[1] Isumaɛl bɔnsɔn taara ni Yusufu ye Misira. Misiraka dɔ ye a san olu fɛ. O tɔgɔ ko Potifar. Potifar tun ye Faraon ka garadiw kuntigi ye.
[2] Matigi tora Yusufu fɛ, a ka ko bɛɛ ɲɛna. A tun bɛ a makɛ Misiraka ka so kɔnɔ.
[3] A makɛ y'a ye ko Matigi bɛ a fɛ, ko a bɛ fɛn o fɛn kɛ, Matigi bɛ o ɲɛ a bolo.
[4] Yusufu ko diyara Potifar ye, a ye o mago ɲɛ. Potifar y'a sigi a ka so bɛɛ kun na ka a bolo fɛnw bɛɛ kalifa a ma.
[5] Kabini a y'a bila a ka so ni a bolo fɛnw bɛɛ kun na, Matigi dubara o Misiraka ka so ye Yusufu kosɔn. Matigi ka duba sera a bolo fɛnw bɛɛ ma so kɔnɔ taw ani forow la taw.
[6] Potifar ye a ka nafolo bɛɛ to Yusufu bolo, a hakili tun tɛ a bolo fɛn si la a ka dumuni fɛn kɔ. Nɔɔrɔ tun bɛ Yusufu la, a cɛ tun ka ɲi.
[7] O kɔ, Yusufu makɛ muso ye a ɲɛ jɔ a la k'a fɔ a ye ko: «Da ne fɛ.»
[8] Yusufu ma sɔn, nka a y'a fɔ a makɛ muso ye ko: «Ne makɛ tɛ so kɔnɔ fɛn si dɔn, a ye a bolo fɛnw bɛɛ kalifa ne ma.
[9] Ale yɛrɛ man bon ni ne ye nin so kɔnɔ. A ma ne bali fɛn si la e kelen kɔ, katuguni i ye a muso ye. Ne dun bɛ se ka o ko juguba kɛ ka Ala hakɛ ta cogo di?»
[10] A tun bɛ kuma Yusufu fɛ don o don, nka a ma sɔn ka da a fɛ wala ka kɛ a fɛ.
[11] Don dɔ Yusufu donna so kɔnɔ ka a ka baara kɛ, so kɔnɔ cɛ si tun tɛ yen.
[12] Muso ye a minɛ a ka dulɔki ma k'a fɔ a ye ko: «Da ne fɛ.» Yusufu ye a ka dulɔki to a bolo ka boli ka taa kɛnɛma.
[13] Muso y'a ye ko a ye a ka dulɔki to a bolo ka boli tuma min na,
[14] a ye a ka so kɔnɔ mɔgɔw wele k'a fɔ u ye ko: «Aw k'a filɛ. A nana ni Heburu dɔ ye walisa o ka tulon kɛ an na. O donna ne kan ko a bɛ da ne fɛ, ne ye kulokanba ci.
[15] A ye ne kulokanba mɛn tuma min na, a ye a ka dulɔki to ne bolo ka boli ka taa kɛnɛma.»
[16] Ayiwa, muso ye Yusufu ka dulɔki to a fɛ yen sani a makɛ ka se so.
[17] Muso ye nin kuma fɔ a cɛ ye ko: «I nana ni Heburu jɔnkɛ min ye, o donna ne kan ko a bɛ tulon kɛ ne la.
[18] Ne ye kulokan bɔ, a ye a ka dulɔki to ne fɛ ka boli ka taa kɛnɛma.»
[19] A makɛ ye a muso ka kuma fɔlen mɛn tuma min na, ko a ka jɔnkɛ y'a kɛ a la ten, a diminna.
[20] Yusufu makɛ y'a minɛ ka a bila kaso la, masakɛ ka kasola mɔgɔw bɛ bila yɔrɔ min na. A tora kaso la yen.
[21] Matigi tora Yusufu fɛ ka ko ɲuman kɛ a ye ka a ko diya kaso kuntigi ye.
[22] Kaso kuntigi ye kasola mɔgɔw bɛɛ ka ko ɲɛ to Yusufu bolo. Fɛn o fɛn tun bɛ kɛ yen, Yusufu tun ye o ɲɛminɛbaa ye.
[23] Fɛn minw tun bɛ Yusufu bolo, kaso kuntigi ma o si kɔlɔsi, katuguni Matigi tora Yusufu fɛ. A ye fɛn o fɛn kɛ, Matigi ye o ɲɛ.