[1] O kow kɔ, Misira masakɛ ka minni fɛnw kuntigi ni a ka buuru dilabaaw kuntigi ye ko jugu dɔ kɛ Misira masakɛ la.
[2] Faraon diminna o kuntigi fila kɔrɔ, a ka minni fɛnw kuntigi ni buuru dilabaaw kuntigi kɔni.
[3] A ye u bila a ka garadiw kuntigi ka so kɔnɔ kaso la, Yusufu tun bɛ kaso la yen.
[4] Garadiw kuntigi ye u ka koɲɛ to Yusufu bolo, a ka i janto u la. U ye waati dɔ kɛ kaso la yen.
[5] Don dɔ su fɛ Misira masakɛ ka minni fɛnw kuntigi ni a ka buuru dilabaaw kuntigi fila bɛɛ sugora k'u to kaso la. U fila bɛɛ sugora ka kɛɲɛ ni u ka sugow ni u kɔrɔw ye.
[6] Yusufu donna u yɔrɔ sɔgɔma joona fɛ. A filɛ, u ɲɛnasisilen tun don.
[7] O tuma la Faraon ka kuntigi minw ni a tun bɛ kaso la ɲɔgɔn fɛ a makɛ ka so kɔnɔ, a ye olu ɲininka ko: «Mun y'a to aw ɲɛnasisilen don bi?»
[8] U y'a jaabi ko: «An sugora, mɔgɔ si tɛ yan ka o kɔrɔ fɔ an ye.» Yusufu y'a fɔ u ye ko: «Sugo kɔrɔ fɔli tɛ Ala ta ye wa? Aw ka o sugow ɲɛ fɔ ne ye.»
[9] Minni fɛnw kuntigi ye a ka sugo lakali Yusufu ye. A ko: «Ne sugora, a filɛ, rezɛn sun tun bɛ ne ɲɛ kɔrɔ.
[10] Bolo saba tun bɛ o rezɛn sun na. A kɛra i n'a fɔ a nugura ka feere ka rezɛn tusuu mɔlen bɔ.
[11] Faraon ka jifilen tun bɛ ne bolo, ne ye rezɛn mɔ ta ka a bisi Faraon ka jifilen kɔnɔ ka jifilen don Faraon bolo.»
[12] Yusufu y'a fɔ a ye ko: «O kɔrɔ filɛ nin ye. O bolo saba ye tile saba ye.
[13] Tile saba bi kɔ, Faraon na i bila a ka minni fɛnw kuntigiya la a cogo kɔrɔ la.
[14] Nka ni i ye hɛrɛ sɔrɔ tuma min na, i ka i hakili to ne la ka ko ɲuman kɛ ne ye. Ne b'i deli, i ka ne ko fɔ Faraon ye ka ne bɔ nin so kɔnɔ.
[15] Ne minɛna ka bɔ Heburu jamana la ka na yan. Ne ma kasola bila ko si kɛ yan fana.»
[16] Buuru dilabaaw kuntigi y'a ye ko o kɔrɔ fɔlen ka ɲi, a y'a fɔ Yusufu ye ko: «Ne fana sugora. Buuru jɛman tun bɛ cɛrɛ saba kɔnɔ ne kun.
[17] Faraon ka dumuni fɛn wusulen sifaw bɛɛ tun bɛ sanfɛ cɛrɛ kɔnɔ. Kɔnɔw tun bɛ olu dun cɛrɛ kɔnɔ ne kun.»
[18] Yusufu y'a jaabi ko: «O kɔrɔ filɛ nin ye. O cɛrɛ saba ye tile saba ye.
[19] Tile saba bi kɔ, Faraon na i kunkolo ta ka bɔ i la ka i dulon jiri la. Kɔnɔw na i farisogo dun.»
[20] O tile sabanan don tun ye Faraon bange don kunbɛn ye. A ye dumuniba dila a ka jɔnw bɛɛ ye. A ye minni fɛnw kuntigi ni buuru dilabaaw kuntigi bɔ kaso la jɔnw ɲɛ na.
[21] A ye minni fɛnw kuntigi kɔsegin a ka kuntigiya la ko kura, walisa ka Faraon ka jifilen don a bolo.
[22] Nka a ye buuru dilabaaw kuntigi dulon, i ko Yusufu tun ye sugo kɔrɔ fɔ u ye cogo min na.
[23] O bɛɛ n'a ta, minni fɛnw kuntigi hakili ma to Yusufu la, a ɲinɛna a kɔ.