu dɔnniya jiriden dun. Ni i ye o den dun don min na, i na sa dɛ.»
[18] Matigi Ala ko: «Cɛ ka to a kelen na, o man ɲi. Ne na a bɔ ɲɔgɔnko dɛmɛbaa dila a ye.»
[19] Matigi Ala ye kungo sogow ni sanfɛ kɔnɔw bɛɛ dila ka u bɔ dugukolo la ka na ni u ye cɛ ma k'a filɛ ni a bɛ u wele cogo min na. Cɛ ye tɔgɔ minw da fɛnɲɛnamaw la, o kɛra u tɔgɔw ye.
[20] Cɛ ye baganw ni sanfɛ kɔnɔw ni kungo sogow bɛɛ tɔgɔw da, nka cɛ bɔɲɔgɔnko dɛmɛbaa ma sɔrɔ a ye olu la.
[21] Matigi Ala ye sunɔgɔba bila cɛ la. K'a sunɔgɔlen to, Ala ye cɛ galakakolo kelen ta ka a farisogo kɛ o nɔ na ka o wo datugu.
[22] Matigi Ala ye galakakolo min ta ka bɔ cɛ la, a ye o kɛ muso ye ka na n'a ye cɛ yɔrɔ la.
[23] Cɛ ko: «Sisan nin ye ne kolow la kelen de ye, ne farisogo dɔ don. A tɔgɔ na da ko muso, katuguni a bɔra cɛ la.»
[24] O de y'a to cɛ na a fa ni a ba bila ka nɔrɔ a muso la, u na kɛ farisogo kelen ye.
[25] Cɛ ni muso farilankolon tun don, u ma maloya dɔn.