[1] San fila tɛmɛnnen kɔ, Faraon sugora, a jɔlen filɛ ba da la.
[2] Misi tɔlɔlen wolonwula bɔra baji la, u cɛ tun ka ɲi. U ye dumuni kɛ ba da la buruku la.
[3] A filɛ, misi fasalen wolonwula wɛrɛ bɔra baji la olu kɔ. U cɛ tun ka jugu. U y'u jɔ olu kɛrɛ fɛ ba da la.
[4] Misi cɛ jugu fasalenw ye misi cɛɲuman tɔlɔlen wolonwula dun. O tuma la Faraon kununna.
[5] A sunɔgɔra ko kura ka sugo tun. A filɛ, ɲɔtinsan wolonwula bɔra kala kelen na, u kisɛlen don, u cɛ tun ka ɲi.
[6] A filɛ, ɲɔtinsan wolonwula wɛrɛ bɔra olu kɔ, kisɛ tɛ olu la, u jalen tun don kɔrɔnfɛ fiɲɛ fɛ.
[7] Tinsan kisɛntanw ye o tinsan kisɛlenw ɲuman wolonwula kunun. Faraon kununna ka bɔ sunɔgɔ la. A filɛ, sugo tun don.
[8] Dugu jɛlen, a ja tigɛra. A ye Misira filɛlikɛlaw bɛɛ ni a hakilitigiw bɛɛ wele. Faraon ye a ka sugow lakali u ye, nka u si ma se ka u kɔrɔ fɔ a ye.
[9] O tuma la minni fɛnw kuntigi y'a fɔ Faraon ye ko: «Ne hakili jiginna ne ka hakɛma kow la bi.
[10] Faraon, e tun diminna i ka jɔnw kɔrɔ. I ye ne ni buuru dilabaaw kuntigi bila kaso la garadiw kuntigi ka so kɔnɔ.
[11] An fila bɛɛ sugora su kelen na. An bɛɛ kelen-kelen sugora ka kɛɲɛ ni an ka sugow ni u kɔrɔ ye.
[12] Kamalen dɔ tun bɛ an fɛ yen, Heburu don, garadiw kuntigi ka jɔn don. An ye an ka sugow lakali a ye. A ye an bɛɛ kelen-kelen ka sugow kɔrɔ fɔ an ye ka kɛɲɛ ni an ka sugow ye.
[13] A ye kɔrɔ minw fɔ an ye, o kow bɛɛ kɛra ten. Faraon, i ye ne kɔsegin ne ka baara la. I ye buuru dilabaaw kuntigi dulon.»
[14] Faraon ye ci bila ka Yusufu wele. U y'a labɔ kaso la joona. A ye a dasi di ka a ka finiw yɛlɛma ka taa Faraon yɔrɔ.
[15] Faraon y'a fɔ Yusufu ye ko: «Ne sugora, mɔgɔ si tɛ yan ka a kɔrɔ fɔ. Ne y'a mɛn ko ni sugo lakalila i ye, ko i bɛ se ka o kɔrɔ fɔ.»
[16] Yusufu ye Faraon jaabi ko: «Ne tɛ se, Faraon. Ala de na jaabili ɲuman di i ma.»
[17] Faraon y'a fɔ Yusufu ye ko: «Ne sugora, ne jɔlen tun bɛ ba da la.
[18] A filɛ, misi tɔlɔlen wolonwula bɔra baji la, u cɛ tun ka ɲi. U ye dumuni kɛ ba da la buruku la.
[19] A filɛ, misi fasalen wolonwula bɔra olu kɔ. U cɛ tun ka jugu. Ne ma o misi fasalenw bɔɲɔgɔnko ye Misira fɔlɔ.
[20] O misi fasalen cɛ jugu ye o misi fɔlɔ tɔlɔlen wolonwula dun.
