[1] Dugukolo bɛɛ tun bɛ kan kelen ni kuma kelen fɔ.
[2] U taamatɔ ka bɔ kɔrɔn fɛ, u ye kɛnɛba ye Sinear jamana la, u sigira yen.
[3] U y'a fɔ ɲɔgɔn ye ko: «A' ye na an ka tufa gosi ka u jeni kosɛbɛ.» Tufa kɛra kabakurun nɔ na u fɛ, dugukolo mana kɛra bɔgɔ nɔ na.
[4] U ko: «A' ye na, an ka dugu sigi ka sankanso jan jɔ, a kun ka se fo sankolo ma. An ka tɔgɔba sɔrɔ, walisa an kana jɛnsɛn dugukolo yɔrɔ bɛɛ la.»
[5] Hadamadenw tun bɛ dugu ni sankanso jan minw jɔli la, Matigi jiginna ka na ka olu filɛ.
[6] Matigi ko: «A filɛ, u bɛɛ ye siya kelen de ye, u bɛɛ bɛ kan kelen fɔ. U ye min daminɛ, o filɛ nin ye. Ayiwa sisan foyi tɛna u bali u sagona ko la.
[7] A' ye na, an ka jigin ka u kumakan ɲaami, walisa u kana ɲɔgɔn kan mɛn tun.»
[8] Ayiwa Matigi ye u jɛnsɛn ka bɔ yen, u taara dugukolo yɔrɔ bɛɛ la. U ye o dugu sigili dabila.
[9] O de y'a to u ye o tɔgɔ da ko Babɛl, katuguni Matigi ye dugukolo kan mɔgɔw kumakan ɲaami yen. Matigi ye u jɛnsɛn ka bɔ yen ka taa dugukolo yɔrɔ bɛɛ la.
[10] Sɛm bɔnsɔn filɛ nin ye. Sɛm ye san kɛmɛ sɔrɔ, a ye Arpakisad bange, ji belebeleba tɛmɛnnen san filanan la.
[11] Arpakisad bangelen kɔ, Sɛm ye san kɛmɛ duuru sɔrɔ ka denkɛw ni denmusow bange.
[12] Arpakisad ye san bisaba ni duuru sɔrɔ, a ye Selak bange.
[13] Selak bangelen kɔ, Arpakisad ye san kɛmɛ naani ani san saba sɔrɔ ka denkɛw ni denmusow bange.
[14] Selak ye san bisaba sɔrɔ, a ye Hebɛr bange.
[15] Hebɛr bangelen kɔ, Selak ye san kɛmɛ naani ani san saba sɔrɔ ka denkɛw ni denmusow bange.
[16] Hebɛr ye san bisaba ni naani sɔrɔ, a ye Pelɛg bange.
[17] Pelɛg bangelen kɔ, Hebɛr ye san kɛmɛ naani ni san bisaba sɔrɔ ka denkɛw ni denmusow bange.
[18] Pelɛg ye san bisaba sɔrɔ, a ye Rehu bange.
[19] Rehu bangelen kɔ, Pelɛg ye san kɛmɛ fila ni san kɔnɔntɔn sɔrɔ ka denkɛw ni denmusow bange.
[20] Rehu ye san bisaba ni fila sɔrɔ, a ye Serug bange.
[21] Serug bangelen kɔ, Rehu ye san kɛmɛ fila ani san wolonwula sɔrɔ ka denkɛw ni denmusow bange.
[22] Serug ye san bisaba sɔrɔ, a ye Nakɔr bange.
[23] Nakɔr bangelen kɔ, Serug ye san kɛmɛ fila sɔrɔ ka denkɛw ni denmusow bange.
[24] Nakɔr ye san mugan ni kɔnɔntɔn sɔrɔ, a ye Tɛrak bange.
[25] Tɛrak bangelen kɔ, Nakɔr ye san kɛmɛ ni tan ani san kɔnɔntɔn sɔrɔ ka denkɛw ni denmusow bange.
[26] Tɛrak ye san biwolonwula sɔrɔ, a ye Abrama ni Nakɔr ani Haran bange.
[27] Tɛrak bɔnsɔn filɛ nin ye. Tɛrak ye Abrama ni Nakɔr ani Haran bange. Haran ye Lɔti bange.
[28] Haran sara a fa Tɛrak ɲɛ k'a to a faso la Ur, Kalde jamana la.
[29] Abrama ni Nakɔr ye musow furu. Abrama muso tɔgɔ ko Sarayi. Nakɔr muso tɔgɔ ko Milka, Haran denmuso tun don. Haran tun ye Milka ni Jisika fa ye.
[30] Sarayi tun ye kɔna ye, a ma den sɔrɔ.
[31] Tɛrak taara ni a denkɛ Abrama ani a denkɛ Haran denkɛ Lɔti ani a biranmuso Sarayi ye, o tun ye a denkɛ Abrama muso ye. U bɔra Ur Kalde jamana la ɲɔgɔn fɛ, ko u bɛ taa Kanan jamana la. U sera Karan ka u sigi yen.
[32] Tɛrak si tilew bɛɛ tun ye san kɛmɛ fila ni san duuru ye. Tɛrak sara Karan.