[1] Yusufu taara o ko fɔ Faraon ye ko: «Ne fa ni ne balimakɛw ani u ka bagan misɛnw ni u ka bagan kunbaw ani u bolo fɛnw bɛɛ nana ka bɔ Kanan jamana la. U bɛ Gosɛn jamana la.»
[2] A taara ni a kɔrɔkɛ mɔgɔ duuru ye ka u jira Faraon na.
[3] Faraon y'a fɔ Yusufu kɔrɔkɛw ye ko: «Aw ka baara ye mun ye?» U y'a fɔ Faraon ye ko: «I ka jɔnw, an ni an faw ye bagan gɛnnaw ye.»
[4] U y'a fɔ Faraon ye ko: «An nana ka sigi nin jamana la. Kɔngɔ juguyara Kanan jamana la, bin tɛ i ka jɔnw ka bagan gɛn yɔrɔw la. O de y'a to an b'i deli, i ka sɔn i ka jɔnw ka sigi Gosɛn jamana la.»
[5] Faraon y'a fɔ Yusufu ye ko: «I fa ni i balimakɛw nana i kɛrɛ fɛ.
[6] Misira jamana labilalen don i ye. I ka i fa ni i balimakɛw sigi nin jamana yɔrɔ bɛɛ laɲuman la. U ka sigi Gosɛn jamana la. Ni i ye mɔgɔ dɔw sɔrɔ u cɛma minw ka kisɛ, i ka olu bila ne ka baganw kun na.»
[7] Yusufu taara a fa Yakuba jira Faraon na. Yakuba ye dubaw kɛ Faraon ye.
[8] Faraon y'a fɔ Yakuba ye ko: «I si bɛ san joli bɔ?»
[9] Yakuba y'a fɔ Faraon ye ko: «Ne ka siginfɛya san kɛmɛ ni bisaba ye ɲinan ye. Ne si sanw man jan ka ne bɛnbaw si san dama bɔ ka u to u ka siginfɛya la, nka tɔɔrɔ ye ne sɔrɔ ne si kɔnɔ.»
[10] Yakuba ye dubaw kɛ Faraon ye ko kura ka bɔ Faraon ɲɛ kɔrɔ.
[11] Yusufu ye a fa ni a balimaw sigi ka dugukolo di u ma Misira jamana yɔrɔ bɛɛ la ɲuman la Ramsɛs fan fɛ, i ko Faraon y'a fɔ cogo min na.
[12] Yusufu ye a fa ni a balimaw ani a fa ka so mɔgɔw bɛɛ balo ka kɛɲɛ ni u ka gwaw ye.
[13] Dumuni tun tɛ jamana yɔrɔ si la, katuguni kɔngɔ juguyara. Misira jamana ni Kanan jamana barika dɛsɛra o kɔngɔba kosɔn.
[14] Yusufu ye ɲɔ feere ka Misira jamana wari bɛɛ ni Kanan jamana wari bɛɛ lajɛ ka o wari ladon Faraon ka so kɔnɔ.
[15] Misira jamana ni Kanan jamana wariw bɛɛ bannen kɔ, Misirakaw bɛɛ taara Yusufu sɛgɛrɛ k'a fɔ a ye ko: «Dumuni di an ma. I kana sɔn an ka sa i ɲɛ na. Wari tɛ an fɛ.»
[16] Yusufu ko: «Ni aw ka wari dɛsɛra, aw ka aw ka baganw di ne ma, ne na dumuni di aw ma olu nɔ na.»
[17] U taara ni u ka baganw ye Yusufu yɔrɔ. Yusufu ye dumuni falen u ma u ka sow ni u ka bagan misɛnw ni u ka bagan kunbaw ani u ka faliw la. A ye u balo u ka baganw na o san na.
[18] O san tɛmɛnnen kɔ, o nɔfɛ san na, u taara Yusufu sɛgɛrɛ ko: «An tɛna a dogo an matigi la ko an ka wari bɛɛ banna, an ka bagankuluw kɛra an matigi ta ye. Foyi ma to an bolo an Matigi ɲɛ kɔrɔ, an yɛrɛ kunw ni an ka dugukolow kɔ.
[19] I kana sɔn an ka sa i ɲɛ na ka an ka dugukolo lankolonya. I ka an ni an ka dugukolow sɔngɔ dumuni di an ma. An ni an ka dugukolow na kɛ Faraon taw ye. I ka suman si di an ma fana, walisa an ka balo, an kana na sa, an ka dugukolow fana kana na lankolonya.»
[20] Yusufu ye Misira dugukolow bɛɛ san Faraon ye, katuguni Misirakaw bɛɛ kelen-kelen ye u ka forow feere, sabu kɔngɔ digira u la haali. U ka dugukolow bɛɛ kɛra Faraon taw ye.
[21] A ye mɔgɔw bɛɛ yɛlɛma ka u sigi dugubaw kɔnɔ ka bɔ Misira kun kelen na ka taa bila a kun dɔ la.
[22] Nka a ma sarakalasebaaw ka dugukolow san, katuguni dumuni dira olu ma Faraon fɛ. U ye Faraon ka dumuni dilen dun, o de y'a to u ma u ka dugukolo feere.
[23] Yusufu y'a fɔ mɔgɔw ye ko: «A filɛ, ne ye aw ni aw ka dugukolow san Faraon ye bi. Suman si filɛ, aw ka danni kɛ forow la.
[24] Suman lasagon tuma la, aw na suman tila duurunan di Faraon ma. A tɔ tila naani na kɛ aw ta ye ka forow dan ani ka aw ka so mɔgɔw ni aw ka denmisɛnw balo.»
[25] U ko: «I ye an niw kisi, an ko ka diya an matigi ye, an na kɛ Faraon ka jɔnw ye.»
[26] Yusufu ye sariya sigi Misira jamana la fo ka na bila bi la, ko sɛnɛ suman tila duurunan na kɛ Faraon ta ye. Sarakalasebaaw ka dugukolo dɔrɔn ma kɛ Faraon ta ye.
[27] Israɛl sigira Misira, Gosɛn jamana la. U fɛntigiyara yen ka jiidi ka caya kosɛbɛ.
[28] Yakuba ye san tan ni wolonwula kɛ Misira jamana la. Yakuba si san dama kɛra san kɛmɛ ni binaani ani san wolonwula ye.
[29] Israɛl sa tuma surunyara tuma min na, a ye a denkɛ Yusufu wele k'a fɔ a ye ko: «Ni ne ko ka di i ye, ne b'i deli, i ka i bolo da ne woro kɔrɔ. I ka ko ɲuman ni kantigiya kɛ ne ye. I kana ne su don Misira.
[30] Nka ni ne kafora ne bɛnbaw kan tuma min na, i ka ne ta ka bɔ Misira ka taa ne su don ne bɛnbaw kaburu la.» Yusufu ko: «I ye min fɔ, ne na o kɛ.»
[31] Yakuba ko: «I kali ne ye.» A ye i kali a ye. Israɛl y'i biri a ka dalan kun yanfan kan ka batoli kɛ.