[1] Ibrahima ye muso wɛrɛ furu, o tɔgɔ ko Ketura.
[2] O ye Zimran ni Jokisan ni Medan ni Madian ni Jisibak ani Suak bange a ye.
[3] Jokisan ye Seba ni Dedan bange. Dedan denkɛw tun ye Asur ni Letus ani Leum ye.
[4] Madian denkɛw tun ye Efa ni Efɛr ni Henɔk ni Abida ani Elda ye. Olu bɛɛ tun ye Ketura denkɛw ye.
[5] Ibrahima y'a bolo fɛnw bɛɛ di Isaka ma.
[6] Sani Ibrahima ka sa, a ye nili fɛnw di a ka jɔnmusow denkɛw ma ka u bila ka taa kɔrɔn yanfan fɛ jamana la ka mabɔ a denkɛ Isaka la.
[7] Ibrahima si tilew bɛɛ lajɛlen kɛra san kɛmɛ ni biwolonwula ani san duuru ye.
[8] Ibrahima ni bɔra, a cɛkɔrɔbalama wasalen si tile dafalen sara, a kafora a bɛnbaw kan.
[9] A denkɛw Isaka ni Isumaɛl y'a su don Makipela kuluwo kɔnɔ Hɛti bɔnsɔn Zokar denkɛ Efrɔn ka foro la, Mamre kuntilenna la.
[10] Ibrahima ye o foro san Hɛti bɔnsɔn fɛ. Ibrahima ni a muso Saran suw donna yen.
[11] Ibrahima salen kɔ, Ala dubara a denkɛ Isaka ye. Isaka sigilen tun bɛ Lakayi-roi kɔlɔn da la.
[12] Ibrahima denkɛ Isumaɛl bɔnsɔn filɛ nin ye, Saran ka jɔnmuso Misiraka Agar y'a bange Ibrahima ye.
[13] Isumaɛl denkɛw tɔgɔw filɛ ninw ye, ka kɛɲɛ ni u tɔgɔw ni u sɔrɔ tumaw ye: Isumaɛl denkɛ fɔlɔ Nebajɔt, ani Kedar ni Adibeɛl ni Mibisam
[14] ni Misima ni Duma ni Masa
[15] ni Hadad ni Tema ni Jetur ni Nafis ani Kedema.
[16] Isumaɛl denkɛw filɛ olu ye. U tɔgɔw filɛ olu ye ka kɛɲɛ ni u ka duguw ni u ka buguw ye. U kɛra kuntigi tan ni fila ye ka kɛɲɛ ni u siyaw ye.
[17] Isumaɛl si tilew bɛɛ lajɛlen kɛra san kɛmɛ ni bisaba ani san wolonwula ye. A si tile dafalen, a sara ka kafo a bɛnbaw kan.
[18] A denkɛw sigira k'a daminɛ Havila fo Sur, o bɛ Misira kuntilenna la, ka taa Asiri jamana fan fɛ. U sigira u balimaw bɛɛ kuntilenna la.
[19] Ibrahima denkɛ Isaka bɔnsɔn filɛ nin ye:
[20] Ibrahima ye Isaka bange. Isaka si san binaaninan la, a ye Rebɛka furu. O tun ye Padan-Aram jamana Siri Bɛtuɛl denmuso ye, Siri Laban dɔgɔmuso tun don fana.
[21] Isaka ye Matigi deli a muso ye, k'a masɔrɔ bangekɛbali tun don. Matigi y'a ka delili lamɛn. A muso Rebɛka ye kɔnɔ ta.
[22] Denw ye ɲɔgɔn ɲɔni u ba kɔnɔ, a ko: «Ni a bɛ ten, mun y'a to ne kɔnɔma don?» A taara Matigi ɲininka o la.
[23] Matigi y'a fɔ a ye ko: «Siya fila bɛ i kɔnɔ, i na siya fila bange, u na fara ka bɔ ɲɔgɔn na. Siya kelen barika na bonya dɔ ta ye, kɔrɔkɛ na kɛ a dɔgɔkɛ ka jɔn ye.»
[24] Rebɛka jigin tuma selen, denw kɛra filaniw ye.
[25] Fɔlɔ bɔra, o bilenmanni tun don, a fari yɔrɔ bɛɛ kɛra i ko fini sima. U y'o tɔgɔ da ko Esau.
[26] O kɔ, a dɔgɔkɛ bɔra, Esau sen tontoli minɛlen tun bɛ o bolo. U y'o tɔgɔ da ko Yakuba. Isaka tun ye san biwɔɔrɔ sɔrɔ u bange tuma la.
[27] Denmisɛnw ɲɛnatigɛra, Esau kɛra donsokɛ kegunma kungo marabaa ye. Yakuba tun ye mɔgɔ sumalen ye, a tun bɛ sigi finiso kɔnɔ.
[28] Esau ko tun ka di Isaka ye, sabu a tun b'a ka sogo sɔrɔlen dun. Yakuba ko tun ka di Rebɛka ye.
[29] Don dɔ la, Yakuba ye shɔ tobi. Esau sɛgɛnnenba nana ka bɔ kungo kɔnɔ.
[30] Esau y'a fɔ Yakuba ye ko: «I ka nin shɔ bilenman dɔ di ne ma, ne k'a dun, sabu ne sɛgɛnnen don.» O de kosɔn u ye Esau wele Edɔm.
[31] Yakuba ko: «I ka i ka kɔrɔya tɔnɔ feere ne ma bi.»
[32] Esau y'a jaabi ko: «A filɛ, ne bɛ ɲini ka sa, o kɔrɔya tɔnɔ bɛna mun ɲɛ ne ye?»
[33] Yakuba ko: «I kali ne ye fɔlɔ.» A y'i kali a ye, k'a ka kɔrɔya tɔnɔ feere Yakuba ma.
[34] Yakuba ye buuru ni shɔ di Esau ma. A ye dumuni kɛ ka minni kɛ, ka wuli ka taa. O cogo la Esau ma a ka kɔrɔya tɔnɔ jate fɛn ye.