[1] O kow kɔ, Matigi y'i jira Abrama la k'a fɔ a ye ko: «Abrama, i kana siran. Ne ye i ka nɛgɛ bɛnnan ye, i ka baraji na bonya kosɛbɛ.»
[2] Abrama ko: «Matigi Ala, mun nafa b'a la ka fɛn di ne ma k'a sɔrɔ ne denntan don? Ne ka so ciyɛntala na kɛ Damasi Eliezɛr ye.»
[3] Abrama y'a fɔ fana ko: «A filɛ, i ma bɔnsɔn di ne ma. Cɛ min bangera ne ka so kɔnɔ, o na kɛ ne ciyɛntala ye.»
[4] O tuma la Matigi ko: «Ayi, ale tɛna kɛ i ciyɛntala ye, nka i yɛrɛ woloden, o na kɛ i ciyɛntala ye.»
[5] A taara ni Abrama ye kɛnɛma k'a fɔ a ye ko: «I ka sankolo filɛ ka dolow dan, ni i bɛ se.» A ko fana: «I bɔnsɔn na caya ten.»
[6] Abrama dara Matigi la. Matigi ye o dannaya jate a ye tilennenya ye.
[7] Matigi y'a fɔ a ye fana ko: «Ne ye Matigi ye. Ne ye i labɔ Ur, Kalde jamana la, walisa ka nin jamana di i ma ka kɛ i ta ye.»
[8] Abrama ko: «Matigi Ala, ne n'a dɔn cogo di ko ne na a sɔrɔ ka kɛ ne ta ye?»
[9] Matigi y'a fɔ a ye ko: «I ka san saba misimuso ni san saba bamuso ni san saba sagajigi minɛ, ani ntubanni kelen ni jɛnɛntubanden kelen.»
[10] Abrama nana ni o baganw bɛɛ ye ka u cɛ ci, ka u bɛɛ fan kelen-kelen da ɲɔgɔn kuntilenna la, nka a ma kɔnɔw cɛ ci.
[11] Sogodun kɔnɔw jiginna o fɛn suw kan, nka Abrama ye u gɛn.
[12] Tile bi tuma la, sunɔgɔba ye Abrama minɛ. A siranna kosɛbɛ, dibiba donna a la.
[13] Matigi y'a fɔ Abrama ye ko: «I k'a dɔn k'a jɛya ko i bɔnsɔnw na kɛ siginfɛw ye jamana wɛrɛ la, ka kɛ yen kaw ka jɔnw ye. Olu na u tɔɔrɔ san kɛmɛ naani kɔnɔ.
[14] Nka siya min bɛ u kɛ jɔnw ye, ne na kiri bi o kan. Ni o kɛra, u na bɔ yen ni nafoloba ye.
[15] E kɔni na kafo i bɛnbaw kan hɛrɛ la. I kɔrɔlen su na don.
[16] U bɔnsɔn naaninan na kɔsegin ka na yan, k'a masɔrɔ Amɔr siya ka tilenbaliya ma dafa fɔlɔ.»
[17] Tile bilen kɔ, dibiba donna. A filɛ, gwan tasumama sisima ni tamɔɲɔn manalen tɛmɛnna o bagan suw cɛ cilenw furancɛ la.
[18] O don na Matigi ye layidu ta Abrama ye ko: «Ne bɛ nin jamana di i bɔnsɔn ma, ka bɔ Misira ba da la ka taa se fo baba da la, Ufrate ba kɔni,
[19] Keni siya ni Kenaz bɔnsɔn ni Kadimoni siya
[20] ni Hɛti bɔnsɔn ni Ferɛz siya ni Refaim siya
[21] ni Amɔr siya ni Kanankaw ni Girgas siya ani Jebuskaw ka jamana bɛɛ.»