[1] Kɔngɔ juguyara jamana la.
[2] U nana ni suman min ye ka bɔ Misira, o dunna ka ban. Yakuba y'a fɔ a denkɛw ye ko: «Aw ka kɔsegin ka dumuni fɛn dɔɔnin san tun.»
[3] Juda y'a fɔ a ye ko: «O cɛ y'a fɔ an ye ka a gɛlɛya an ma, ko an tɛna a ɲɛda ye, ni an dɔgɔkɛ ma taa an fɛ.
[4] Ni i bɛ an dɔgɔkɛ bila ka taa an fɛ, an na taa dumuni fɛn san i ye.
[5] Nka ni i ma a bila ka taa, an tɛna taa, sabu o cɛ y'a fɔ an ye ko an tɛna a ɲɛda ye, ni an dɔgɔkɛ ma taa an fɛ.»
[6] Israɛl ko: «Mun y'a to aw ye ko jugu kɛ ne la ten k'a fɔ o cɛ ye ko dɔgɔkɛ bɛ aw fɛ?»
[7] U ko: «O cɛ ye sɛgɛsɛgɛli kɛ an ni an so mɔgɔw ko la, ko an fa bɛ ni la wa, ko balima dɔ wɛrɛw bɛ an fɛ wa? An y'a jaabi ka kɛɲɛ ni o kuma ye. An tun bɛ se k'a dɔn cogo di ko a n'a fɔ an ye ko an dɔgɔkɛ ka taa?»
[8] Juda y'a fɔ a fa Israɛl ye ko: «Cɛni bila ka taa ne fɛ, an na wuli ka taa, walisa an ni e ni an denw ka balo, an kana na sa.
[9] Ne na kɛ a kotigi ye. Ni ne ma na n'a ye ka a di i ma, ne na jalaki badaa.
[10] Ni an tun ma sumaya, nin waati tun b'a sɔrɔ an ye siɲɛ fila kɛ.»
[11] U fa Israɛl y'a fɔ u ye ko: «Ayiwa, ni wajibi don, aw ka nin kɛ. Aw ka nin jamana fɛnɲumanw dɔ kɛ aw ka bɔrɛw kɔnɔ ka o cɛ sama ni u ye, barikante dɔɔnin ni di dɔɔnin ani suma diyalanw ni mirɛ ni pistase mɔ ani amande mɔ dɔ.
[12] Aw ka taa ni wari ɲɔgɔn fila ye aw bolo. Wari min seginna aw ka bɔrɛw kɔnɔ, aw ka taa ni o ye, a dɔrɔ filili kɛra.
[13] Aw dɔgɔkɛ fana ka taa, aw ka wuli ka kɔsegin o cɛ yɔrɔ.
[14] Ala Sebaayabɛɛtigi ka aw hinɛ don o cɛ la, walisa a ka aw fa denkɛ dɔ tila, ani Benjamɛn fana. Ni ne bɔnɛna ne denw la, ne bɔnɛna dɛ.»
[15] Cɛw ye o sama fɛnw ta ka wari ɲɔgɔn fila ta u bolo. Benjamɛn fana taara u fɛ. U wulila ka taa Misira ka u jɔ Yusufu ɲɛ kɔrɔ.
[16] Yusufu ye Benjamɛn ye u fɛ minkɛ, a y'a fɔ a ka so kunnasigibaa ye ko: «Na ni nin cɛw ye ne ka so ka bagan dɔ faga ka tobili kɛ, sabu nin cɛw na tilela fana dun ne fɛ.»
[17] O cɛ ye Yusufu ka kuma fɔlen kɛ. O cɛ donna ni u ye Yusufu ka so kɔnɔ.
[18] O mɔgɔw siranna, katuguni a donna ni u ye Yusufu ka so kɔnɔ. U ko: «Wari min seginna an ka bɔrɛw kɔnɔ fɔlɔfɔlɔ, o de ye an ladon kun ye. A b'a fɛ ka cogo sɔrɔ ka bi an kan ka an kɛ jɔnw ye ka an ka faliw fana minɛ.»
[19] U gɛrɛla Yusufu ka so kunnasigibaa la ka kuma a fɛ so da la.
[20] U ko: «An matigi, an nana fɔlɔfɔlɔ ka ɲɔ san tuma min na,
[21] an selen an si yɔrɔ la, an ye an ka bɔrɛw da foni, k'a sɔrɔ cɛw bɛɛ kelen-kelen ka wari dafalen bɛ u ka bɔrɛ kɔnɔ. An seginna ni o wariw ye an bolo.
[22] An ma an ka wari donbaa dɔn an ka bɔrɛw kɔnɔ. An nana ni wari wɛrɛ ye fana ka dumuni fɛn san.»
[23] O cɛ ko: «Hɛrɛ ka kɛ aw ye, aw kana siran. Aw ka Ala, aw fa fana ka Ala, o ye nafolo di aw ma aw ka bɔrɛw kɔnɔ. Aw ka wari dira ne ma.» A ye Simeɔn bɔ kaso la ka taa u fɛ yen.
[24] So kunnasigibaa taara ni o cɛw ye Yusufu ka so kɔnɔ ka ji di u ma, u ye u senw ko. A ye dumuni di u ka faliw ma.
[25] U ye u ka sama fɛnw labɛn sani Yusufu ka na tilegwan fɛ, katuguni u y'a mɛn ko u na dumuni kɛ yen.
[26] Yusufu selen so, u nana ni u ka sama fɛnw ye so kɔnɔ ka u biri duguma a kɔrɔ.
[27] A ye foli di u ma, a ko: «Aw kumana cɛkɔrɔba min ko la, aw fa, a ka kɛnɛ wa? A bɛ ni la wa?»
[28] U y'a jaabi ko: «I ka jɔn, an fa, a ka kɛnɛ, a bɛ ni la.» U ye u kun biri ka a bonya.
[29] Yusufu ye a ɲɛ jɔ a ba den dɔgɔkɛ Benjamɛn la, a ko: «Aw kumana ne fɛ aw dɔgɔkɛ min ko la, nin don wa? Ala ma hɛrɛ kɛra i ye, ne denkɛ.»
[30] Yusufu ye i tɛliya, katuguni a dɔgɔkɛ nege tun b'a la, a tun bɛ kasi yɔrɔ ɲini. A donna a ka bon kɔnɔ ka kasi yen.
[31] A ye a ɲɛ ko ka bɔ yen. A ye a yɛrɛ minɛ k'a fɔ ko: «Dumuni ka na.»
[32] U ye Yusufu ta bɔ a dan na ka a balimaw ta bɔ a dan na. Misiraka minw bɛ dumuni kɛ a ka so, u ye olu ta bɔ a dan na, katuguni Misirakaw ni Hɛburuw tun tɛ dumuni kɛ ɲɔgɔn fɛ. O ye Misirakaw tana ye.
[33] Yusufu balimakɛw sigira a ɲɛ kɔrɔ, den fɔlɔ ka kɛɲɛ ni a ka den fɔlɔya ye, dɔgɔmanni ka kɛɲɛ ni a ka dɔgɔya ye. U ye ɲɔgɔn filɛ ka kabakoya.
[34] Yusufu ye dumuni bɔ a yɛrɛ kɔrɔ ka a di u ma, nka Benjamɛn niyɔrɔ tun bɛ kɔrɔkɛw bɛɛ kelen-kelen ta bɔɲɔgɔnko duuru bɔ. U ye minni kɛ, a ni u ɲagalila ɲɔgɔn fɛ.