[1] Yakuba ye sira minɛ ka taa, Ala ka mɛlɛkɛw y'a kunbɛn.
[2] Yakuba y'u ye minkɛ, a ko: «Nin ye Ala ka kɛlɛbolo de ye.» A ye o yɔrɔ tɔgɔ da ko Mahanayim.
[3] Yakuba ye cidenw bila ka taa a ɲɛ a kɔrɔkɛ Esau fɛ Seir jamana la, o ye Edɔm ye.
[4] Yakuba y'a fɔ o cidenw ye ko: «Aw ka nin fɔ ne matigi Esau ye ko ne, a ka jɔnkɛ Yakuba kan don. Ne sigira Laban ka so ka mɛn yen fo sisan.
[5] Misiw ni faliw ni bagan misɛnw ni jɔnkɛw ni jɔnmusow bɛ ne fɛ. Ne ye ci bila ka o fɔ ne matigi Esau ye, walisa ne ko ka diya a ye.»
[6] Cidenw kɔseginna Yakuba ma, u ko: «An sera i kɔrɔkɛ Esau ma. A filɛ, a bɛ na i kunbɛn ni cɛ kɛmɛ naani ye.»
[7] O la Yakuba siranna kosɛbɛ, a hakili ɲaamina haali. A ye a fɛ mɔgɔw tila ka kɛ jamakulu fila ye, ani bagan misɛnw ni misiw ni ɲaamɛw.
[8] A ko: «Ni Esau nana kulu kelen kama ka o kɛlɛ, kulu tɔ kelen na kisi.»
[9] Yakuba ko: «Ne fa Ibrahima ka Ala, ne fa Isaka ka Ala, Yawe, e y'a fɔ ne ye ko ne na kɔsegin ka taa ne ka jamana la ne balimaw fɛ, ko i na ko ɲuman kɛ ne ye.
[10] I ye ɲumaya ni kantigiya ko minw bɛɛ kɛ i ka jɔnkɛ ye, ne man kan ni o si la dɔgɔmanni ye, k'a masɔrɔ ne ye nin Jurdɛn ba tigɛ tuma min na foyi tun tɛ ne bolo bere kelen kɔ. Sisan ne kɛra kulu fila ye.
[11] Ne b'i deli, i ka ne tila ne kɔrɔkɛ Esau la. Ne bɛ siran a kana na ne ni muso dentigiw kɛlɛ.
[12] E y'a fɔ fana ko i na ko ɲuman kɛ ne ye, ka ne bɔnsɔn caya i ko kɔgɔji dala cɛncɛn, o ka ca haali, a dama dɔnbali don.»
[13] Yakuba sira yen o su fɛ. A ye dɔ bɔ a bolo fɛnw bɛɛ la k'a kɛ a kɔrɔkɛ Esau sama ye.
[14] O sama fɛnw filɛ nin ye: bamuso kɛmɛ fila ni bakɔrɔ mugan, ani sagamuso kɛmɛ fila ni sagajigi mugan,
[15] ani ɲaamɛmuso bisaba ni u denw, ani misi binaani ni ntura tan, ani falimuso mugan ni falikɛ tan.
[16] A ye u don a ka jɔnw bolo ka bagankulu bɛɛ kelen-kelen kɛ u dan na. A y'a fɔ a ka jɔnw ye ko: «Aw ka kɔ tigɛ ne ɲɛ, ka furancɛ bila kulu ni kulu cɛ.»
[17] A y'a fɔ ɲɛfɛ mɔgɔ ye ko: «Ni ne kɔrɔkɛ Esau ye i kunbɛn ka i ɲininka ko i ye jɔn ta ye? I bɛ taa min? Nin bagankulu min bɛ i ɲɛ fɛ, o ye jɔn ta ye?
[18] I k'a fɔ a ye ko a ka jɔnkɛ Yakuba ta don, ko sama don, a cira a matigi Esau ma. Ko a filɛ, a yɛrɛ bɛ na an kɔ.»
[19] A y'a fɔ mɔgɔ filanan ni mɔgɔ sabanan ye, ani o kuluw kɔ mɔgɔw bɛɛ ye ko: «Ni aw ye Esau ye, aw bɛɛ k'a fɔ o cogo la.
[20] Aw k'a fɔ ko a ka jɔnkɛ Yakuba bɛ an kɔ fana.» Yakuba y'a fɔ ko: «Ne na nin sama fɛn min bila ka taa ne ɲɛ, o na a dusu suma. O kɔ, ne n'a ɲɛda ye, a dɔrɔ a na ne minɛ ko ɲuman.»
[21] O cogo la Yakuba ka sama ye kɔ tigɛ a ɲɛ. A yɛrɛ sira a ka mɔgɔw cɛma o su fɛ.
[22] A wulila o su yɛrɛ la ka a muso fila ni a ka jɔnmuso fila ni a denkɛ tan ni kelen bila ka taa ka Jabɔk kɔ tigɛ u sen na.
[23] A y'u bila ka kɔ tigɛ a ɲɛ, ka a bolo fɛnw fana bila ka taa a ɲɛ.
[24] Yakuba tora a kelen na, a ni cɛ dɔ ye bari ta fo ka dugu jɛ.
[25] O cɛ y'a ye ko a ma se ka se sɔrɔ Yakuba kan tuma min na, a ye Yakuba gosi a tɔgɔkun na. Yakuba tɔgɔkun mugura k'a to bari ta la a fɛ.
[26] O cɛ y'a fɔ a ye ko: «Ne bila ka taa, sabu dugu bɛ ɲini ka jɛ.» Yakuba ko: «Ni i ma dubaw kɛ ne ye, ne tɛna i bila ka taa.»
[27] O cɛ y'a fɔ a ye ko: «I tɔgɔ bɛ di?» A ko: «Yakuba.»
[28] O cɛ ko: «I tɔgɔ tɛna wele Yakuba tun, fɔ Israɛl, k'a masɔrɔ i ni Ala ye bari ta, i ni mɔgɔw fana ye bari ta, i ye se sɔrɔ.»
[29] Yakuba y'a ɲininka ko: «Ne b'i deli, i tɔgɔ fɔ ne ye.» A ko: «Mun na i bɛ ne tɔgɔ ɲininkali kɛ?» O ye dubaw kɛ a ye yen.
[30] Yakuba ye o yɔrɔ tɔgɔ da ko Peniɛl, sabu a ko: «Ne ye Ala ye ɲɛda ni ɲɛda, ne ɲɛnama tora.»
[31] Tile bɔra ka Yakuba to Peniɛl kɔ tigɛli la. Yakuba tun bɛ cun a tɔgɔ kelen kan.
[32] O de y'a to fasa min bɛ tɔgɔkun na, Israɛl bɔnsɔn tɛ o dun halibi, k'a masɔrɔ Ala ye Yakuba gosi a tɔgɔkun fasa la.