[1] O kow kɔ, a fɔra Yusufu ye ko: «A filɛ, i fa man kɛnɛ.» A taara ni a denkɛ fila Manase ni Efrayim ye.
[2] A fɔra Yakuba ye ko: «I denkɛ Yusufu natɔ filɛ i yɔrɔ.» Yakuba ye i jija ka wuli ka i sigi a ka dalan kan.
[3] Yakuba y'a fɔ Yusufu ye ko: «Ka ne to Kanan jamana la Luz, Ala Sebaayabɛɛtigi y'i jira ne la ka duba ne ye yen.
[4] A y'a fɔ ne ye ko a na ne jiidi ka ne caya kosɛbɛ ka ne kɛ siya caman ye. A ko a na o jamana di ne bɔnsɔn ma ne kɔ, ko o na kɛ olu ta ye badaa.
[5] Ayiwa, sisan i denkɛ fila minw bangera i ye Misira jamana la, sani ne ka na i yɔrɔ Misira, olu ye ne taw ye. Efrayim ni Manase na kɛ ne taw ye i ko Rubɛn ni Simeɔn.
[6] Nka i na den minw bange u kɔ, olu na kɛ i yɛrɛ ta ye. Olu na ciyɛn ta u kɔrɔkɛw nɔ na.
[7] Ne kɔni, ne kɔsegintɔ ka bɔ Padan, Rasɛl sara ne bolo sira la Kanan jamana la. O yɔrɔ ni Efrata furancɛ man jan. Ne ye a su don Efrata sira da la yen.» Efrata ye Bɛtilɛhɛm ye.
[8] Israɛl ye Yusufu denkɛw filɛ, a ko: «Ninw ye jɔn ni jɔn ye?»
[9] Yusufu y'a fɔ a fa ye ko: «Ala ye den minw di ne ma yan, olu don.» Israɛl ko: «U madon ne la, ne na dubaw kɛ u ye.»
[10] Ayiwa, Israɛl ɲɛ lafinna kɔrɔya kosɔn. A tun tɛ se ka yeli kɛ k'a lasaa. Yusufu ye u madon a la. Israɛl ye u da susu ka i meleke u la.
[11] Israɛl y'a fɔ Yusufu ye ko: «A tun tɛ ne kɔnɔ ko ne na i ye tun. A filɛ, Ala ye i denw fana jira ne la.»
[12] Yusufu ye u bɔ a fa sen furancɛ la k'i biri k'a ɲɛ biri duguma.
[13] O kɔ, Yusufu ye u fila minɛ ka u gɛrɛ a fa la. A ye a kininbolo kɛ ka Efrayim minɛ k'a jɔ Israɛl numan fɛ, ka a numanbolo kɛ ka Manase minɛ ka o jɔ Israɛl kinin fɛ.
[14] Israɛl ye a kininbolo mɔɔnɔbɔ ka a da Efrayim kun na, o ye dɔgɔkɛ ye, ka a numanbolo da Manase kun na. A ye i tugu k'a kɛ ten, k'a sɔrɔ Manase tun ye den fɔlɔ ye.
[15] A ye dubaw kɛ Yusufu ye, a ko: «Ne faw Ibrahima ni Isaka taamana Ala min ɲɛ kɔrɔ, Ala min ye ne balo ne si tilew bɛɛ la fo ka na bila bi la,
[16] mɛlɛkɛ min ye ne tila ko jugu bɛɛ la, o ka duba da nin denmisɛnw kan. Ne tɔgɔ ni ne faw Ibrahima ni Isaka tɔgɔw ka da u la. U ka jiidi ka kɛ jamaba ye dugukolo kan.»
[17] Yusufu y'a ye tuma min na ko a fa ye a kininbolo da Efrayim kun na, o ma diya a ye. A ye a fa bolo minɛ ka a bɔ Efrayim kun na ko a bɛ taa o da Manase kun na,
[18] k'a fɔ a fa ye ko: «O tɛ, ne fa, nin ye den fɔlɔ ye. I kininbolo da ale kun na.»
[19] A fa ma sɔn o ma. A ko: «Ne y'a dɔn, ne denkɛ. Ne y'a dɔn, ko ale fana na kɛ siya ye, ale fana na bonya, nka a dɔgɔkɛ na bonya ka tɛmɛn a kan. O bɔnsɔn na kɛ siya caman ye.»
[20] Yakuba ye dubaw kɛ u ye o don na k'a fɔ ko: «Israɛl na i ko fɔ duba tali la ko: Ala ka i kɛ i ko Efrayim ni Manase.» A ye Efrayim bila Manase ɲɛ ten.
[21] Israɛl y'a fɔ Yusufu ye ko: «A filɛ, ne bɛna sa, nka Ala na to aw fɛ ka aw kɔsegin ka taa aw faw ka jamana la tun.
[22] Ne ye Amɔr siya ka yɔrɔ minw minɛ ni ne ka npan ni ne ka bonnikɛ kala ye, ne ye olu di i ma ka fara i niyɔrɔ kan ka tɛmɛn i fa denkɛw ta kan.»