[1] Abrama ye san bikɔnɔntɔn ni kɔnɔntɔn sɔrɔ tuma min na, Matigi y'i jira a la k'a fɔ a ye ko: «Ne ye Ala Sebaayabɛɛtigi ye. I jalakibali ka taama ne ɲɛ kɔrɔ.
[2] Ne na ne ka layidu ta ne ni i cɛ, ka i jiidi kosɛbɛ.»
[3] Abrama y'i bi ka a ɲɛ biri duguma. Ala y'a fɔ a ye ko:
[4] «Ne kɔni ka layidu filɛ nin ye ne ni i cɛ. I na kɛ siya caman fa ye.
[5] I tɛna wele Abrama la tun, nka i na wele ko Ibrahima, katuguni ne ye i kɛ siya caman fa ye.
[6] Ne na i jiidi kosɛbɛ, siyaw na bɔ i la, masakɛw fana na bɔ i la.
[7] Ne na ne ka layidu ta ne ni i cɛ, ani ne ni i bɔnsɔn cɛ, i bɔnsɔn nataw bɛɛ la. Layidu wulibali don, ko, ne na kɛ i ka Ala ye ani i bɔnsɔn ka Ala ye i kɔ.
[8] I kɛra siginfɛ ye Kanan jamana min na, ne na o bɛɛ di i ni i bɔnsɔn ma i kɔ, ka kɛ u ta ye badaa. Ne na kɛ u ka Ala ye.»
[9] Ala y'a fɔ Ibrahima ye ko: «E kɔni ka ne ka layidu mara, e ni i bɔnsɔn nataw bɛɛ.
[10] Aw na ne ka layidu min mara ne ni aw cɛ, ani ne ni i bɔnsɔn cɛ i kɔ, o filɛ nin ye: Aw cɛw bɛɛ ka boloko.
[11] Aw na boloko, o na kɛ layidu taamashyɛn ye ne ni aw cɛ.
[12] Denkɛw bɛɛ na boloko u bange tile seginnan don aw bɔnsɔn nataw bɛɛ la, minw bangera aw ka so, wala minw sanna ni wari ye siya wɛrɛ mɔgɔw fɛ, ni olu tɛ aw bɔnsɔn ye.
[13] Min bangera i ka so ani min sanna ni wari ye, olu bɛɛ ka boloko. Ne ka layidu na kɛ layidu wulibali ye aw fari la.
[14] Cɛ o cɛ ma boloko, o na gɛn ka bɔ a ka mɔgɔw cɛma, katuguni a ye ne ka layidu tiɲɛn.»
[15] Ala y'a fɔ Ibrahima ye ko: «I muso Sarayi kɔni, o tɛna wele Sarayi tun, nka a na wele Saran.
[16] Ne na duba Saran ye, ne na denkɛ di i ma a fɛ. Ne na duba Saran ye, siya caman na bɔ a la, siyaw ka masakɛw na bɔ a la.»
[17] Ibrahima y'i bi ka a ɲɛ biri duguma, ka yɛlɛ k'a fɔ a yɛrɛ kɔnɔ ko: «Cɛ min ye san kɛmɛ sɔrɔ, o na den bange wa? Saran ye san bikɔnɔntɔn sɔrɔ, ale na bange kɛ tun wa?»
[18] Ibrahima y'a fɔ Ala ye ko: «Ne b'i deli, Isumaɛl ɲɛnama ka to i ɲɛ kɔrɔ.»
[19] Ala ko: «Siga t'a la, i muso Saran na denkɛ sɔrɔ i ye, i n'a tɔgɔ da ko Isaka. Ne na ne ka layidu ta a ye, layidu wulibali don, k'a ta a bɔnsɔn ye ale kɔ.
[20] Ne ye i ka delili lamɛn Isumaɛl ta fan fɛ. A filɛ, ne na duba a ye, k'a jiidi, k'a bɔnsɔn caya kosɛbɛ. A na kuntigi tan ni fila bange, ne na a kɛ siyaba ye.
[21] Nka ne na ne ka layidu ta Isaka ye, Saran na o min bange i ye san wɛrɛ ɲan tuma.»
[22] Ala tilalen kɔ kuma la Ibrahima fɛ, a yɛlɛnna ka taa ka Ibrahima to yen.
[23] O don yɛrɛ la Ibrahima denkɛ Isumaɛl ni minw bɛɛ bangera a ka so ani minw bɛɛ sanna ni wari ye, a ka so kɔnɔ cɛw bɛɛ, Ibrahima ye u bɛɛ boloko ka kɛɲɛ ni Ala ka ci fɔlen ye a ye.
[24] Ibrahima bolokora a si san bikɔnɔntɔn ni kɔnɔntɔnnan la.
[25] A denkɛ Isumaɛl bolokora a si san tan ni sabanan la.
[26] Ibrahima ni a denkɛ Isumaɛl bolokora don kelen na.
[27] A ka so kɔnɔ cɛw bɛɛ, olu minw bangera a ka so ani minw sanna ni wari ye ka bɔ siya wɛrɛw la, a ni olu bolokora ɲɔgɔn fɛ.