[1] O kow kɔ, Ala ye Ibrahima kɔrɔbɔ, a ko: «Ibrahima.» Ibrahima ko: «Naamu.»
[2] Ala ko: «I denkɛ, i denkɛ kelenpe, i bɛ min kanu, Isaka kɔni, i ka taa n'o ye Morija jamana la. Ne na kulu min ko fɔ i ye, i ka a kɛ saraka jenita ye yen.»
[3] Ibrahima solila ka wuli ka tɛrɛfɛ da a ka fali la, ka taa ni a ka kamalen fila ni a denkɛ Isaka ye. A ye saraka jeni dɔgɔ ci. Ala ye yɔrɔ min ko fɔ a ye, a ye sira minɛ ka taa yen.
[4] A tile sabanan don Ibrahima y'a ɲɛ kɔrɔta ka o yɔrɔ ye yɔrɔ jan.
[5] Ibrahima y'a fɔ a ka kamalenw ye ko: «Aw ni fali ka to yan. Ne ni cɛni na taa yen fɛ ka Ala bato. O kɔ, an na kɔsegin ka na aw fɛ yan.»
[6] Ibrahima ye saraka jeni dɔgɔ da a denkɛ Isaka kun, ka tasuma ni muru ta a bolo. U fila bɛɛ taara ɲɔgɔn fɛ.
[7] Isaka y'a fɔ a fa Ibrahima ye ko: «Ne fa.» Ibrahima ko: «Naamu, ne denkɛ.» Isaka ko: «Tasuma ni dɔgɔ filɛ, nka saraka jenita sagaden bɛ min?»
[8] Ibrahima y'a jaabi ko: «Ne denkɛ, Ala na saraka jenita sagaden bɔ a yɛrɛ ye.» U fila bɛɛ taara ɲɔgɔn fɛ.
[9] Ala tun ye yɔrɔ min ko fɔ Ibrahima ye, u sera yen tuma min na, Ibrahima ye saraka bɔlan jɔ ka dɔgɔ da a kan, k'a denkɛ Isaka siri k'a da saraka bɔlan kan dɔgɔ kan.
[10] O kɔ, Ibrahima y'a bolo mɔɔnɔbɔ ka muru ta ko a b'a denkɛ faga.
[11] Nka Matigi ka mɛlɛkɛ y'i to sankolo la ka Ibrahima wele ko: «Ibrahima, Ibrahima.» A y'a jaabi ko: «Naamu.»
[12] Mɛlɛkɛ ko: «I kana i bolo da cɛni kan, i kana foyi kɛ a la. Ne y'a dɔn sisan ko i bɛ siran Ala ɲɛ, ko i ma ban ka i denkɛ, i denkɛ kelenpe di ne ma.»
[13] Ibrahima y'a ɲɛ kɔrɔta, sagajigi dɔ filɛ a kɔ fɛ, o biɲɛkolo ferekelen tun bɛ jirini dɔ la. Ibrahima taara o sagajigi minɛ k'a kɛ saraka jenita ye a denkɛ nɔ na.
[14] Ibrahima ye o yɔrɔ tɔgɔ da ko Yawe-Yire. O de kosɔn u b'a fɔ halibi ko: «Ala ye o mago ɲɛ Matigi ka kulu la.»
[15] Matigi ka mɛlɛkɛ y'i to sankolo la ka Ibrahima wele ko kura.
[16] A ko: «I y'o kɛ, i ma ban ka i denkɛ, i denkɛ kelenpe di ne ma. O de kosɔn ne bɛ ne kali ne yɛrɛ la, ne, Matigi ko ten,
[17] ko ne na duba i ye ka i bɔnsɔn caya i ko sankolola dolow ni kɔgɔji dala cɛncɛn. I bɔnsɔn na a juguw ka jamana donda tigiya sɔrɔ.
[18] Dugukolo kan siyaw bɛɛ na duba sɔrɔ i bɔnsɔn de la, k'a masɔrɔ i ye ne kan minɛ.»
[19] Ibrahima kɔseginna a ka kamalenw yɔrɔ la. U bɛɛ wulila ka taa Beɛr-Seba, sabu Ibrahima sigilen tun bɛ Beɛr-Seba.
[20] O kow kɔ, a fɔra Ibrahima ye ko Milka fana ye denkɛw bange a balimakɛ Nakɔr ye,
[21] a denkɛ fɔlɔ Uz ni o dɔgɔkɛ Buz, ani Aram fa Kɛmuɛl,
[22] ani Kesɛd ni Hazo ni Pildas ni Jidlaf ani Bɛtuɛl.
[23] Bɛtuɛl ye Rebɛka bange. Milka ye denkɛ segin minw bange Ibrahima balimakɛ Nakɔr ye, olu don.
[24] A ka jɔnmuso Reuma fana ye Tebak ni Gaham ni Tahas ani Maaka bange.