[1] O tuma la Yusufu ma se ka a yɛrɛ minɛ a fɛ mɔgɔw ɲɛ na tun. A pɛrɛnna ko: «Mɔgɔw bɛɛ ka bɔ yan.» Yusufu ye a yɛrɛ jira a balimaw la tuma min na, mɔgɔ wɛrɛ si tun tɛ yen.
[2] A kasikan bɔra. Misirakaw y'o mɛn, Faraon ka so mɔgɔw fana y'o mɛn.
[3] Yusufu y'a fɔ a kɔrɔkɛw ye ko: «Ne ye Yusufu ye. Ne fa bɛ ni la fɔlɔ wa?» A kɔrɔkɛw ma se k'a jaabi, k'a masɔrɔ u hakili ɲaamina a kosɔn.
[4] Yusufu y'a fɔ a balimaw ye ko: «A' ye gɛrɛ ne la.» U gɛrɛla a la. A ko: «Aw ye aw dɔgɔkɛ Yusufu min feere Misira taabaaw ma, o ye ne de ye.
[5] Sisan aw kana ɲɛnasisi, ka dimin aw yɛrɛ kɔrɔ, ko aw ye ne feere ka na yan, sabu Ala ye ne ci aw ɲɛ ka mɔgɔw niw kisi.
[6] San fila kɔngɔba kɛra jamana la ka ban. A tɔ san duuru kɔnɔ, danni tɛna kɛ, suman tɛna tigɛ.
[7] Ala ye ne ci aw ɲɛ, walisa aw bɔnsɔn ka to dugukolo kan, ani ka aw ɲɛnama to ni kisiliba ye.
[8] Aw kɔni tun tɛ ne cibaa ye yan. Ala yɛrɛ de ye ne ci. A ye ne sigi ka kɛ Faraon fa ye ani a ka so kuntigi ani Misira jamana bɛɛ gɔfɛrɛnɛrɛ.
[9] Aw ka tɛliya ka taa ne fa yɔrɔ k'a fɔ a ye ko ne, a denkɛ Yusufu ko: ‹Ala ye ne sigi ka kɛ Misira bɛɛ kuntigi ye.› Ko a ka na ne yɔrɔ joona.
[10] Ko a na sigi Gosɛn jamana la ka kɛ ne da fɛ, a ni a denw ni a mɔdenw ani a ka bagan misɛnw ni a ka misiw ani a bolo fɛnw bɛɛ.
[11] Ko ne na a balo yan, walisa a ni a ka so ni a ka mɔgɔ si kana bolo lankolonya katuguni kɔngɔba tɔ ye san duuru ye.
[12] A filɛ, aw ni ne dɔgɔkɛ Benjamɛn ɲɛ b'a la ko ne yɛrɛ da bɛ kuma aw fɛ.
[13] Bonya min bɛ ne kan Misira kɔnɔ, aw ka o ko bɛɛ ani aw ka fɛn yelenw bɛɛ lakali ne fa ye. Aw ka tɛliya ka na ni ne fa ye yan.»
[14] Yusufu ye i meleke a dɔgɔkɛ Benjamɛn kan na ka kasi. Benjamɛn ye i meleke Yusufu kan na ka kasi.
[15] Yusufu ye a kɔrɔkɛw bɛɛ da susu ka kasi. O kɔ, a ni a kɔrɔkɛw kumana ɲɔgɔn fɛ.
[16] Faraon ka so y'a mɛn ko Yusufu kɔrɔkɛw nana tuma min na, o diyara Faraon ni a ka jɔnw ye.
[17] Faraon y'a fɔ Yusufu ye ko: «I k'a fɔ i kɔrɔkɛw ye ko u ka nin kɛ. U ka u ka baganw doni ka taa Kanan jamana la.
[18] Ko u ka u fa ni u ka denbaya ta ka na ni u ye ne yɔrɔ. Ne na Misira jamana fɛnw bɛɛ la ɲuman di u ma, u na jamana la fɛn duman dun.
[19] Ne ko i k'a fɔ u ye ko u ka nin kɛ. U ka wotorow ta Misira yan ka taa u ka denmisɛnw ni u musow ni u fa nɔ fɛ ka na yan.
[20] Ko u bɛ na ka fɛn minw to yen, u kana nimisa olu nɔ fɛ, k'a masɔrɔ Misira jamana bɛɛ la fɛnɲuman na kɛ u ta ye.»
[21] Israɛl denkɛw y'a kɛ ten. Yusufu ye wotorow di u ma ka kɛɲɛ ni Faraon ka ci ye ka sirafana di u ma.
[22] A ye jamadon finiw di u bɛɛ kelen-kelen ma, nka a ye warijɛ sikle kɛmɛ saba ni jamadon fini duuru di Benjamɛn ma.
[23] A ye fɛn minw ci a fa ma, o filɛ ninw ye: fali tan doninen Misira fɛnɲumanw la, ani falimuso tan doninen suman ni dumuni fɛn ani a fa sirafana la.
[24] Yusufu ye a kɔrɔkɛw bila ka taa, u taara. A y'a fɔ u ye ko: «Aw kana dimin ɲɔgɔn kɔrɔ sira la.»
[25] U bɔra Misira ka taa se Kanan jamana la u fa Yakuba yɔrɔ.
[26] U y'a fɔ a ye ko: «Yusufu bɛ ni la. Ale de ye Misira jamana bɛɛ kuntigi ye.» Yakuba nalon talen tora, k'a masɔrɔ a ma da u la.
[27] U ye Yusufu ka kumaw bɛɛ lakali a ye. Yusufu ye wotoro minw ci ka a ta, a ye olu ye tuma min na, u fa Yakuba hakili sigira.
[28] Israɛl ko: «O b'a bɔ sa. Ne denkɛ Yusufu bɛ ni la. Ne bɛ taa bɔ a ye sani ne ka sa.»