[21] Kabini u ye u kunun, mɔgɔ t'a dɔn ko u ye u kunun katuguni u fasalen tun don i ko fɔlɔ. O tuma la ne kununnna.
[22] O kɔ, ne sugora. A filɛ, tinsan ɲuman kisɛlen wolonwula bɔra kala kelen na.
[23] Tinsan wolonwula fɔsɔnfɔsɔnnen kisɛntanw, u jalen bɛ kɔrɔnfɛ fiɲɛ fɛ, olu bɔra kɔ fɛ.
[24] Tinsan kisɛntanw ye o tinsan ɲuman wolonwula kunun. Ne ye o lakali filɛlikɛlaw ye, u si ma se ka o kɔrɔ fɔ ne ye.»
[25] Yusufu y'a fɔ Faraon ye ko: «Faraon, i ka sugow ye sugo sifa kelen ye. Ala bɛna min kɛ, a ye o fɔ i ye.
[26] Misi ɲuman wolonwula ye san wolonwula ye. Tinsan ɲuman wolonwula ye san wolonwula ye. O sugow ye sifa kelen de ye.
[27] Misi fasalen cɛ jugu wolonwula minw bɔra olu kɔ, olu ye san wolonwula ye. Tinsan kisɛntan wolonwula minw jara kɔrɔnfɛ fiɲɛ fɛ, olu fana na kɛ san wolonwula kɔngɔba ye.
[28] Ne ye min fɔ i ye Faraon, o don. Ala bɛna min kɛ, a ye o jira i la.
[29] A filɛ, sɛnɛ fɛnw na ɲɛ Misira jamana fan bɛɛ la san wolonwula kɔnɔ.
[30] O kɔ, kɔngɔba na don ka san wolonwula kɛ. Mɔgɔw na ɲinɛ o suman sɔrɔlenbaw kɔ Misira. Kɔngɔba na jamana halaki.
[31] O kɔngɔba min bɛna tugu o sɔrɔba kɔ, o na juguya fo o sɔrɔba tɛna dɔn jamana kɔnɔ tun.
[32] Faraon, i sugora siɲɛ fila. O b'a jira ko Ala ye o latigɛ, ko a na o kɛ joona.
[33] Ayiwa sisan Faraon, i ka cɛ ko dɔnbaa hakilitigi ɲini ka o sigi Misira kun na.
[34] I ka o kɛ ka sɛnɛkɛ kuntigiw sigi dugukolo kun na. A ka sɛnɛ suman tila duurunan minɛ o san ɲuman wolonwula kɔnɔ.
[35] U ka o san ɲuman nataw suman bɛɛ lajɛ ɲɔgɔn kan ka ɲɔ bila jiginɛw kɔnɔ i bolo. O na mara ka kɛ dumuni fɛn ye duguw kɔnɔ.
[36] O na kɛ dumuni maralen ye ka bila o san wolonwula kɔngɔ ɲɛ, min bɛ na Misira jamana kɔnɔ. O cogo la jamana tɛna halaki kɔngɔ fɛ.»
[37] O kuma diyara Faraon ni a ka jɔnw bɛɛ ye.
[38] Faraon y'a fɔ a ka jɔnw ye ko: «Nin cɛ falen bɛ Ala Ni la. An bɛ se ka mɔgɔ wɛrɛ sɔrɔ min bɛ tɛmɛn nin kan wa?»
[39] Faraon y'a fɔ Yusufu ye ko: «Ala ye o ko bɛɛ jira i la, o de y'a to i bɔɲɔgɔnko hakilitigi ko dɔnbaa tɛ.
[40] Ne bɛ i sigi ne ka so kun na. Ne ka mɔgɔw bɛɛ na i kan minɛ. Ne na bonya ka tɛmɛn i kan masasigilan dama ko la.»
[41] O kɔ, Faraon y'a fɔ Yusufu ye ko: «A filɛ, ne bɛ i sigi Misira jamana bɛɛ kun na.»
