[1] Ala hakili tora Nuhun ni kurunba kɔnɔ fɛnw bɛɛ la, sogow ni baganw bɛɛ. Ala ye fiɲɛ ci dugukolo kan, ji jiginna.
[2] Ji boyi dunbaw ni sankolola ji mara yɔrɔw datugura, sanji tigɛra.
[3] Ji tun bɛ jigin ka bɔ gwele kan don o don. Tile kɛmɛ ni biduuru tɛmɛnnen kɔ, ji dɔgɔyara.
[4] O san kalo wolonwulanan tile tan ni wolonwulanan don, kurunba sigira Arara kulu kan.
[5] Ji tun bɛ jigin fo ka se kalo tannan ma. Kalo tannan tile fɔlɔ la, kuluw kunw yera.
[6] Ayiwa tile binaani tɛmɛnnen kɔ, Nuhun tun ye finɛtiri min dila kurun na, a ye o dayɛlɛ.
[7] A ye nkankankɔnɔ kelen bila ka taa. O taara ka yaalayaala fo ka ji ja ka bɔ duguma.
[8] A ye jɛnɛntuban fana bila ka taa, walisa a k'a filɛ yala ni ji dɔgɔyara ka bɔ gwele kan.
[9] Nka jɛnɛntuban ma a sen da yɔrɔ sɔrɔ. A seginna Nuhun ma kurun kɔnɔ, katuguni ji tun bɛ dugukolo yɔrɔ bɛɛ kan. Nuhun ye a bolo mɔɔnɔbɔ ka jɛnɛntuban minɛ ka a ladon kurun kɔnɔ.
[10] A ye tile wolonwula wɛrɛ kɛ, o kɔ, a ye jɛnɛntuban bila ka bɔ kurun kɔnɔ ko kura.
[11] Jɛnɛntuban seginna a ma wula fɛ, a filɛ, olive sun fura kɛnɛ bɛ a dakala la. Nuhun y'a dɔn ko ji dɔgɔyara dugukolo kan.
[12] A ye tile wolonwula wɛrɛ kɛ fana, o kɔ, a ye jɛnɛntuban bila ko kura. O ma segin a ma tun.
[13] Nuhun si san kɛmɛ wɔɔrɔ ni kelennan, o kalo fɔlɔ tile fɔlɔ y'a sɔrɔ ji jara ka bɔ gwele kan. Nuhun ye kurunba kunna birilan dayɛlɛ ka kɛnɛmala filɛ, a y'a sɔrɔ dugukolo jara.
[14] A kalo filanan tile mugan ni wolonwulanan don, dugukolo jalen tun don.
[15] Ala kumana Nuhun fɛ, a ko:
[16] «Aw ka bɔ kurun kɔnɔ, i ni i muso ni i denkɛw ani i denkɛw musow.
[17] Fɛnɲɛnama minw bɛ i fɛ yen, farisogomaw bɛɛ, kɔnɔw ni baganw ni fɛn fofota minw bɛ fofo dugukolo kan, i ka olu bɛɛ labɔ i fɛ, walisa u ka den caman sɔrɔ dugukolo kan ka jiidi ka caya dugukolo kan.»
[18] Nuhun ni a denkɛw ni a muso ani a denkɛw musow bɔra ɲɔgɔn fɛ.
[19] Sen naanima fɛnw bɛɛ ni fɛn fofotaw bɛɛ ani kɔnɔw bɛɛ, fɛn o fɛn bɛ lamaga dugukolo kan, olu sifaw bɛɛ bɔra kurun kɔnɔ.
[20] Nuhun ye saraka bɔlan jɔ Matigi ye ka dɔ bɔ sen naanima fɛn jɛlenw bɛɛ ani kɔnɔ jɛlenw bɛɛ la ka u kɛ saraka jenitaw ye o saraka bɔlan kan.
[21] Matigi ye o suma duman mɛn. Matigi y'a fɔ a yɛrɛ kɔnɔ ko: «Ne tɛna dugukolo danga mɔgɔ kosɔn tun, katuguni mɔgɔ kɔnɔna miirili ka jugu kabini a denmisɛnma. Ne tɛna fɛnɲɛnamaw bɛɛ faga tun i ko ne y'a kɛ cogo min na.
[22] Nka ka dugukolo to yen, danni kɛ tuma ni suman tigɛ tuma ani nɛnɛ tuma ni funteni tuma ani samiyɛ ni tilema ani tile ni su, olu tɛna ban.»