[1] O mɛlɛkɛ fila sera Sodɔmɛ wula da fɛ. Lɔti sigilen tun bɛ Sodɔmɛ dugu donda la. Lɔti y'u ye tuma min na, a wulila ka taa u kunbɛn, k'a ɲɛ biri duguma.
[2] A ko: «Ne matigiw, ne bɛ aw deli, a' ye jigin aw ka jɔnkɛ ka so, ka aw senw ko ka si yan. Aw na soli ka taa.» U y'a jaabi ko: «Ayi, an na si fɛrɛkɛnɛ la.»
[3] Nka Lɔti tora ka u deli fo u taara jigin a ka so. A ye buuru fununbali jeni ka dumuni dila u ye. U ye dumuni kɛ.
[4] Nka sani u ka da, Sodɔmɛ dugu kɔnɔ cɛw, kamalenw ni cɛkɔrɔbaw, dugu mɔgɔw bɛɛ, bɔra fan bɛɛ la ka taa ka so lamini.
[5] U ye Lɔti wele k'a fɔ a ye ko: «Cɛ minw donna i ka so su in na, olu bɛ min? I ka u labɔ yan, walisa an ka u dɔn.»
[6] Lɔti bɔtɔ ka taa u yɔrɔ, a ye so da tugu a kɔ fɛ.
[7] A ko: «Balimaw, ne bɛ aw deli, aw kana o ko jugu kɛ.
[8] Denmuso fila filɛ ne fɛ yan, u ma cɛ dɔn fɔlɔ. Ne bɛ u labɔ aw ye yan. Min ka di aw ye, aw ka o kɛ u la. Aw kɔni kana foyi kɛ nin cɛw la, k'a masɔrɔ u nana jigin ne ka so.»
[9] U y'a fɔ a ye ko: «Bɔ an kɔrɔ.» U ko fana: «Nin cɛ nana sigi an fɛ, a b'a fɛ ka kɛ an ka kiritigɛla ye. Ayiwa an bɛ ko jugu kɛ i la ka tɛmɛn olu ta kan.» O fɔlen, u ye Lɔti digi ka na, ko u bɛ da la kon kari.
[10] Nka o cɛ fila ye u bolo mɔɔnɔbɔ ka Lɔti minɛ k'a ladon u fɛ so kɔnɔ, ka da tugu.
[11] So da la cɛw, denmisɛnw fara mɔgɔbaw kan, u ye olu ɲɛw lafin. U ma so da ye.
[12] O cɛ fila y'a fɔ Lɔti ye ko: «I ka mɔgɔ dɔ bɛ yan ninw kɔ wa? Birankɛw ni denkɛw ni denmusow ani i ka mɔgɔ fɛn o fɛn bɛ nin dugu kɔnɔ, i ka olu labɔ yan.
[13] An bɛna nin yɔrɔ halaki, k'a masɔrɔ a pɛrɛnkan bonyara Matigi ɲɛ kɔrɔ haali. Matigi ye an ci ko an ka a halaki.»
[14] Lɔti bɔra ka taa kuma a birankɛw fɛ, olu minw tun ye a denmusow maminɛ, a ko: «A' ye wuli ka bɔ nin yɔrɔ la, k'a masɔrɔ Matigi na nin dugu halaki.» Nka o kuma kɛra a birankɛw ɲɛ na i ko tulon kuma.
[15] Kɛnɛbɔda fɛ, mɛlɛkɛw ye Lɔti jija, u ko: «Wuli ka taa, e ni i muso ni i denmuso fila minw bɛ yan, walisa i kana jeni nin dugu kiri ko la.»
[16] Lɔti ma wuli joona. Ayiwa, o cɛw y'a minɛ a bolo ma, a ni a muso ni a denmuso fila, k'a masɔrɔ Matigi hinɛna a la. U taara n'a ye k'a bila dugu kɔ fɛ.
[17] U bɔlen kɔ dugu kɔnɔ, u la kelen ko: «Boli ka i ni kisi. I kana i kɔ filɛ, i kana i jɔ kɛnɛba yɔrɔ si la. Boli ka taa kulu kan, walisa i kana jeni.»