[42] Ayiwa, Faraon ye a ka bolonkɔni la nɛgɛ taamashyɛnma bɔ a bolonkɔni la ka a don Yusufu bolonkɔni la, ka lenfu finiw don a kan na ka sanu jɔlɔkɔ don a kan na.
[43] Faraon ye a sigi wotoro filanan kɔnɔ. Mɔgɔw ye welewele da a ɲɛ ko: «A' ye aw ɲɔngiri.» Faraon ye Yusufu sigi Misira jamana bɛɛ kun na.
[44] Faraon y'a fɔ Yusufu ye ko: «Ne kɔni ye Faraon ye, nka mɔgɔ si tɛna a bolo wala a sen kɔrɔta Misira jamana kɔnɔ ni i ma o yamaruya di o tigi ma.»
[45] Faraon ye Yusufu tɔgɔ da ko Zafenat-Paneak. A ye muso di a ma, o tɔgɔ ko Asenat. On sarakalasebaa Poti-Fera denmuso tun don. Yusufu taara Misira jamana yɔrɔ bɛɛ yaala.
[46] Yusufu si san bisabanan la, a ye i jɔ Misira masakɛ Faraon ɲɛ kɔrɔ. Yusufu bɔra ka taa Misira jamana bɛɛ yaala.
[47] Ayiwa, dugukolo ye dumuni fɛnɲuman bɔ ka caya o san wolonwula kɔnɔ.
[48] O san wolonwula minw kɛra Misira jamana la, Yusufu ye Misira jamana suman bɛɛ lajɛ yɔrɔ kelen na o san wolonwula kɔnɔ. A ye o suman lajɛ k'a bila duguw kɔnɔ. A ye duguw bɛɛ kelen-kelen lamini forow dumuni fɛnw lajɛ o duguw kɔnɔ.
[49] Yusufu ye ɲɔ caman lajɛ ka caya i ko kɔgɔji dala cɛncɛn. A cayara fo a ye a jateli dabila katuguni a dama tun tɛ se ka dɔn.
[50] Sani kɔngɔba sanw ka se, Yusufu ye denkɛ fila sɔrɔ Asenat fɛ. O tun ye On sarakalasebaa Poti-Fera denmuso ye.
[51] Yusufu ye a denkɛ fɔlɔ tɔgɔ da ko Manase. A ko: «Ala y'a to ne ka ɲinɛ ne ka sɛgɛn kow ni ne faso kɔ.»
[52] A ye filanan tɔgɔ da ko Efrayim. A ko: «Ka ne to ne tɔɔrɔ jamana la, Ala ye ne jiidi.»
[53] San ɲuman wolonwula minw kɛra Misira jamana la, olu tɛmɛnna.
[54] Kɔngɔba san wolonwula daminɛna ka kɛɲɛ ni Yusufu ka kuma fɔlen ye. Kɔngɔba donna jamana tɔw bɛɛ la, nka dumuni fɛn tun bɛ Misira jamana yɔrɔ bɛɛ la.
[55] Kɔngɔ juguyara Misira jamana bɛɛ la tuma min na, mɔgɔw taara dumuni fɛn ɲini Faraon fɛ. Faraon y'a fɔ Misirakaw bɛɛ ye ko: «Aw ka taa Yusufu sɛgɛrɛ. Ni a ye fɛn o fɛn fɔ aw ye, aw ka o kɛ.»
[56] Kɔngɔba donna dugukolo fan bɛɛ la. Yusufu ye jiginɛ belebelebaw bɛɛ dayɛlɛ ka ɲɔ feere Misirakaw ma. Kɔngɔ juguyara Misira jamana kɔnɔ.
[57] Jamanaw bɛɛ mɔgɔw bɔra dugukolo yɔrɔ bɛɛ la ka na Yusufu sɛgɛrɛ Misira ka ɲɔ san, katuguni kɔngɔ juguyara dugukolo yɔrɔ bɛɛ la.