[1] Rasɛl y'a ye ko a ma den si bange Yakuba ye, a kɔrɔmuso keleya donna a la o denw kosɔn. A y'a fɔ Yakuba ye ko: «Denw di ne ma, wala ne bɛ sa.»
[2] Yakuba diminna Rasɛl kɔrɔ, a ko: «Ne bilara Ala nɔ na wa? Ale de ye i bali bange la.»
[3] Rasɛl ko: «Ne ka jɔnmuso Bilha filɛ. I ka don a fɛ, walisa a ka den sɔrɔ ne ye. Ne fana na denw sɔrɔ ale barika la.»
[4] A y'a ka jɔnmuso Bilha di Yakuba ma ka kɛ a muso ye. Yakuba donna o fɛ.
[5] Bilha ye kɔnɔ ta ka denkɛ bange Yakuba ye.
[6] Rasɛl ko: «Ala ye ne ka kiri tigɛ ka ne kan lamɛn fana, a ye denkɛ di ne ma.» O de y'a to a y'o tɔgɔ da ko Dan.
[7] Rasɛl ka jɔnmuso Bilha ye kɔnɔ ta ko kura ka denkɛ filanan bange Yakuba ye.
[8] Rasɛl ko: «Ne ye bari ta ne kɔrɔmuso fɛ ni fangaba ye, ne ye se sɔrɔ.» A y'o tɔgɔ da ko Nefitali.
[9] Lea y'a ye ko a ka bange jɔra, a y'a ka jɔnmuso Zilpa di Yakuba ma ka kɛ o muso ye.
[10] Lea ka jɔnmuso Zilpa ye denkɛ bange Yakuba ye.
[11] Lea ko: «Ne kunnandiyara.» A y'o tɔgɔ da ko Gad.
[12] Lea ka jɔnmuso Zilpa ye denkɛ filanan bange Yakuba ye.
[13] Lea ko: «Ne nisɔndiyara. Sabu musow na ne wele ko nisɔndiyalen.» A y'o tɔgɔ da ko Asɛr.
[14] Rubɛn bɔra ɲɔ tigɛ tuma la ka mandragɔr mɔ sɔrɔ kungo la, ka na u di a ba Lea ma. O tuma la Rasɛl y'a fɔ Lea ye ko: «Ne b'i deli, i ka i denkɛ ka mandragɔr mɔ dɔ di ne ma.»
[15] Lea y'a jaabi ko: «I ye ne cɛ bɔsi ne la, o ka dɔgɔ i ɲɛ na wa?» Rasɛl y'a jaabi ko: «Ayiwa, a na da i fɛ bi su in na i denkɛ ka mandragɔrw kosɔn.»
[16] Yakuba kɔsegintɔ ka bɔ kungo la wula fɛ, Lea taara a kunbɛn k'a fɔ a ye ko: «I ka kan ka don ne fɛ bi, sabu ne ye o sara bɔ ni ne denkɛ ka mandragɔrw ye.» Yakuba dara a fɛ o su la.
[17] Ala ye Lea kan lamɛn. O ye kɔnɔ ta ka denkɛ duurunan bange Yakuba ye.
[18] Lea ko: «Ala ye ne sara di ne ma, sabu ne ye ne ka jɔnmuso di ne cɛ ma.» A y'o tɔgɔ da ko Isakar.
[19] Lea ye kɔnɔ ta ko kura, ka denkɛ wɔɔrɔnan bange Yakuba ye.
[20] Lea ko: «Ala ye nili fɛnɲuman ni ne la. Sisan ne cɛ na sigi ne fɛ, sabu ne ye denkɛ wɔɔrɔ bange a ye.» A y'o tɔgɔ da ko Zabulɔn.
[21] O kɔ, a ye denmuso bange ka o tɔgɔ da ko Dina.
[22] Ala hakili tora Rasɛl la, Ala y'a kan lamɛn ka bange di a ma.
[23] Rasɛl ye kɔnɔ ta ka denkɛ bange. A ko: «Ala ye ne tɔgɔ lagosi ko bɔ ne kun na.»
[24] A y'o tɔgɔ da ko Yusufu, k'a fɔ ko: «Matigi ka denkɛ dɔ wɛrɛ di ne ma ka fara nin kan.»
[25] Kabini Rasɛl ye Yusufu bange, Yakuba y'a fɔ Laban ye ko: «Ne bila ka taa ne ka jamana la ne ka so.