[18] Lɔti y'a fɔ u ye ko: «Ayi, Matigi.
[19] A filɛ, ne ko diyara i ye, i ye makariba jira ne la ka ne ni kisi. Nka ne tɛ se ka boli ka taa kulu kan, ne bɛ siran ko bɔnɛ kana na ne sɔrɔ ka ne faga.
[20] A filɛ, nin dugu fitinin ka surun ne la kosɛbɛ. Ne bɛ se ka boli ka se yen. I k'a to ne ka boli ka taa yen ka ne ni kisi, sabu a ka dɔgɔ.»
[21] Cɛ y'a fɔ Lɔti ye ko: «Ayiwa, ne na nin ko kelen kɛ i ye fana. I ye dugu min ko fɔ, ne tɛna o halaki.
[22] I tɛliya ka taa yen, k'a masɔrɔ ne tɛ se ka foyi kɛ sani i ka se yen.» O de kosɔn o dugu tɔgɔ ko Zoar.
[23] Lɔti donna Zoar tilebɔ tuma la.
[24] O tuma la Matigi ka kiribi ni tasuma jiginna ka bɔ sankolo la Matigi fɛ Sodɔmɛ ni Gomɔrɛ kan i ko sanji.
[25] A ye o duguw halaki, ani jɛkɛnɛba yɔrɔ bɛɛ ani duguw mɔgɔw bɛɛ ani fɛn o fɛn falenna dugukolo kan.
[26] Nka ka Lɔti muso to kɔ fɛ, a y'a kɔ filɛ, a yɛlɛmana ka kɛ kɔgɔ samasen ye.
[27] Ibrahima solila ka wuli. A tun bɛ Matigi ɲɛ kɔrɔ yɔrɔ min na, a taara yen.
[28] A ye Sodɔmɛ ni Gomɔrɛ yanfan filɛ, ani kɛnɛba yɔrɔ bɛɛ. A ye sisi wulitɔ ye ka bɔ duguma yɔrɔ bɛɛ la i ko gwantugu sisiba.
[29] Ala ye o kɛnɛba la duguw halaki tuma min na, a hakili tora Ibrahima la. Lɔti tun sigira dugu minw na, Ala y'a kisi ka bɔ olu halaki yɔrɔ la.
[30] Lɔti ni a denmuso fila bɔra Zoar ka yɛlɛn ka taa u sigi kulu kan, k'a masɔrɔ a siranna, a ma to Zoar. A ni a denmuso fila y'u sigi kuluwo kɔnɔ.
[31] A denmuso fɔlɔ y'a fɔ a dɔgɔmuso ye ko: «An fa kɔrɔla. Cɛ si tɛ nin jamana la ka na don an fɛ ka kɛɲɛ ni dugukolo cogo ye.
[32] Na, an ka diwɛn di an fa ma, a k'a min, an ka da a fɛ walisa an ka bɔnsɔn to an fa ye.»
[33] U ye diwɛn di u fa ma o don su fɛ, a k'a min. Denmuso fɔlɔ taara i da a fɛ. A fa ma a da tuma wala a wuli tuma dɔn.
[34] O dugusajɛ, kɔrɔmuso y'a fɔ a dɔgɔmuso ye ko: «Ne dara ne fa fɛ surɔ. An ka diwɛn di a ma bi su fɛ tun, i ka taa da a fɛ, walisa an ka bɔnsɔn to an fa ye.»
[35] U ye diwɛn di u fa ma o su fɛ tun. Dɔgɔmuso taara da a fɛ. A fa ma a da tuma wala a wuli tuma dɔn.
[36] Lɔti denmuso fila ye kɔnɔ ta u fa fɛ o cogo la.
[37] Kɔrɔmuso ye denkɛ bange k'a tɔgɔ da ko Moab. O ye Moab bɔnsɔn bɛnba ye halibi.
[38] Dɔgɔmuso fana ye denkɛ bange k'a tɔgɔ da ko Bɛn-Ami. O ye Amɔn bɔnsɔn bɛnba ye halibi.