[1] Abrama bɔra Misira jamana la ka taa Kanan worodugu yanfan fɛ, ale ni a muso ni a ka fɛnw bɛɛ, ani Lɔti fana.
[2] Abrama fɛntigiyara kosɛbɛ, baganw ni wari ani sanu tun b'a fɛ.
[3] A bɔra worodugu yanfan fɛ jamana la ka taama dɔɔnin dɔɔnin fo ka se Bɛtɛl, a ka finiso tun bɛ yɔrɔ kɔrɔ min na fɔlɔ Bɛtɛl ni Ayi cɛ,
[4] a ka saraka bɔlan jɔ yɔrɔ kɔrɔ la. Abrama selen o yɔrɔ la, a ye Matigi bato yen.
[5] Bagan misɛnw ni misiw ni finisow tun bɛ Abrama taama ɲɔgɔn Lɔti fana bolo.
[6] O jamana tun ka dɔgɔ u la, u ma kun a la, katuguni u bolo fɛnw tun ka ca. U ma se ka sigi ɲɔgɔn fɛ.
[7] Abrama ka bagan gɛnnaw ni Lɔti ka bagan gɛnnaw kɛlɛla. O tuma la Kanankaw ni Ferɛz siya sigilen tun bɛ o jamana la.
[8] Abrama y'a fɔ Lɔti ye ko: «Ne ni e kana kɛlɛ, ne ka bagan gɛnnaw ni i ka bagan gɛnnaw kana kɛlɛ, k'a masɔrɔ an ye balimaw ye.
[9] Jamana yɔrɔ bɛɛ tɛ i ɲɛ kɔrɔ wa? An ka mabɔ ɲɔgɔn na. Ni i taara numan fɛ, ne na taa kinin fɛ. Ni i taara kinin fɛ, ne na taa numan fɛ.»
[10] Lɔti y'a ɲɛ kɔrɔta ka Jurdɛn kɛnɛ bɛɛ filɛ, k'a ye ko ji caman bɛ o yɔrɔ bɛɛ la. Sani Matigi ka Sodɔmɛ ni Gomɔrɛ halaki, o tun bɛ i ko Matigi ka nakɔ, i ko Misira jamana ni i taara Zoar yanfan fɛ.
[11] Ayiwa, Lɔti ye Jurdɛn kɛnɛ bɛɛ ɲɛnatɔmɔ. A yɛlɛmana kɔrɔn yanfan fɛ. O cogo la u mabɔra ɲɔgɔn na.
[12] Abrama sigira Kanan jamana la. Lɔti sigira Jurdɛn kɛnɛ duguw la, ka a ka finisow jɔ Sodɔmɛ kɛrɛ fɛ.
[13] Sodɔmɛkaw kɔni tun ka jugu, u tun ye jurumukɛlaw ye Matigi ɲɛ kɔrɔ.
[14] Lɔti mabɔlen kɔ Abrama la, Matigi y'a fɔ Abrama ye ko: «Ka i to i ka yɔrɔ la, i ka i ɲɛ kɔrɔta ka saheli yanfan filɛ, ka worodugu yanfan ni kɔrɔn yanfan ni tilebi yanfan fana filɛ,
[15] k'a masɔrɔ i ɲɛ bɛ jamana min na, ne na o bɛɛ di i ni i bɔnsɔn ma badaa.
[16] Ne na i bɔnsɔn kɛ i ko dugukolo buguri. Ni mɔgɔ bɛ se ka dugukolo buguri dan, i bɔnsɔn fana na dan.
[17] Wuli ka jamana cɛ tigɛ ka a janya ni a fɛrɛ yaala, katuguni ne na a di i ma.»
[18] Abrama ye a ka finisow yɛlɛma ka bɔ yen ka taa sigi Mamre sensun jiriw kɛrɛ fɛ, u bɛ Heborɔn. A ye saraka bɔlan jɔ Matigi ye yen.