[1] Ibrahima wulila ka taa worodugu yanfan fɛ, a y'i sigi Kadɛs ni Sur cɛ. A taara ka waati kɛ Gerar.
[2] Ibrahima y'a fɔ a muso Saran ko la ko: «Ne balimamuso don.» Gerar masakɛ Abimelɛk ye mɔgɔw bila ka Saran ta ka taa a ka so.
[3] O tuma la Ala y'i jira Abimelɛk la sugo la su fɛ, k'a fɔ a ye ko: «A filɛ, i ye mɔgɔ su ye nin muso tali kosɔn, k'a masɔrɔ cɛ b'a fɛ.»
[4] Abimelɛk tun ma gɛrɛ a la, a ko: «Matigi, i na hali siya tilennen halaki wa?
[5] O cɛ yɛrɛ m'a fɔ ko a balimamuso don wa? O muso m'a fɔ ko a balimakɛ don wa? Ne dusukun tilennen jalakibali de y'a kɛ.»
[6] Ala y'a fɔ a ye sugo la ko: «Ne y'a dɔn ko i dusu tilennen y'a kɛ, ne fana y'i bali, i kana ne hakɛ ta. O de kosɔn ne y'a to i kana maga a la.
[7] I ka o muso segin a cɛ ma sisan. Kira don, a na delili kɛ i ye, i tɛna sa. Nka ni i m'a kɔsegin a ma, i k'a dɔn ko i ni i ka mɔgɔw bɛɛ na sa dɛ.»
[8] Abimelɛk solila ka wuli ka a ka jɔnw bɛɛ lajɛ ka o kow bɛɛ lakali u ye. O mɔgɔw siranna kosɛbɛ.
[9] Abimelɛk ye Ibrahima fana wele k'a fɔ a ye ko: «I ye mun kɛ an na? Ne ye i hakɛ ta mun ko la, fo i ye jurumuba lase ne ni ne ka masaya ma? I ye min kɛ ne la, o tɛ kɛta ye dɛ.»
[10] Abimelɛk y'a fɔ Ibrahima ye ko: «I ye o kɛ mun kosɔn?»
[11] Ibrahima y'a jaabi ko: «Ne tun bɛ miiri ko siga t'a la, Ala ɲɛsiran tɛ nin jamana la, ko mɔgɔw na ne faga ne muso nɔ fɛ.
[12] Ka fara o kan, tiɲɛ la ne balimamuso don. An bɛ fa la, nka an tɛ ba la. Ne y'a furu.
[13] Ayiwa, Ala ye ne labɔ ne faso la ka kɛ yaalabaa ye tuma min na, ne y'a fɔ Saran ye ko a ka ko ɲuman min kɛ ne ye, o filɛ nin ye: An bɛ se yɔrɔ o yɔrɔ, a k'a fɔ ko ne ye a balimakɛ ye.»
[14] Abimelɛk ye sagaw ni misiw ni jɔnkɛw ni jɔnmusow di Ibrahima ma, ka a muso Saran kɔsegin a ma.
[15] Abimelɛk ko: «Ne ka jamana filɛ i kɔrɔ. I ka sigi i sagola yɔrɔ la.»
[16] A y'a fɔ Saran ye ko: «A filɛ, ne ye warijɛ waa kelen di i balimakɛ ma, o na kɛ i kunna birilan ye i fɛ mɔgɔw bɛɛ ɲɛ na, i jalakibali don mɔgɔw bɛɛ ɲɛ kɔrɔ.»
[17] Ibrahima ye Ala deli, Ala ye Abimelɛk ni a muso ni a ka jɔnmusow kɛnɛya, u ye bange kɛ tun,
[18] k'a masɔrɔ Matigi tun ye Abimelɛk ka so kɔnɔ musow bɛɛ bali bange la Ibrahima muso Saran kosɔn.