[1] Yakuba sigira Kanan jamana la, a fa tun ye siginfɛ ye o jamana la.
[2] Yakuba bɔnsɔn ka ko kɛlenw filɛ ninw ye. Yusufu si san tan ni wolonwulanan la, a ni a kɔrɔkɛw tun bɛ sagaw gɛnnan ɲɔgɔn fɛ. O cɛni tun bɛ a fa musow Bilha ni Zilpa denkɛw fɛ. Yusufu ye olu tɔgɔ jugu fɔ a fa ye.
[3] Yusufu ko tun ka di a fa Israɛl ye ka tɛmɛn a denkɛ tɔw bɛɛ kan, katuguni a kɔrɔlen y'a sɔrɔ. A ye forokiya kalankalannen kala Yusufu ye.
[4] A kɔrɔkɛw y'a ye ko a ko ka di u fa ye ka tɛmɛn a kɔrɔkɛw bɛɛ kan, u y'a koniya. U ma sɔn ka kumaɲuman fɔ a ye.
[5] Yusufu sugora, a ye o lakali a kɔrɔkɛw ye. U y'a koniya ka tɛmɛn fɔlɔ ta kan.
[6] A y'a fɔ u ye ko: «Ne sugora ko min na, a' ye na o lamɛn.
[7] An tun bɛ alikama kan foro la ka u kansiri, a filɛ, ne ka kansiri wulila ka i jɔ. Aw ka kansiriw y'a lamini ka u biri ne ka kansiri ɲɛ kɔrɔ.»
[8] A kɔrɔkɛw y'a fɔ a ye ko: «Sɛbɛ la, i na sigi an kun na ka an mara wa?» U y'a koniya ka tɛmɛn fɔlɔ ta kan kosɛbɛ a ka sugo ni a ka kuma kosɔn.
[9] A sugora ko kura ka o lakali a kɔrɔkɛw ye. A ko: «Ne sugora tun. A filɛ, tile ni kalo ani dolo tan ni kelen ye u biri ne kɔrɔ.»
[10] A ye o lakali a fa ni a kɔrɔkɛw ye. A fa ye a kɔrɔfɔ k'a fɔ a ye ko: «I ye sugo min kɛ, o ye mun ye? Ne ni i ba ani i kɔrɔkɛw, an bɛ na an biri duguma i kɔrɔ wa?»
[11] a ɲɛma koniya tun bɛ a kɔrɔkɛw la, nka a fa ye o kuma to a hakili la.
[12] A kɔrɔkɛw taara u fa ka sagaw gɛn Sisɛm.
[13] Israɛl y'a fɔ Yusufu ye ko: «I kɔrɔkɛw bɛ saga gɛn la Sisɛm. Na, ne na i ci ka taa u yɔrɔ.» Yusufu ko: «O ka kɛ.»
[14] Israɛl y'a fɔ a ye ko: «I ka taa sisan ka i kɔrɔkɛw ni sagaw cogo filɛ ka na u kibaru fɔ ne ye.» Ayiwa, a ye Yusufu bila ka bɔ Heborɔn jɛ la, a taara Sisɛm.
[15] Cɛ dɔ ye Yusufu yaalatɔ ye kungokolon kɔnɔ. O cɛ y'a ɲininka ko: «I bɛ mun ɲini?»
[16] Yusufu ko: «Ne bɛ ne kɔrɔkɛw ɲini. Ni i bɛ u ka gɛnni kɛ yɔrɔ dɔn, ne b'i deli i ka o fɔ ne ye.»
[17] O cɛ y'a fɔ a ye ko: «U bɔra yan. Ne ye u kan mɛn ko u bɛ taa Dotan.» Yusufu taara Dotan ka a kɔrɔkɛw sɔrɔ yen.
[18] Ka a to yɔrɔ jan, u y'a ye. Sani a ka surunya u la, u bɛnna a la ko u na a faga.
[19] U y'a fɔ ɲɔgɔn ye ko: «Sugotigi natɔ filɛ.
[20] A' ye na sa, an ka a faga ka a bila dingɛ dɔ kɔnɔ k'a fɔ ko wara jugu y'a dun. A ka sugow na kɛ min ye, an na o ye.»
[21] Rubɛn ye o kuma mɛn, a ye Yusufu tila u la, a ko: «An kana a faga.»
[22] Rubɛn y'a fɔ u ye ko: «Aw kana a faga. Aw ka a bila nin dingɛ kɔnɔ kungokolon kɔnɔ yan, nka aw kana aw bolo da a kan.» A ye o fɔ, walisa a ka Yusufu tila u la ka a kɔsegin a fa ma.
[23] Yusufu selen a kɔrɔkɛw yɔrɔ la, u y'a ka forokiya kalankalannen bɔ a kan na.
[24] U ye Yusufu minɛ ka a fili o dingɛ kɔnɔ. Ayiwa, foyi tun tɛ dingɛ kɔnɔ, ji tun t'a la.
[25] U ye u sigi ka dumuni kɛ. U ye u ɲɛw kɔrɔta ka jamaba natɔ ye ka bɔ Galad. Isumaɛl bɔnsɔn dɔw tun don. U ka ɲaamɛw donina ni fɛn suma dumanw ni barikante ani mirɛ ye. U bɛ taa ni olu ye Misira.
[26] Juda y'a fɔ a balimaw ye ko: «Ka an dɔgɔkɛ faga ka a joli dogo, mun nafa bɛ o la?
[27] A' ye na, an ka a feere Isumaɛl bɔnsɔn ma. An kana an bolo da a kan, katuguni an dɔgɔkɛ don, an yɛrɛ farisogo dɔ don.» Juda balima tɔw sɔnna a ka kuma ma.
[28] Ayiwa, Madian jamana jagokɛlaw tɛmɛntɔ tun don. Yusufu kɔrɔkɛw ye a sama ka a bɔ dingɛ kɔnɔ ka a feere Isumaɛl bɔnsɔn ma warijɛ mugan na. Olu taara ni Yusufu ye Misira.
[29] Rubɛn kɔseginna ka taa dingɛ da la, a filɛ, Yusufu tun tɛ a kɔnɔ. Rubɛn ye a ka finiw fara.
[30] A seginna ka taa a balima tɔw yɔrɔ k'a fɔ u ye ko: «Denmisɛn tɛ yan, ne dun na taa min?»
[31] U ye Yusufu ka forokiya ta ka bakɔrɔ faga ka forokiya su o joli la.
[32] U ye o forokiya kalankalannen ci ka taa di u fa ma. U ko: «An ye nin sɔrɔ, a filɛ yala ni i denkɛ ka forokiya don.»
[33] Yakuba y'a dɔn, a ko: «Nin ye ne denkɛ ka forokiya ye, wara jugu y'a dun. Yusufu farafarala, siga t'a la.»
[34] Yakuba ye a ka finiw fara ka cafu fini don ka a cɛ siri ka tile caman kɛ ka a denkɛ su kasi.
[35] A denkɛw ni a denmusow bɛɛ wulila ko u bɛ a dusu saalo, a ma sɔn a dusu ka saalo. A ko: «Ne kasitɔ na jigin ka taa ne denkɛ fɛ lahara.» Ayiwa, a fa ye a su kasi.
[36] Madiankaw ye Yusufu feere Misira jamana la Potifar ma. Potifar tun ye Faraon ka garadiw kuntigi ye.