[1] Yakuba ye a denkɛw wele k'a fɔ u ye ko: «Aw ka ɲɔgɔn lajɛ. Ko minw na kɛ aw ye don nataw la, ne na olu fɔ aw ye.
[2] «Yakuba denkɛw, a' ye aw lajɛ ka ne lamɛn. A' ye aw tulow majɔ aw fa Israɛl ka kuma la.
[3] «Rubɛn, i ye ne den fɔlɔ ye, ne barika ni ne fanga daminɛ ye i ye. Ɲɛfɛla bonya ni ɲɛfɛla fanga ye i ta ye.
[4] I bɛ i ko ji lamagata min tɛ se ka jɔ, i tɛna ɲɛfɛla sɔrɔ, k'a masɔrɔ i yɛlɛnna i fa ka dalan kan. I yɛlɛntɔ ye ne ka dalan nɔgɔ.
[5] «Simeɔn ni Levi bɛ ba la. U ka npanw ye fariya minanw ye.
[6] Ne dusu, i kana don u ka jɛ dogolen na. Ne ni, i kana kɛ u ka jama jɛɲɔgɔn dɔ ye, k'a masɔrɔ u diminnen ye mɔgɔw faga. U yɛrɛ sago kɛtɔ ye nturaw kɔsen fasabaw tigɛ.
[7] U ka dusu bɔ ko dangalen bɛ, katuguni u tun ka farin, ani u ka dimiya, katuguni hinɛ tun tɛ a la. Ne na u fara ka bɔɲɔgɔn na Yakuba la ka u jɛnsɛn Israɛl la.
[8] «Juda, i balimakɛw na e de bonya. I bolo na da i juguw tɔn kan. I fa denkɛw na u biri i kɔrɔ.
[9] Juda bɛ i ko waraba kamalen. Ne denkɛ, i bɛ na ka bɔ i ka fɛn fagalen kun na. A y'i bugu ka a senw sɛɛnɛ i ko waraba, i ko warabamuso, jɔni na a lawuli?
[10] Masaya bere tɛna mabɔ Juda la, kuntigiya bere tɛna bɔ a sen furancɛ la sani Silo ka na. Siyaw na o kan minɛ.
[11] A bɛ a ka fali siri rezɛn sun na, ka a ka falimuso den siri rezɛn sun ɲuman la. A ye a ka finiw ko diwɛn na, ka a ka dulɔkiba ko rezɛn joli la.
[12] A ɲɛ bɛ bilen diwɛn fɛ, a ɲi bɛ jɛya nɔnɔ fɛ.
[13] «Zabulɔn na sigi kɔgɔji da la. A na kɛ jikan kurunw ka dankan ye. A dan yɔrɔ na taa se fo Sidɔn kɛrɛ fɛ.
[14] «Isakar bɛ i ko fali barikama. A bɛ i da bagan sow kɔnɔ.
[15] A ye lafiya yɔrɔ ye, ko a ka ɲi, ka jamana ye, ko a ka di. A ye a kɔ mada doni ta kama. A kɛra jɔn ye ka diyagoya baara kɛ.
[16] «Dan na kiri tigɛ a ka mɔgɔw kan i ko Israɛl siya tɔw la kelen.
[17] Dan na kɛ i ko sa sira da la, i ko fɔnfɔnnin sira kan. A bɛ so cin o ntɔrɔn kɔrɔ fo ka so kan yɛlɛnbaa bi a kɔ kan.
[18] «Matigi, ne bɛ i ka kisili makɔnɔ.
[19] «Gad, kɛlɛbolo na girin i kan, nka i ka girin u nɔ fɛ.
[20] «Asɛr ka dumuni fɛn tuluma don. Masakɛw ka dumuni fɛnɲuman ɲuman na sɔrɔ a fɛ.
[21] «Nefitali bɛ i ko dajɛ bilalen, a bɛ kuma ɲuman fɔ.
[22] «Yusufu bɛ i ko jiri min bɛ den, a bɛ i ko jiri denta min bɛ ji boyi da la. A bolow bɛ woyo kogo san fɛ.
[23] Kala bonnaw ye a sɛgɛn kosɛbɛ. U ye a bon ni u ka biɲɛw ye ka tugu a nɔ fɛ,
[24] nka a yɛrɛ ka kala barika ma dɛsɛ. A tugukanw barika bonyara Yakuba ka Sebaayatigi bolow barika la. O cogo la a kɛra saga gɛnna ye, Israɛl ka farakurun don.
[25] I tugukanw barika bonyara i fa ka Ala yɛrɛ barika la, o de na i dɛmɛ, ani Sebaayabɛɛtigi barika la, o de na duba i ye, ni sankolola duba ye ka bɔ san fɛ, ani dunba la duba ka bɔ dugukolo jukɔrɔ. A na duba tasin ni kɔnɔbara ye.
[26] I fa ka dubaw ka bon ka tɛmɛn ne bɛnbaw ka dubaw bɛɛ kan, fo ka se kulu banbaliw san fɛ. U bɛ da Yusufu kun na, o min ye kuntigi ye a balimakɛw cɛma, u bɛ da ale de kuncɛ la.
[27] «Benjamɛn bɛ i ko surukujeni farafaralikɛla. Sɔgɔma da fɛ a bɛ a ka sogo minɛlen dun. Wula da fɛ a bɛ fɛn cɛlen tilatila.»
[28] Israɛl siya tan ni fila ye olu ye. U fa ye dubaw kɛ ni kuma minw ye, olu don. A ye dubaw kɛ u ye ka kɛɲɛ ni u bɛɛ kelen-kelen ka duba ye.
[29] O kɔ, a ye nin ci fɔ u ye ko: «Ne bɛna kafo ne ka mɔgɔw kan. Aw ka ne su don ne bɛnbaw kɛrɛ fɛ Hɛti bɔnsɔn Efrɔn ka foro la kuluwo kɔnɔ.
[30] O kuluwo bɛ Makipela foro la Mamre kuntilenna la Kanan jamana la. Ibrahima ye o kuluwo ni o foro san Hɛti bɔnsɔn Efrɔn fɛ ka kɛ su don yɔrɔ ye.
[31] Ibrahima ni a muso Saran suw donna yen. Isaka ni a muso Rebɛka suw fana donna yen. Ne ye Lea fana su don yen.
[32] O foro ni o kuluwo sanna Hɛti bɔnsɔn fɛ.»
[33] Yakuba tilara o ciw fɔli la a denkɛw ye tuma min na, a ye a senw lasama a ka dalan kan, a ni bɔra, a kafora a ka mɔgɔw kan.