[1] Ayiwa mɔgɔw cayali daminɛna dugukolo kan, denmusow bangera u ye.
[2] O tuma la Ala denkɛw ye mɔgɔw denmusow ye ko u cɛ ka ɲi. U ye minw ɲɛnatɔmɔ, u ye olu bɛɛ furu.
[3] Matigi ko: «Ne Ni tɛna to mɔgɔ sɔsɔli la fo abada, katuguni ale ye farisogo de ye, a si tilew na kɛ san kɛmɛ ni mugan ye.»
[4] O tuma la mɔgɔ jamanjanbaw tun bɛ dugukolo kan. Ala denkɛw donna mɔgɔw denmusow fɛ ka denw sɔrɔ u fɛ. Olu tun ye fɔlɔfɔlɔ mɔgɔba fangamaw ye, u tɔgɔw bɔra kosɛbɛ.
[5] Matigi y'a ye ko mɔgɔw kɔnɔna juguya tun ka bon dugukolo kan, ko u kɔnɔ miirili si tun tɛ foyi ye ko jugu dama kɔ, don o don.
[6] Matigi nimisara a ka mɔgɔw dali la dugukolo kan, a ɲɛnasisira haali.
[7] Matigi ko: «Ne ye mɔgɔ minw da, ne na olu halaki ka u ban dugukolo kan, k'a daminɛ mɔgɔw la ka taa bila baganw ni fɛn fofotaw la, k'a masɔrɔ ne nimisara u dali la.»
[8] Nka Nuhun ye nɛɛma sɔrɔ Matigi ɲɛ kɔrɔ.
[9] Nin ye Nuhun bɔnsɔn ye. Nuhun tun ye mɔgɔ tilennen de ye. A jalakibali tun don o waati mɔgɔw cɛma. Nuhun taamana Ala fɛ.
[10] Nuhun ye denkɛ saba bange, Sɛm ni Kam ani Jafɛt.
[11] Dugukolo tun ka jugu Ala ɲɛ kɔrɔ haali, dugukolo fara fariya kow la.
[12] Ala ye dugukolo ye, a filɛ a ka jugu haali. Hadamadenw bɛɛ jogo juguyara dugukolo kan.
[13] Ala y'a fɔ Nuhun ye ko: «Hadamadenw bɛɛ laban tuma sera ne ɲɛ kɔrɔ, katuguni dugukolo falen bɛ u ka fariya kow la. A filɛ, ne na u ni dugukolo halaki ɲɔgɔn fɛ.
[14] I ka kurunba dila i yɛrɛ ye ni gofɛr jiri ye, ka bonw dila a kɔnɔ ka a kɔnɔ ni a kɔkanna bari ni dugukolo mana ye.
[15] I ka a dila nin cogo la: kurunba janya na kɛ nɔnkɔn ɲɛ kɛmɛ saba ye, a fɛrɛ na kɛ nɔnkɔn ɲɛ biduuru ye, a jɔ kundama na kɛ nɔnkɔn ɲɛ bisaba ye.
[16] I ka finɛtiri dila kurun na ka o sanfɛla kɛ nɔnkɔn ɲɛ kelen ye ka kurun da bɔ a fan kelen na. I ka kurun dila k'a kɛ bon saba ye, duguma bon ni cɛmancɛ bon ani sanfɛ bon.
[17] A filɛ, ne na ji belebeleba lana dugukolo kan. Ninakili bɛ farisogo minw na, ne na olu bɛɛ halaki ka bɔ sankolo jukɔrɔ. Dugukolo kan fɛnw bɛɛ na sa.
[18] Nka ne na ne ka layidu ta i ye. I ni i denkɛw ni i muso ni i denkɛw musow na don kurunba kɔnɔ ɲɔgɔn fɛ.
[19] I na fɛnɲɛnama sifaw bɛɛ fila-fila ladon kurunba kɔnɔ, walisa u ɲɛnama ka to i fɛ. I ka u cɛmaw ni u musomaw ladon.
[20] Kɔnɔw sifaw bɛɛ ni baganw sifaw bɛɛ ani dugukolo kan fɛn fofotaw sifaw bɛɛ, olu sifaw bɛɛ fila-fila bɛ na i yɔrɔ la, walisa u ɲɛnama ka to.
[21] I ka dɔ ta dumuni fɛn sifaw bɛɛ la ka o mara i fɛ, o na kɛ i ni olu ka dumuni ye.»
[22] Nuhun y'a kɛ ten. Ala ye min fɔ a ye, a ye o bɛɛ kɛ.