[26] Ne ye baara kɛ i ye ne musow ni ne den minw kosɔn, i ka olu di ne ma ka ne bila ka taa, sabu ne ye baara kɛ i ye cogo min na, i yɛrɛ bɛ o dɔn.»
[27] Laban y'a fɔ a ye ko: «Ni ne ko diyara i ye, i ka to ne fɛ yan, k'a masɔrɔ ne y'a ye ko Matigi dubara ne ye i kosɔn.
[28] I ka i sara fɔ, ne na o di i ma.»
[29] Yakuba y'a fɔ a ye ko: «Ne ye baara kɛ i ye cogo min na, ani i ka baganw kɛra min ye k'u to ne bolo, i yɛrɛ bɛ o dɔn.
[30] Dɔɔnin tun bɛ i bolo sani ne ka na, sisan a jiidira ka caya kosɛbɛ. Ne yɛlɛmana fan o fan, Matigi dubara i ye ne barika la. Sisan ne na baara kɛ ne ka so kosɔn tuma jumɛn?»
[31] Laban y'a ɲininka ko: «Ne ka mun di i ma?» Yakuba y'a jaabi ko: «I kana foyi di ne ma. Ne bɛna min fɔ, ni i sɔnna o ma, ne na to ka i ka bagan misɛn kulu gɛn ka u mara.
[32] Ne na yaala i ka bagan misɛn kulu bɛɛ cɛma bi. Wara sagadenw bɛɛ ni sagaden kiriketigiw bɛɛ ni saga finmanw bɛɛ ani baden kalankalannenw, i ka olu bila u dan na. Olu bɔɲɔgɔnkow na kɛ ne ka sara ye.
[33] Ne ka tilennenya na ne seereya kɛ i ɲɛ na waati nata la, ni i nana ne sarali la tuma min na. Ba fɛn o fɛn kalankalannen tɛ, wala fin tɛ saga minw na, ni olu sɔrɔla ne bolo, u na jate fɛn sonyalenw ye.»
[34] Laban ko: «Ayiwa, ni a kɛra ka kɛɲɛ ni i ka kuma ye, o na diya ne ye.»
[35] Nka o don yɛrɛ la, wara bakɔrɔ kalankalannenw bɛɛ ani bamuso kalankalannenw bɛɛ, ni jɛ bɛ u fɛn o fɛn na, ani saga finmanw bɛɛ, Laban ye olu bɔ a ka bagankulu la ka u don a denkɛw bolo.
[36] O kɔ, a ye a yɔrɔ janya Yakuba la ni tile saba taama ye. Yakuba ye Laban ka bagan misɛn tɔw gɛn.
[37] Yakuba ye jiribere kɛnɛw tigɛ ka bɔ puplie sun ni amande sun ni platan sunw la. A ye u ɲɛgɛnɲɛgɛn walisa u jɛman yɔrɔw ka ye.
[38] Bagan misɛnw nana ka u min tuma min na, a ye a ka bere ɲɛgɛnnenw bila u ɲɛ kɔrɔ u min waarow da la. Bagan misɛnw nana u min tuma min na, u ye kɔnɔ ta.
[39] Bagan misɛnw ye kɔnɔ ta o berew ɲɛ kɔrɔ. Bagan misɛnw ye den kalankalannenw ni den kiriketigiw ni den ɲɛgɛnnenw wolo.
[40] Yakuba ye sagadenw bɔ yen ka bagan misɛnw ɲɛsin bagan misɛn kalankalannenw ni fintigiw fan fɛ Laban ka bagan misɛnw kulu la. A ye a yɛrɛ ka bagankuluw bila u dan na, a ma u fara Laban ka bagankulu kan.
[41] Ni bagan misɛn muso barikamaw yɛlɛn tuma sera, Yakuba ye o berew bila min waarow kɔnɔ u ɲɛ kɔrɔ, walisa u ka kɔnɔ ta o berew cɛma.
[42] Bagan misɛnw barika dɔgɔyara tuma min na, a ma o berew bila yen tun. O cogo la den barikantanw kɛra Laban ta ye, den barikamaw kɛra Yakuba ta ye.
[43] Yakuba fɛntigiyara ka ta'a fɛ. Bagan misɛn kulubaw tun b'a fɛ. Jɔnmusow ni jɔnkɛw ni ɲaamɛw ani faliw fana tun b'a fɛ.